1. химавантасуттам̣

182. са̄ваттхинида̄нам̣. ‘‘сеййатха̄пи, бхиккхаве, химавантам̣ паббатара̄джа̄нам̣ нисса̄йа на̄га̄ ка̄йам̣ вад̣д̣хенти, балам̣ га̄хенти; те таттха ка̄йам̣ вад̣д̣хетва̄ балам̣ га̄хетва̄ кусоббхе отаранти, кусоббхе отаритва̄ маха̄соббхе отаранти, маха̄соббхе отаритва̄ куннадийо отаранти, куннадийо отаритва̄ маха̄надийо отаранти, маха̄надийо отаритва̄ маха̄самуддаса̄гарам̣ отаранти; те таттха махантаттам̣ вепуллаттам̣ а̄паджджанти ка̄йена; евамева кхо, бхиккхаве, бхиккху сӣлам̣ нисса̄йа сӣле патит̣т̣ха̄йа сатта боджджхан̇ге бха̄венто сатта боджджхан̇ге бахулӣкаронто махантаттам̣ вепуллаттам̣ па̄пун̣а̄ти дхаммесу. катхан̃ча, бхиккхаве, бхиккху сӣлам̣ нисса̄йа сӣле патит̣т̣ха̄йа сатта боджджхан̇ге бха̄венто сатта боджджхан̇ге бахулӣкаронто махантаттам̣ вепуллаттам̣ па̄пун̣а̄ти дхаммесӯти? идха, бхиккхаве, бхиккху сатисамбоджджхан̇гам̣ бха̄вети вивеканисситам̣ вира̄ганисситам̣ ниродханисситам̣ воссаггапарин̣а̄мим̣; дхаммавичайасамбоджджхан̇гам̣ бха̄вети…пе… вӣрийасамбоджджхан̇гам̣ бха̄вети…пе… пӣтисамбоджджхан̇гам̣ бха̄вети…пе… пассаддхисамбоджджхан̇гам̣ бха̄вети…пе… сама̄дхисамбоджджхан̇гам̣ бха̄вети…пе… упеккха̄самбоджджхан̇гам̣ бха̄вети вивеканисситам̣ вира̄ганисситам̣ ниродханисситам̣ воссаггапарин̣а̄мим̣. евам̣ кхо, бхиккхаве, бхиккху сӣлам̣ нисса̄йа сӣле патит̣т̣ха̄йа сатта боджджхан̇ге бха̄венто сатта боджджхан̇ге бахулӣкаронто махантаттам̣ вепуллаттам̣ па̄пун̣а̄ти дхаммесӯ’’ти. пат̣хамам̣.