6. сӯкасуттам̣

154. ‘‘сеййатха̄пи, бхиккхаве, са̄лисӯкам̣ ва̄ йавасӯкам̣ ва̄ самма̄пан̣ихитам̣ хаттхена ва̄ па̄дена ва̄ аккантам̣ хаттхам̣ ва̄ па̄дам̣ ва̄ бхиндиссати лохитам̣ ва̄ уппа̄дессатӣти – т̣ха̄наметам̣ виджджати. там̣ кисса хету? самма̄пан̣ихитатта̄, бхиккхаве, сӯкасса. евамева кхо, бхиккхаве, бхиккху самма̄пан̣ихита̄йа дит̣т̣хийа̄ самма̄пан̣ихита̄йа маггабха̄вана̄йа авиджджам̣ бхиндиссати, виджджам̣ уппа̄дессати, нибба̄нам̣ саччхикариссатӣти – т̣ха̄наметам̣ виджджати. там̣ кисса хету? самма̄пан̣ихитатта̄, бхиккхаве, дит̣т̣хийа̄. катхан̃ча, бхиккхаве, бхиккху самма̄пан̣ихита̄йа дит̣т̣хийа̄ самма̄пан̣ихита̄йа маггабха̄вана̄йа авиджджам̣ бхиндати, виджджам̣ уппа̄дети, нибба̄нам̣ саччхикароти? идха, бхиккхаве, бхиккху самма̄дит̣т̣хим̣ бха̄вети вивеканисситам̣…пе… самма̄сама̄дхим̣ бха̄вети вивеканисситам̣ вира̄ганисситам̣ ниродханисситам̣ воссаггапарин̣а̄мим̣…пе… евам̣ кхо, бхиккхаве, бхиккху самма̄пан̣ихита̄йа дит̣т̣хийа̄ самма̄пан̣ихита̄йа маггабха̄вана̄йа авиджджам̣ бхиндати, виджджам̣ уппа̄дети, нибба̄нам̣ саччхикаротӣ’’ти. чхат̣т̣хам̣.