6. абхисамайавагго

1. накхасикхасуттам̣

1121. атха кхо бхагава̄ париттам̣ накхасикха̄йам̣ пам̣сум̣ а̄ропетва̄ бхиккхӯ а̄мантеси – ‘‘там̣ ким̣ ман̃н̃атха, бхиккхаве, катамам̣ ну кхо бахутарам̣ – йо ва̄йам̣ майа̄ паритто накхасикха̄йам̣ пам̣су а̄ропито, айам̣ ва̄ маха̄патхавӣ’’ти? ‘‘етадева, бханте, бахутарам̣ йадидам̣ – маха̄патхавӣ; аппаматтака̄йам̣ бхагавата̄ паритто накхасикха̄йам̣ пам̣су а̄ропито. сан̇кхампи на упети, упанидхампи на упети, калабха̄гампи на упети маха̄патхавим̣ упанидха̄йа бхагавата̄ паритто накхасикха̄йам̣ пам̣су а̄ропито’’ти. ‘‘евамева кхо, бхиккхаве, арийаса̄вакасса дит̣т̣хисампаннасса пуггаласса абхисамета̄вино етадева бахутарам̣ дуккхам̣ йадидам̣ париккхӣн̣ам̣ парийа̄диннам̣; аппаматтакам̣ авасит̣т̣хам̣. сан̇кхампи на упети, упанидхампи на упети, калабха̄гампи на упети пуримам̣ дуккхаккхандхам̣ париккхӣн̣ам̣ парийа̄диннам̣ упанидха̄йа йадидам̣ саттаккхаттупарамата̄; йо ‘идам̣ дуккха’нти йатха̄бхӯтам̣ паджа̄на̄ти…пе… ‘айам̣ дуккханиродхага̄минӣ пат̣ипада̄’ти йатха̄бхӯтам̣ паджа̄на̄ти’’.

‘‘тасма̄тиха, бхиккхаве, ‘идам̣ дуккха’нти його каран̣ӣйо…пе… ‘айам̣ дуккханиродхага̄минӣ пат̣ипада̄’ти його каран̣ӣйо’’ти. пат̣хамам̣.

2. поккхаран̣ӣсуттам̣

1122. ‘‘сеййатха̄пи, бхиккхаве, поккхаран̣ӣ пан̃н̃а̄сайоджана̄ни а̄йа̄мена, пан̃н̃а̄сайоджана̄ни виттха̄рена, пан̃н̃а̄сайоджана̄ни уббедхена, пун̣н̣а̄ удакасса саматиттика̄ ка̄капеййа̄. тато пурисо кусаггена удакам̣ уддхареййа. там̣ ким̣ ман̃н̃атха, бхиккхаве, катамам̣ ну кхо бахутарам̣ – йам̣ ва̄ кусаггена уббхатам̣, йам̣ ва̄ поккхаран̣ийа̄ удака’’нти? ‘‘етадева, бханте, бахутарам̣, йадидам̣ – поккхаран̣ийа̄ удакам̣; аппаматтакам̣ кусаггена удакам̣ уббхатам̣. сан̇кхампи на упети, упанидхампи на упети, калабха̄гампи на упети поккхаран̣ийа̄ удакам̣ упанидха̄йа кусаггена удакам̣ уббхата’’нти. ‘‘евамева кхо, бхиккхаве, арийаса̄вакасса…пе… його каран̣ӣйо’’ти. дутийам̣.

3. пат̣хамасам̣бхеджджасуттам̣

1123. ‘‘сеййатха̄пи, бхиккхаве, йаттхима̄ маха̄надийо сам̣санданти саменти, сеййатхидам̣ – ган̇га̄, йамуна̄, ачираватӣ, сарабхӯ, махӣ, тато пурисо две ва̄ тӣн̣и ва̄ удакапхусита̄ни уддхареййа. там̣ ким̣ ман̃н̃атха, бхиккхаве катамам̣ ну кхо бахутарам̣ – йа̄ни две ва̄ тӣн̣и ва̄ удакапхусита̄ни уббхата̄ни, йам̣ ва̄ сам̣бхеджджаудака’’нти? ‘‘етадева, бханте, бахутарам̣, йадидам̣ – сам̣бхеджджаудакам̣; аппаматтака̄ни две ва̄ тӣн̣и ва̄ удакапхусита̄ни уббхата̄ни. сан̇кхампи на упенти, упанидхампи на упенти, калабха̄гампи на упенти сам̣бхеджджаудакам̣ упанидха̄йа две ва̄ тӣн̣и ва̄ удакапхусита̄ни уббхата̄нӣ’’ти. ‘‘евамева кхо, бхиккхаве, арийаса̄вакасса…пе… його каран̣ӣйо’’ти. татийам̣.

4. дутийасам̣бхеджджасуттам̣

1124. ‘‘сеййатха̄пи, бхиккхаве, йаттхима̄ маха̄надийо сам̣санданти саменти, сеййатхидам̣ – ган̇га̄, йамуна̄, ачираватӣ, сарабхӯ, махӣ, там̣ удакам̣ париккхайам̣ парийа̄да̄нам̣ гаччхеййа, т̣хапетва̄ две ва̄ тӣн̣и ва̄ удакапхусита̄ни. там̣ ким̣ ман̃н̃атха, бхиккхаве, катамам̣ ну кхо бахутарам̣ – йам̣ ва̄ сам̣бхеджджаудакам̣ париккхӣн̣ам̣ парийа̄диннам̣, йа̄ни две ва̄ тӣн̣и ва̄ удакапхусита̄ни авасит̣т̣ха̄нӣ’’ти? ‘‘етадева, бханте, бахутарам̣ сам̣бхеджджаудакам̣ йадидам̣ париккхӣн̣ам̣ парийа̄диннам̣; аппаматтака̄ни две ва̄ тӣн̣и ва̄ удакапхусита̄ни авасит̣т̣ха̄ни. сан̇кхампи на упенти, упанидхампи на упенти, калабха̄гампи на упенти сам̣бхеджджаудакам̣ париккхӣн̣ам̣ парийа̄диннам̣ упанидха̄йа две ва̄ тӣн̣и ва̄ удакапхусита̄ни авасит̣т̣ха̄нӣ’’ти. ‘‘евамева кхо, бхиккхаве, арийаса̄вакасса…пе… його каран̣ӣйо’’ти. чатуттхам̣.

5. пат̣хамамаха̄патхавӣсуттам̣

1125. ‘‘сеййатха̄пи, бхиккхаве, пурисо маха̄патхавийа̄ сатта колат̣т̣химаттийо гул̣ика̄ упаниккхипеййа. там̣ ким̣ ман̃н̃атха, бхиккхаве, катамам̣ ну кхо бахутарам̣ – йа̄ ва̄ сатта колат̣т̣химаттийо гул̣ика̄ упаниккхитта̄, айам̣ ва̄ маха̄патхавӣ’’ти? ‘‘етадева, бханте, бахутарам̣, йадидам̣ – маха̄патхавӣ; аппаматтика̄ сатта колат̣т̣химаттийо гул̣ика̄ упаниккхитта̄. сан̇кхампи на упенти, упанидхампи на упенти, калабха̄гампи на упенти маха̄патхавим̣ упанидха̄йа сатта колат̣т̣химаттийо гул̣ика̄ упаниккхитта̄’’ти. ‘‘евамева кхо, бхиккхаве, арийаса̄вакасса…пе… його каран̣ӣйо’’ти. пан̃чамам̣.

6. дутийамаха̄патхавӣсуттам̣

1126. ‘‘сеййатха̄пи, бхиккхаве, маха̄патхавӣ париккхайам̣ парийа̄да̄нам̣ гаччхеййа т̣хапетва̄ сатта колат̣т̣химаттийо гул̣ика̄. там̣ ким̣ ман̃н̃атха, бхиккхаве, катамам̣ ну кхо бахутарам̣ – йам̣ ва̄ маха̄патхавийа̄ париккхӣн̣ам̣ парийа̄диннам̣, йа̄ ва̄ сатта колат̣т̣химаттийо гул̣ика̄ авасит̣т̣ха̄’’ти? ‘‘етадева, бханте, бахутарам̣ маха̄патхавийа̄ йадидам̣ париккхӣн̣ам̣ парийа̄диннам̣; аппаматтика̄ сатта колат̣т̣химаттийо гул̣ика̄ авасит̣т̣ха̄. сан̇кхампи на упенти, упанидхампи на упенти, калабха̄гампи на упенти маха̄патхавийа̄ париккхӣн̣ам̣ парийа̄диннам̣ упанидха̄йа сатта колат̣т̣химаттийо гул̣ика̄ авасит̣т̣ха̄’’ти. ‘‘евамева кхо, бхиккхаве, арийаса̄вакасса…пе… його каран̣ӣйо’’ти. чхат̣т̣хам̣.

7. пат̣хамамаха̄самуддасуттам̣

1127. ‘‘сеййатха̄пи, бхиккхаве, пурисо маха̄самуддато две ва̄ тӣн̣и ва̄ удакапхусита̄ни уддхареййа. там̣ ким̣ ман̃н̃атха, бхиккхаве, катамам̣ ну кхо бахутарам̣ – йа̄ни две ва̄ тӣн̣и ва̄ удакапхусита̄ни уббхата̄ни, йам̣ ва̄ маха̄самудде удака’’нти? ‘‘етадева, бханте, бахутарам̣, йадидам̣ – маха̄самудде удакам̣; аппаматтака̄ни две ва̄ тӣн̣и ва̄ удакапхусита̄ни уббхата̄ни. сан̇кхампи на упенти, упанидхампи на упенти, калабха̄гампи на упенти маха̄самудде удакам̣ упанидха̄йа две ва̄ тӣн̣и ва̄ удакапхусита̄ни уббхата̄нӣ’’ти. ‘‘евамева кхо, бхиккхаве, арийаса̄вакасса…пе… його каран̣ӣйо’’ти. саттамам̣.

8. дутийамаха̄самуддасуттам̣

1128. ‘‘сеййатха̄пи, бхиккхаве, маха̄самудде удакам̣ париккхайам̣ [маха̄самуддо париккхайам̣ (сӣ. сйа̄. кам̣.) сам̣. ни. 2.81] парийа̄да̄нам̣ гаччхеййа т̣хапетва̄ две ва̄ тӣн̣и ва̄ удакапхусита̄ни. там̣ ким̣ ман̃н̃атха, бхиккхаве, катамам̣ ну кхо бахутарам̣ – йам̣ ва̄ маха̄самудде удакам̣ париккхӣн̣ам̣ парийа̄диннам̣, йа̄ни две ва̄ тӣн̣и ва̄ удакапхусита̄ни авасит̣т̣ха̄нӣ’’ти? ‘‘етадева, бханте, бахутарам̣ маха̄самудде удакам̣ йадидам̣ париккхӣн̣ам̣ парийа̄диннам̣; аппаматтака̄ни две ва̄ тӣн̣и ва̄ удакапхусита̄ни авасит̣т̣ха̄ни. сан̇кхампи на упенти, упанидхампи на упенти, калабха̄гампи на упенти маха̄самудде удакам̣ париккхӣн̣ам̣ парийа̄диннам̣ упанидха̄йа две ва̄ тӣн̣и ва̄ удакапхусита̄ни авасит̣т̣ха̄нӣ’’ти. ‘‘евамева кхо, бхиккхаве, арийаса̄вакасса…пе… його каран̣ӣйо’’ти. ат̣т̣хамам̣.

9. пат̣хамапаббатӯпамасуттам̣

1129. ‘‘сеййатха̄пи, бхиккхаве, пурисо химавато паббатара̄джасса сатта са̄сапаматтийо па̄са̄н̣асаккхара̄ упаниккхипеййа. там̣ ким̣ ман̃н̃атха, бхиккхаве, катамам̣ ну кхо бахутарам̣ – йа̄ ва̄ сатта са̄сапаматтийо па̄са̄н̣асаккхара̄ упаниккхитта̄, айам̣ ва̄ химава̄ паббатара̄джа̄’’ти? ‘‘етадева, бханте, бахутарам̣, йадидам̣ – химава̄ паббатара̄джа̄; аппаматтика̄ сатта са̄сапаматтийо па̄са̄н̣асаккхара̄ упаниккхитта̄. сан̇кхампи на упенти, упанидхампи на упенти, калабха̄гампи на упенти химавантам̣ паббатара̄джа̄нам̣ упанидха̄йа сатта са̄сапаматтийо па̄са̄н̣асаккхара̄ упаниккхитта̄’’ти. ‘‘евамева кхо, бхиккхаве, арийаса̄вакасса…пе… його каран̣ӣйо’’ти. навамам̣.

10. дутийапаббатӯпамасуттам̣

1130. ‘‘сеййатха̄пи, бхиккхаве, химава̄ паббатара̄джа̄ париккхайам̣ парийа̄да̄нам̣ гаччхеййа, т̣хапетва̄ сатта са̄сапаматтийо па̄са̄н̣асаккхара̄. там̣ ким̣ ман̃н̃атха, бхиккхаве, катамам̣ ну кхо бахутарам̣ – йам̣ ва̄ химавато паббатара̄джасса париккхӣн̣ам̣ парийа̄диннам̣, йа̄ ва̄ сатта са̄сапаматтийо па̄са̄н̣асаккхара̄ авасит̣т̣ха̄’’ти? ‘‘етадева, бханте, бахутарам̣ химавато паббатара̄джасса йадидам̣ париккхӣн̣ам̣ парийа̄диннам̣; аппаматтика̄ сатта са̄сапаматтийо па̄са̄н̣асаккхара̄ авасит̣т̣ха̄. сан̇кхампи на упенти, упанидхампи на упенти, калабха̄гампи на упенти химавато паббатара̄джасса париккхӣн̣ам̣ парийа̄диннам̣ упанидха̄йа сатта са̄сапаматтийо па̄са̄н̣асаккхара̄ авасит̣т̣ха̄’’ти. ‘‘евамева кхо, бхиккхаве, арийаса̄вакасса дит̣т̣хисампаннасса пуггаласса абхисамета̄вино етадева бахутарам̣ дуккхам̣ йадидам̣ париккхӣн̣ам̣ парийа̄диннам̣; аппаматтакам̣ авасит̣т̣хам̣. сан̇кхампи на упети, упанидхампи на упети, калабха̄гампи на упети пуримам̣ дуккхаккхандхам̣ париккхӣн̣ам̣ парийа̄диннам̣ упанидха̄йа йадидам̣ саттаккхаттупарамата̄; йо ‘идам̣ дуккха’нти йатха̄бхӯтам̣ паджа̄на̄ти…пе… ‘айам̣ дуккханиродхага̄минӣ пат̣ипада̄’ти йатха̄бхӯтам̣ паджа̄на̄ти’’.

‘‘тасма̄тиха, бхиккхаве, ‘идам̣ дуккха’нти його каран̣ӣйо…пе… ‘айам̣ дуккханиродхага̄минӣ пат̣ипада̄’ти його каран̣ӣйо’’ти. дасамам̣.

абхисамайавагго чхат̣т̣хо.

тассудда̄нам̣ –

накхасикха̄ поккхаран̣ӣ, сам̣бхеджджа апаре дуве;

патхавӣ две самудда̄ две, двема̄ ча паббатӯпама̄ти.