2. боджджхан̇гасуттам̣

978. ‘‘а̄на̄па̄нассати, бхиккхаве, бха̄вита̄ бахулӣката̄ махаппхала̄ хоти маха̄нисам̣са̄. катхам̣ бха̄вита̄ ча, бхиккхаве, а̄на̄па̄нассати катхам̣ бахулӣката̄ махаппхала̄ хоти маха̄нисам̣са̄? идха, бхиккхаве, бхиккху а̄на̄па̄нассатисахагатам̣ сатисамбоджджхан̇гам̣ бха̄вети вивеканисситам̣ вира̄ганисситам̣ ниродханисситам̣ воссаггапарин̣а̄мим̣, а̄на̄па̄нассатисахагатам̣ дхаммавичайасамбоджджхан̇гам̣ бха̄вети…пе… а̄на̄па̄нассатисахагатам̣ упеккха̄самбоджджхан̇гам̣ бха̄вети вивеканисситам̣ вира̄ганисситам̣ ниродханисситам̣ воссаггапарин̣а̄мим̣. евам̣ бха̄вита̄ кхо, бхиккхаве, а̄на̄па̄нассати евам̣ бахулӣката̄ махаппхала̄ хоти маха̄нисам̣са̄’’ти. дутийам̣.