6. дутийадха̄ран̣асуттам̣

1086. ‘‘дха̄ретха но тумхе, бхиккхаве, майа̄ чатта̄ри арийасачча̄ни десита̄нӣ’’ти? евам̣ вутте ан̃н̃атаро бхиккху бхагавантам̣ етадавоча – ‘‘ахам̣ кхо, бханте, дха̄реми бхагавата̄ чатта̄ри арийасачча̄ни десита̄нӣ’’ти.

‘‘йатха̄ катхам̣ пана твам̣, бхиккху, дха̄реси майа̄ чатта̄ри арийасачча̄ни десита̄нӣ’’ти? ‘‘дуккхам̣ кхва̄хам̣, бханте, бхагавата̄ пат̣хамам̣ арийасаччам̣ деситам̣ дха̄реми. йо хи кочи, бханте, саман̣о ва̄ бра̄хман̣о ва̄ евам̣ вадеййа – ‘нетам̣ дуккхам̣ пат̣хамам̣ арийасаччам̣ йам̣ саман̣ена готамена деситам̣. ахаметам̣ дуккхам̣ пат̣хамам̣ арийасаччам̣ паччаккха̄йа ан̃н̃ам̣ дуккхам̣ пат̣хамам̣ арийасаччам̣ пан̃н̃апесса̄мӣ’ти – нетам̣ т̣ха̄нам̣ виджджати. дуккхасамудайам̣ кхва̄хам̣, бханте, бхагавата̄…пе… дуккханиродхага̄миним̣ пат̣ипадам̣ кхва̄хам̣, бханте, бхагавата̄ чатуттхам̣ арийасаччам̣ деситам̣ дха̄реми. йо хи кочи, бханте, саман̣о ва̄ бра̄хман̣о ва̄ евам̣ вадеййа – ‘нетам̣ дуккханиродхага̄минӣ пат̣ипада̄ чатуттхам̣ арийасаччам̣ йам̣ саман̣ена готамена деситам̣. ахаметам̣ дуккханиродхага̄миним̣ пат̣ипадам̣ чатуттхам̣ арийасаччам̣ паччаккха̄йа ан̃н̃ам̣ дуккханиродхага̄миним̣ пат̣ипадам̣ чатуттхам̣ арийасаччам̣ пан̃н̃апесса̄мӣ’ти – нетам̣ т̣ха̄нам̣ виджджати. евам̣ кхва̄хам̣, бханте, дха̄реми бхагавата̄ чатта̄ри арийасачча̄ни десита̄нӣ’’ти.

‘‘са̄дху са̄дху, бхиккху! са̄дху кхо твам̣, бхиккху, дха̄реси майа̄ чатта̄ри арийасачча̄ни десита̄нӣти. дуккхам̣ кхо, бхиккху, майа̄ пат̣хамам̣ арийасаччам̣ деситам̣, татха̄ нам̣ дха̄рехи. йо хи кочи, бхиккху, саман̣о ва̄ бра̄хман̣о ва̄ евам̣ вадеййа – ‘нетам̣ дуккхам̣ пат̣хамам̣ арийасаччам̣ йам̣ саман̣ена готамена деситам̣. ахаметам̣ дуккхам̣ пат̣хамам̣ арийасаччам̣ паччаккха̄йа ан̃н̃ам̣ дуккхам̣ пат̣хамам̣ арийасаччам̣ пан̃н̃апесса̄мӣ’ти – нетам̣ т̣ха̄нам̣ виджджати. дуккхасамудайам̣ кхо, бхиккху…пе… дуккханиродхам̣ кхо, бхиккху…пе… дуккханиродхага̄минӣ пат̣ипада̄ кхо, бхиккху, майа̄ чатуттхам̣ арийасаччам̣ деситам̣, татха̄ нам̣ дха̄рехи. йо хи кочи, бхиккху, саман̣о ва̄ бра̄хман̣о ва̄ евам̣ вадеййа – ‘нетам̣ дуккханиродхага̄минӣ пат̣ипада̄ чатуттхам̣ арийасаччам̣ йам̣ саман̣ена готамена деситам̣. ахаметам̣ дуккханиродхага̄миним̣ пат̣ипадам̣ чатуттхам̣ арийасаччам̣ паччаккха̄йа ан̃н̃ам̣ дуккханиродхага̄миним̣ пат̣ипадам̣ чатуттхам̣ арийасаччам̣ пан̃н̃апесса̄мӣ’ти – нетам̣ т̣ха̄нам̣ виджджати. евам̣ кхо твам̣, бхиккху, дха̄рехи майа̄ чатта̄ри арийасачча̄ни десита̄нӣти.

‘‘тасма̄тиха, бхиккху, ‘идам̣ дуккха’нти його каран̣ӣйо…пе… ‘айам̣ дуккханиродхага̄минӣ пат̣ипада̄’ти його каран̣ӣйо’’ти. чхат̣т̣хам̣.