5. пат̣хамака̄мабхӯсуттам̣

347. екам̣ самайам̣ а̄йасма̄ ка̄мабхӯ маччхика̄сан̣д̣е вихарати амба̄т̣акаване. атха кхо читто гахапати йена̄йасма̄ ка̄мабхӯ тенупасан̇ками; упасан̇камитва̄ а̄йасмантам̣ ка̄мабхум̣ абхива̄детва̄ екамантам̣ нисӣди. екамантам̣ нисиннам̣ кхо читтам̣ гахапатим̣ а̄йасма̄ ка̄мабхӯ етадавоча –

‘‘вуттамидам̣, гахапати –

‘‘нелан̇го сетапаччха̄до, ека̄ро ваттатӣ ратхо;

анӣгхам̣ пасса а̄йантам̣ [аппаттам̣ (сйа̄. кам̣. ка.)], чхиннасотам̣ абандхана’’нти.

‘‘имасса ну кхо, гахапати, сам̣кхиттена бха̄ситасса катхам̣ виттха̄рена аттхо дат̣т̣хаббо’’ти? ‘‘ким̣ ну кхо етам̣, бханте, бхагавата̄ бха̄сита’’нти? ‘‘евам̣, гахапатӣ’’ти. ‘‘тена хи, бханте, мухуттам̣ а̄гамехи йа̄васса аттхам̣ пеккха̄мӣ’’ти. атха кхо читто гахапати мухуттам̣ тун̣хӣ хутва̄ а̄йасмантам̣ ка̄мабхум̣ етадавоча –

‘‘‘нелан̇га’нти кхо, бханте, сӣла̄наметам̣ адхивачанам̣. ‘сетапаччха̄до’ти кхо, бханте, вимуттийа̄ етам̣ адхивачанам̣. ‘ека̄ро’ти кхо, бханте, сатийа̄ етам̣ адхивачанам̣. ‘ваттатӣ’ти кхо, бханте, абхиккамапат̣иккамассетам̣ адхивачанам̣. ‘ратхо’ти кхо, бханте, имассетам̣ ча̄тумаха̄бхӯтикасса ка̄йасса адхивачанам̣ ма̄та̄петтикасамбхавасса оданакумма̄сӯпачайасса аниччуччха̄данапаримадданабхеданавиддхам̣санадхаммасса. ра̄го кхо, бханте, нӣгхо, досо нӣгхо, мохо нӣгхо. те кхӣн̣а̄савасса бхиккхуно пахӣна̄ уччхиннамӯла̄ та̄ла̄ваттхуката̄ анабха̄ван̇ката̄ а̄йатим̣ ануппа̄дадхамма̄. тасма̄ кхӣн̣а̄саво бхиккху ‘анӣгхо’ти вуччати. ‘а̄йанта’нти кхо, бханте, арахато етам̣ адхивачанам̣. ‘сото’ти кхо, бханте, тан̣ха̄йетам̣ адхивачанам̣. са̄ кхӣн̣а̄савасса бхиккхуно пахӣна̄ уччхиннамӯла̄ та̄ла̄ваттхуката̄ анабха̄ван̇ката̄ а̄йатим̣ ануппа̄дадхамма̄. тасма̄ кхӣн̣а̄саво бхиккху ‘чхиннасото’ти вуччати. ра̄го кхо, бханте, бандханам̣, досо бандханам̣, мохо бандханам̣. те кхӣн̣а̄савасса бхиккхуно пахӣна̄ уччхиннамӯла̄ та̄ла̄ваттхуката̄ анабха̄ван̇ката̄ а̄йатим̣ ануппа̄дадхамма̄. тасма̄ кхӣн̣а̄саво бхиккху ‘абандхано’ти вуччати. ити кхо, бханте, йам̣ там̣ бхагавата̄ вуттам̣ –

‘‘нелан̇го сетапаччха̄до, ека̄ро ваттатӣ ратхо;

анӣгхам̣ пасса а̄йантам̣, чхиннасотам̣ абандхана’’нти.

‘‘имасса кхо, бханте, бхагавата̄ сам̣кхиттена бха̄ситасса евам̣ виттха̄рена аттхам̣ а̄джа̄на̄мӣ’’ти. ‘‘ла̄бха̄ те, гахапати, суладдхам̣ те, гахапати! йасса те гамбхӣре буддхавачане пан̃н̃а̄чаккху каматӣ’’ти. пан̃чамам̣.