9. ачелакассапасуттам̣

351. тена кхо пана самайена ачело кассапо маччхика̄сан̣д̣ам̣ ануппатто хоти читтасса гахапатино пура̄н̣агихисаха̄йо. ассоси кхо читто гахапати – ‘‘ачело кира кассапо маччхика̄сан̣д̣ам̣ ануппатто амха̄кам̣ пура̄н̣агихисаха̄йо’’ти. атха кхо читто гахапати йена ачело кассапо тенупасан̇ками; упасан̇камитва̄ ачелена кассапена саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо читто гахапати ачелам̣ кассапам̣ етадавоча – ‘‘кӣвачирам̣ паббаджитасса, бханте, кассапа̄’’ти? ‘‘тим̣саматта̄ни кхо ме, гахапати, васса̄ни паббаджитасса̄’’ти. ‘‘имехи пана те, бханте, тим̣саматтехи вассехи аттхи кочи уттаримануссадхамма̄ [уттаримануссадхаммо (сйа̄. кам̣.)] аламарийан̃а̄н̣адассанависесо адхигато пха̄сувиха̄ро’’ти? ‘‘имехи кхо ме, гахапати, тим̣саматтехи вассехи паббаджитасса наттхи кочи уттаримануссадхамма̄ аламарийан̃а̄н̣адассанависесо адхигато пха̄сувиха̄ро, ан̃н̃атра наггеййа̄ ча мун̣д̣еййа̄ ча па̄вал̣аниппхот̣ана̄йа ча̄’’ти. евам̣ вутте, читто гахапати ачелам̣ кассапам̣ етадавоча – ‘‘аччхарийам̣ вата, бхо, аббхутам̣ вата, бхо! дхаммасса сва̄ккха̄тата̄ [саббаттхапи евамева диссати] йатра хи на̄ма тим̣саматтехи вассехи на кочи уттаримануссадхамма̄ аламарийан̃а̄н̣адассанависесо адхигато абхависса пха̄сувиха̄ро, ан̃н̃атра наггеййа̄ ча мун̣д̣еййа̄ ча па̄вал̣аниппхот̣ана̄йа ча̄’’ти!

‘‘туйхам̣ пана, гахапати, кӣвачирам̣ упа̄сакаттам̣ упагатасса̄’’ти? ‘‘майхампи кхо пана, бханте, тим̣саматта̄ни васса̄ни упа̄сакаттам̣ упагатасса̄’’ти. ‘‘имехи пана те, гахапати, тим̣саматтехи вассехи аттхи кочи уттаримануссадхамма̄ аламарийан̃а̄н̣адассанависесо адхигато пха̄сувиха̄ро’’ти? ‘‘гихинопи сийа̄, бханте. ахан̃хи, бханте, йа̄вадева а̄кан̇кха̄ми, вивиччева ка̄мехи вивичча акусалехи дхаммехи савитаккам̣ савича̄рам̣ вивекаджам̣ пӣтисукхам̣ пат̣хамам̣ джха̄нам̣ упасампаджджа вихара̄ми. ахан̃хи, бханте, йа̄вадева а̄кан̇кха̄ми, витаккавича̄ра̄нам̣ вӯпасама̄ …пе… дутийам̣ джха̄нам̣ упасампаджджа вихара̄ми. ахан̃хи, бханте, йа̄вадева а̄кан̇кха̄ми, пӣтийа̄ ча вира̄га̄…пе… татийам̣ джха̄нам̣ упасампаджджа вихара̄ми. ахан̃хи, бханте, йа̄вадева а̄кан̇кха̄ми, сукхасса ча паха̄на̄…пе… чатуттхам̣ джха̄нам̣ упасампаджджа вихара̄ми. саче кхо пана̄хам̣, бханте, бхагавато [бхагавата̄ (сйа̄. кам̣.)] пат̣хаматарам̣ ка̄лам̣ кареййам̣, аначчхарийам̣ кхо панетам̣ йам̣ мам̣ бхагава̄ евам̣ бйа̄кареййа – ‘наттхи там̣ сам̣йоджанам̣ йена сам̣йоджанена сам̣йутто читто гахапати пуна имам̣ локам̣ а̄гаччхеййа̄’’’ти. евам̣ вутте, ачело кассапо читтам̣ гахапатим̣ етадавоча – ‘‘аччхарийам̣ вата бхо, аббхутам̣ вата бхо! дхаммасса сва̄ккха̄тата̄, йатра хи на̄ма гихӣ ода̄тавасано [гихӣ ода̄тавасана̄ (сӣ. пӣ.)] еварӯпам̣ уттаримануссадхамма̄ аламарийан̃а̄н̣адассанависесам̣ адхигамиссати [адхигамиссанти (сӣ. пӣ.)] пха̄сувиха̄рам̣. лабхеййа̄хам̣, гахапати, имасмим̣ дхаммавинайе паббаджджам̣, лабхеййам̣ упасампада’’нти.

атха кхо читто гахапати ачелам̣ кассапам̣ а̄да̄йа йена тхера̄ бхиккхӯ тенупасан̇ками; упасан̇камитва̄ тхере бхиккхӯ етадавоча – ‘‘айам̣, бханте, ачело кассапо амха̄кам̣ пура̄н̣агихисаха̄йо. имам̣ тхера̄ пабба̄дженту упасампа̄денту. ахамасса уссуккам̣ карисса̄ми чӣварапин̣д̣апа̄тасена̄санагила̄наппаччайабхесаджджапариккха̄ра̄на’’нти. алаттха кхо ачело кассапо имасмим̣ дхаммавинайе паббаджджам̣, алаттха упасампадам̣. ачирӯпасампанно ча пана̄йасма̄ кассапо еко вӯпакат̣т̣хо аппаматто а̄та̄пӣ пахитатто вихаранто начирассева – йассаттха̄йа кулапутта̄ саммадева ага̄расма̄ анага̄рийам̣ паббаджанти, тадануттарам̣ брахмачарийапарийоса̄нам̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа виха̄си. ‘‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄’’ти аббхан̃н̃а̄си. ан̃н̃атаро ча пана̄йасма̄ кассапо арахатам̣ ахосӣти. навамам̣.