9. веса̄лӣсуттам̣

985. евам̣ ме сутам̣ – екам̣ самайам̣ бхагава̄ веса̄лийам̣ вихарати маха̄ване кӯт̣а̄га̄раса̄ла̄йам̣. тена кхо пана самайена бхагава̄ бхиккхӯнам̣ анекапарийа̄йена асубхакатхам̣ катхети, асубха̄йа ван̣н̣ам̣ бха̄сати, асубхабха̄вана̄йа ван̣н̣ам̣ бха̄сати.

атха кхо бхагава̄ бхиккхӯ а̄мантеси – ‘‘иччха̄махам̣, бхиккхаве, ад̣д̣хама̄сам̣ пат̣исаллӣйитум̣. на̄мхи кеначи упасан̇камитаббо, ан̃н̃атра екена пин̣д̣апа̄танӣха̄ракена̄’’ти. ‘‘евам̣, бханте’’ти кхо те бхиккхӯ бхагавато пат̣иссутва̄ на̄ссудха кочи бхагавантам̣ упасан̇камати, ан̃н̃атра екена пин̣д̣апа̄танӣха̄ракена.

атха кхо те бхиккхӯ – ‘‘бхагава̄ анекапарийа̄йена асубхакатхам̣ катхети, асубха̄йа ван̣н̣ам̣ бха̄сати, асубхабха̄вана̄йа ван̣н̣ам̣ бха̄сатӣ’’ти анека̄ка̄равока̄рам̣ асубхабха̄вана̄нуйогамануйутта̄ вихаранти. те имина̄ ка̄йена ат̣т̣ӣйама̄на̄ [ат̣т̣ийама̄на̄ (сӣ. сйа̄. кам̣. пӣ. ка.)] хара̄йама̄на̄ джигуччхама̄на̄ саттхаха̄ракам̣ парийесанти. дасапи бхиккхӯ ека̄хена саттхам̣ а̄харанти, вӣсампи…пе… тим̣сампи бхиккхӯ ека̄хена саттхам̣ а̄харанти.

атха кхо бхагава̄ тасса ад̣д̣хама̄сасса аччайена пат̣исалла̄на̄ вут̣т̣хито а̄йасмантам̣ а̄нандам̣ а̄мантеси – ‘‘ким̣ ну кхо, а̄нанда, танубхӯто вийа бхиккхусан̇гхо’’ти? ‘‘татха̄ хи пана, бханте, ‘бхагава̄ бхиккхӯнам̣ анекапарийа̄йена асубхакатхам̣ катхети, асубха̄йа ван̣н̣ам̣ бха̄сати, асубхабха̄вана̄йа ван̣н̣ам̣ бха̄сатӣ’ти анека̄ка̄равока̄рам̣ асубхабха̄вана̄нуйогамануйутта̄ вихаранти. те имина̄ ка̄йена ат̣т̣ӣйама̄на̄ хара̄йама̄на̄ джигуччхама̄на̄ саттхаха̄ракам̣ парийесанти. дасапи бхиккхӯ ека̄хена саттхам̣ а̄харанти, вӣсампи бхиккхӯ… тим̣сампи бхиккхӯ ека̄хена саттхам̣ а̄харанти. са̄дху, бханте, бхагава̄ ан̃н̃ам̣ парийа̄йам̣ а̄чиккхату йатха̄йам̣ бхиккхусан̇гхо ан̃н̃а̄йа сан̣т̣хахеййа̄’’ти.

‘‘тенаха̄нанда, йа̄ватика̄ бхиккхӯ веса̄лим̣ упанисса̄йа вихаранти те саббе упат̣т̣ха̄наса̄ла̄йам̣ саннипа̄техӣ’’ти. ‘‘евам̣, бханте’’ти кхо а̄йасма̄ а̄нандо бхагавато пат̣иссутва̄ йа̄ватика̄ бхиккхӯ веса̄лим̣ упанисса̄йа вихаранти те саббе упат̣т̣ха̄наса̄ла̄йам̣ саннипа̄тетва̄ йена бхагава̄ тенупасан̇ками; упасан̇камитва̄ бхагавантам̣ етадавоча – ‘‘саннипатито [саннипа̄тито (сӣ.)], бханте, бхиккхусан̇гхо. йасса да̄ни, бханте, бхагава̄ ка̄лам̣ ман̃н̃атӣ’’ти.

атха кхо бхагава̄ йена упат̣т̣ха̄наса̄ла̄ тенупасан̇ками; упасан̇камитва̄ пан̃н̃атте а̄сане нисӣди. нисаджджа кхо бхагава̄ бхиккхӯ а̄мантеси – ‘‘айампи кхо, бхиккхаве, а̄на̄па̄нассатисама̄дхи бха̄вито бахулӣкато санто чева пан̣ӣто ча асечанако ча сукхо ча виха̄ро уппаннуппанне ча па̄паке акусале дхамме т̣ха̄насо антарадха̄пети вӯпасамети’’.

‘‘сеййатха̄пи, бхиккхаве, гимха̄нам̣ паччхиме ма̄се ӯхатам̣ раджоджаллам̣, таменам̣ маха̄ака̄ламегхо т̣ха̄насо антарадха̄пети вӯпасамети; евамева кхо, бхиккхаве, а̄на̄па̄нассатисама̄дхи бха̄вито бахулӣкато санто чева пан̣ӣто ча асечанако ча сукхо ча виха̄ро уппаннуппанне ча па̄паке акусале дхамме т̣ха̄насо антарадха̄пети вӯпасамети. катхам̣ бха̄вито ча, бхиккхаве, а̄на̄па̄нассатисама̄дхи катхам̣ бахулӣкато санто чева пан̣ӣто ча асечанако ча сукхо ча виха̄ро уппаннуппанне ча па̄паке акусале дхамме т̣ха̄насо антарадха̄пети вӯпасамети?

‘‘идха, бхиккхаве, бхиккху аран̃н̃агато ва̄ руккхамӯлагато ва̄ сун̃н̃а̄га̄рагато ва̄ нисӣдати паллан̇кам̣ а̄бхуджитва̄ уджум̣ ка̄йам̣ пан̣идха̄йа паримукхам̣ сатим̣ упат̣т̣хапетва̄. со сатова ассасати, сатова пассасати…пе… ‘пат̣иниссагга̄нупассӣ ассасисса̄мӣ’ти сиккхати, ‘пат̣иниссагга̄нупассӣ пассасисса̄мӣ’ти сиккхати. евам̣ бха̄вито кхо, бхиккхаве, а̄на̄па̄нассатисама̄дхи евам̣ бахулӣкато санто чева пан̣ӣто ча асечанако ча сукхо ча виха̄ро уппаннуппанне ча па̄паке акусале дхамме т̣ха̄насо антарадха̄пети вӯпасаметӣ’’ти. навамам̣.