10. тан̣ха̄суттам̣

170. ‘‘тиссо има̄, бхиккхаве, тан̣ха̄. катама̄ тиссо? ка̄матан̣ха̄, бхаватан̣ха̄, вибхаватан̣ха̄ – има̄ кхо, бхиккхаве, тиссо тан̣ха̄. има̄сам̣ кхо, бхиккхаве, тиссаннам̣ тан̣ха̄нам̣ абхин̃н̃а̄йа парин̃н̃а̄йа париккхайа̄йа паха̄на̄йа…пе… айам̣ арийо ат̣т̣хан̇гико магго бха̄ветаббо. катамо арийо ат̣т̣хан̇гико магго? идха, бхиккхаве, бхиккху самма̄дит̣т̣хим̣ бха̄вети вивеканисситам̣ вира̄ганисситам̣ ниродханисситам̣ воссаггапарин̣а̄мим̣…пе… самма̄сама̄дхим̣ бха̄вети вивеканисситам̣ вира̄ганисситам̣ ниродханисситам̣ воссаггапарин̣а̄мим̣. има̄сам̣ кхо, бхиккхаве, тиссаннам̣ тан̣ха̄нам̣ абхин̃н̃а̄йа парин̃н̃а̄йа париккхайа̄йа паха̄на̄йа…пе… айам̣ арийо ат̣т̣хан̇гико магго бха̄ветаббо’’ти. дасамам̣.