3. миччхаттавагго

1. миччхаттасуттам̣

21. са̄ваттхинида̄нам̣. ‘‘миччхаттан̃ча во, бхиккхаве, десесса̄ми, самматтан̃ча. там̣ сун̣а̄тха. катаман̃ча, бхиккхаве, миччхаттам̣? сеййатхидам̣ – миччха̄дит̣т̣хи…пе… миччха̄сама̄дхи. идам̣ вуччати, бхиккхаве, миччхаттам̣. катаман̃ча, бхиккхаве, самматтам̣? сеййатхидам̣ – самма̄дит̣т̣хи…пе… самма̄сама̄дхи. идам̣ вуччати, бхиккхаве, самматта’’нти. пат̣хамам̣.

2. акусаладхаммасуттам̣

22. са̄ваттхинида̄нам̣. ‘‘акусале ча кхо, бхиккхаве, дхамме десесса̄ми, кусале ча дхамме. там̣ сун̣а̄тха. катаме ча, бхиккхаве, акусала̄ дхамма̄? сеййатхидам̣ – миччха̄дит̣т̣хи…пе… миччха̄сама̄дхи. име вуччанти, бхиккхаве, акусала̄ дхамма̄. катаме ча, бхиккхаве, кусала̄ дхамма̄? сеййатхидам̣ – самма̄дит̣т̣хи…пе… самма̄сама̄дхи. име вуччанти, бхиккхаве, кусала̄ дхамма̄’’ти. дутийам̣.

3. пат̣хамапат̣ипада̄суттам̣

23. са̄ваттхинида̄нам̣. ‘‘миччха̄пат̣ипадан̃ча во, бхиккхаве, десесса̄ми, самма̄пат̣ипадан̃ча. там̣ сун̣а̄тха. катама̄ ча, бхиккхаве, миччха̄пат̣ипада̄? сеййатхидам̣ – миччха̄дит̣т̣хи…пе… миччха̄сама̄дхи. айам̣ вуччати, бхиккхаве, миччха̄пат̣ипада̄. катама̄ ча, бхиккхаве, самма̄пат̣ипада̄? сеййатхидам̣ – самма̄дит̣т̣хи…пе… самма̄сама̄дхи. айам̣ вуччати, бхиккхаве, самма̄пат̣ипада̄’’ти. татийам̣.

4. дутийапат̣ипада̄суттам̣

24. са̄ваттхинида̄нам̣. ‘‘гихино ва̄хам̣, бхиккхаве, паббаджитасса ва̄ миччха̄пат̣ипадам̣ на ван̣н̣еми. гихи ва̄, бхиккхаве, паббаджито ва̄ миччха̄пат̣ипанно миччха̄пат̣ипатта̄дхикаран̣ахету на̄ра̄дхако хоти н̃а̄йам̣ дхаммам̣ кусалам̣’’.

‘‘катама̄ ча, бхиккхаве, миччха̄пат̣ипада̄? сеййатхидам̣ – миччха̄дит̣т̣хи…пе… миччха̄сама̄дхи. айам̣ вуччати, бхиккхаве, миччха̄пат̣ипада̄. гихино ва̄хам̣, бхиккхаве, паббаджитасса ва̄ миччха̄пат̣ипадам̣ на ван̣н̣еми. гихи ва̄, бхиккхаве, паббаджито ва̄ миччха̄пат̣ипанно миччха̄пат̣ипатта̄дхикаран̣ахету на̄ра̄дхако хоти н̃а̄йам̣ дхаммам̣ кусалам̣.

‘‘гихино ва̄хам̣, бхиккхаве, паббаджитасса ва̄ самма̄пат̣ипадам̣ ван̣н̣еми. гихи ва̄, бхиккхаве, паббаджито ва̄ самма̄пат̣ипанно самма̄пат̣ипатта̄дхикаран̣ахету а̄ра̄дхако хоти н̃а̄йам̣ дхаммам̣ кусалам̣. катама̄ ча, бхиккхаве, самма̄пат̣ипада̄? сеййатхидам̣ – самма̄дит̣т̣хи…пе… самма̄сама̄дхи. айам̣ вуччати, бхиккхаве, самма̄пат̣ипада̄. гихино ва̄хам̣, бхиккхаве, паббаджитасса ва̄ самма̄пат̣ипадам̣ ван̣н̣еми. гихи ва̄, бхиккхаве, паббаджито ва̄ самма̄пат̣ипанно самма̄пат̣ипатта̄дхикаран̣ахету а̄ра̄дхако хоти н̃а̄йам̣ дхаммам̣ кусала’’нти. чатуттхам̣.

5. пат̣хамаасаппурисасуттам̣

25. са̄ваттхинида̄нам̣. ‘‘асаппурисан̃ча во, бхиккхаве, десесса̄ми, саппурисан̃ча. там̣ сун̣а̄тха. катамо ча, бхиккхаве, асаппурисо? идха, бхиккхаве, екаччо миччха̄дит̣т̣хико хоти, миччха̄сан̇каппо, миччха̄ва̄чо, миччха̄камманто, миччха̄а̄джӣво, миччха̄ва̄йа̄мо, миччха̄сати, миччха̄сама̄дхи – айам̣ вуччати, бхиккхаве, асаппурисо’’.

‘‘катамо ча, бхиккхаве, саппурисо? идха, бхиккхаве, екаччо самма̄дит̣т̣хико хоти, самма̄сан̇каппо, самма̄ва̄чо, самма̄камманто, самма̄а̄джӣво, самма̄ва̄йа̄мо, самма̄сати, самма̄сама̄дхи – айам̣ вуччати, бхиккхаве, саппурисо’’ти. пан̃чамам̣.

6. дутийаасаппурисасуттам̣

26. са̄ваттхинида̄нам̣. ‘‘асаппурисан̃ча во, бхиккхаве, десесса̄ми, асаппурисена асаппурисатаран̃ча. саппурисан̃ча во, бхиккхаве, десесса̄ми саппурисена саппурисатаран̃ча. там̣ сун̣а̄тха. катамо ча, бхиккхаве, асаппурисо? идха, бхиккхаве, екаччо миччха̄дит̣т̣хико хоти…пе… миччха̄сама̄дхи – айам̣ вуччати, бхиккхаве, асаппурисо’’.

‘‘катамо ча, бхиккхаве, асаппурисена асаппурисатаро? идха, бхиккхаве, екаччо миччха̄дит̣т̣хико хоти…пе… миччха̄сама̄дхи, миччха̄н̃а̄н̣ӣ, миччха̄вимутти – айам̣ вуччати, бхиккхаве, асаппурисена асаппурисатаро.

‘‘катамо ча, бхиккхаве, саппурисо? идха, бхиккхаве, екаччо самма̄дит̣т̣хико хоти…пе… самма̄сама̄дхи – айам̣ вуччати, бхиккхаве, саппурисо.

‘‘катамо ча, бхиккхаве, саппурисена саппурисатаро? идха, бхиккхаве, екаччо самма̄дит̣т̣хико хоти…пе… самма̄сама̄дхи, самма̄н̃а̄н̣ӣ, самма̄вимутти – айам̣ вуччати, бхиккхаве, саппурисена саппурисатаро’’ти. чхат̣т̣хам̣.

7. кумбхасуттам̣

27. са̄ваттхинида̄нам̣. ‘‘сеййатха̄пи, бхиккхаве, кумбхо ана̄дха̄ро суппаваттийо хоти, са̄дха̄ро дуппаваттийо хоти; евамева кхо, бхиккхаве, читтам̣ ана̄дха̄рам̣ суппаваттийам̣ хоти, са̄дха̄рам̣ дуппаваттийам̣ хоти. ко ча, бхиккхаве, читтасса а̄дха̄ро? айамева арийо ат̣т̣хан̇гико магго, сеййатхидам̣ – самма̄дит̣т̣хи…пе… самма̄сама̄дхи. айам̣ читтасса а̄дха̄ро. сеййатха̄пи, бхиккхаве, кумбхо ана̄дха̄ро суппаваттийо хоти, са̄дха̄ро дуппаваттийо хоти; евамева кхо, бхиккхаве, читтам̣ ана̄дха̄рам̣ суппаваттийам̣ хоти, са̄дха̄рам̣ дуппаваттийам̣ хотӣ’’ти. саттамам̣.

8. сама̄дхисуттам̣

28. са̄ваттхинида̄нам̣. ‘‘арийам̣ во, бхиккхаве, самма̄сама̄дхим̣ десесса̄ми саупанисам̣ сапариккха̄рам̣. там̣ сун̣а̄тха. катамо ча, бхиккхаве, арийо самма̄сама̄дхи саупанисо сапариккха̄ро? сеййатхидам̣ – самма̄дит̣т̣хи…пе… самма̄сати [самма̄сама̄дхи (сӣ. сйа̄. кам̣. ка.)]. йа̄ кхо, бхиккхаве, имехи саттахан̇гехи читтасса екаггата̄ сапариккха̄рата̄ [сапариккхата̄ (сӣ. пӣ.)] – айам̣ вуччати, бхиккхаве, арийо самма̄сама̄дхи саупанисо итипи сапариккха̄ро итипӣ’’ти. ат̣т̣хамам̣.

9. ведана̄суттам̣

29. са̄ваттхинида̄нам̣. ‘‘тиссо има̄, бхиккхаве, ведана̄. катама̄ тиссо? сукха̄ ведана̄, дуккха̄ ведана̄, адуккхамасукха̄ ведана̄ – има̄ кхо, бхиккхаве, тиссо ведана̄. има̄сам̣ кхо, бхиккхаве, тиссаннам̣ ведана̄нам̣ парин̃н̃а̄йа арийо ат̣т̣хан̇гико магго бха̄ветаббо. катамо арийо ат̣т̣хан̇гико магго? сеййатхидам̣ – самма̄дит̣т̣хи…пе… самма̄сама̄дхи. има̄сам̣ кхо, бхиккхаве, тиссаннам̣ ведана̄нам̣ парин̃н̃а̄йа арийо ат̣т̣хан̇гико магго бха̄ветаббо’’ти. навамам̣.

10. уттийасуттам̣

30. са̄ваттхинида̄нам̣. атха кхо а̄йасма̄ уттийо йена бхагава̄ тенупасан̇ками…пе… екамантам̣ нисинно кхо а̄йасма̄ уттийо бхагавантам̣ етадавоча – ‘‘идха майхам̣, бханте, рахогатасса пат̣исаллӣнасса евам̣ четасо паривитакко удапа̄ди – ‘пан̃ча ка̄магун̣а̄ вутта̄ бхагавата̄. катаме ну кхо пан̃ча ка̄магун̣а̄ вутта̄ бхагавата̄’’’ти? ‘‘са̄дху са̄дху, уттийа! пан̃чиме кхо, уттийа, ка̄магун̣а̄ вутта̄ майа̄. катаме пан̃ча? чаккхувин̃н̃еййа̄ рӯпа̄ ит̣т̣ха̄ канта̄ мана̄па̄ пийарӯпа̄ ка̄мӯпасам̣хита̄ раджанӣйа̄, сотавин̃н̃еййа̄ садда̄…пе… гха̄навин̃н̃еййа̄ гандха̄… дживха̄вин̃н̃еййа̄ раса̄… ка̄йавин̃н̃еййа̄ пхот̣т̣хабба̄ ит̣т̣ха̄ канта̄ мана̄па̄ пийарӯпа̄ ка̄мӯпасам̣хита̄ раджанӣйа̄ – име кхо, уттийа, пан̃ча ка̄магун̣а̄ вутта̄ майа̄. имесам̣ кхо, уттийа, пан̃чаннам̣ ка̄магун̣а̄нам̣ паха̄на̄йа арийо ат̣т̣хан̇гико магго бха̄ветаббо. катамо арийо ат̣т̣хан̇гико магго? сеййатхидам̣ – самма̄дит̣т̣хи…пе… самма̄сама̄дхи. имесам̣ кхо, уттийа, пан̃чаннам̣ ка̄магун̣а̄нам̣ паха̄на̄йа айам̣ арийо ат̣т̣хан̇гико магго бха̄ветаббо’’ти. дасамам̣.

миччхаттавагго татийо.

тассудда̄нам̣ –

миччхаттам̣ акусалам̣ дхаммам̣, дуве пат̣ипада̄пи ча;

асаппурисена две кумбхо, сама̄дхи ведануттийена̄ти.