8. пат̣хамакуккут̣а̄ра̄масуттам̣

18. евам̣ ме сутам̣ – екам̣ самайам̣ а̄йасма̄ ча а̄нандо а̄йасма̄ ча бхаддо па̄т̣алипутте вихаранти куккут̣а̄ра̄ме. атха кхо а̄йасма̄ бхаддо са̄йанхасамайам̣ пат̣исалла̄на̄ вут̣т̣хито йена̄йасма̄ а̄нандо тенупасан̇ками; упасан̇камитва̄ а̄йасмата̄ а̄нандена саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо а̄йасма̄ бхаддо а̄йасмантам̣ а̄нандам̣ етадавоча –

‘‘‘абрахмачарийам̣, абрахмачарийа’нти, а̄вусо а̄нанда, вуччати. катамам̣ ну кхо, а̄вусо, абрахмачарийа’’нти? ‘‘са̄дху са̄дху, а̄вусо бхадда! бхаддако кхо те, а̄вусо бхадда, умман̇го, бхаддакам̣ пат̣ибха̄нам̣, калйа̄н̣ӣ парипуччха̄. еван̃хи твам̣, а̄вусо бхадда, пуччхаси – ‘абрахмачарийам̣, абрахмачарийанти, а̄вусо а̄нанда, вуччати. катамам̣ ну кхо, а̄вусо, абрахмачарийа’’’нти? ‘‘евама̄вусо’’ти. ‘‘айамева кхо, а̄вусо, ат̣т̣хан̇гико миччха̄магго абрахмачарийам̣, сеййатхидам̣ – миччха̄дит̣т̣хи…пе… миччха̄сама̄дхӣ’’ти. ат̣т̣хамам̣.