1. сам̣йоджанасуттам̣

343. екам̣ самайам̣ самбахула̄ тхера̄ бхиккхӯ маччхика̄сан̣д̣е вихаранти амба̄т̣акаване. тена кхо пана самайена самбахула̄нам̣ тхера̄нам̣ бхиккхӯнам̣ паччха̄бхаттам̣ пин̣д̣апа̄тапат̣икканта̄нам̣ ман̣д̣алама̄л̣е саннисинна̄нам̣ саннипатита̄нам̣ айамантара̄катха̄ удапа̄ди – ‘‘‘сам̣йоджана’нти ва̄, а̄вусо, ‘сам̣йоджанийа̄ дхамма̄’ти ва̄ име дхамма̄ на̄наттха̄ на̄на̄бйан̃джана̄ уда̄ху екаттха̄ бйан̃джанамева на̄на’’нти? татрекаччехи тхерехи бхиккхӯхи евам̣ бйа̄катам̣ хоти – ‘‘‘сам̣йоджана’нти ва̄, а̄вусо, ‘сам̣йоджанийа̄ дхамма̄’ти ва̄ име дхамма̄ на̄наттха̄ чева на̄на̄бйан̃джана̄ ча̄’’ти. екаччехи тхерехи бхиккхӯхи евам̣ бйа̄катам̣ хоти – ‘‘‘сам̣йоджана’нти ва̄, а̄вусо, ‘сам̣йоджанийа̄ дхамма̄’ти ва̄ име дхамма̄ екаттха̄ бйан̃джанамева на̄на’’нти.

тена кхо пана самайена читто гахапати мигапатхакам̣ ануппатто хоти кеначидева каран̣ӣйена. ассоси кхо читто гахапати самбахула̄нам̣ кира тхера̄нам̣ бхиккхӯнам̣ паччха̄бхаттам̣ пин̣д̣апа̄тапат̣икканта̄нам̣ ман̣д̣алама̄л̣е саннисинна̄нам̣ саннипатита̄нам̣ айамантара̄катха̄ удапа̄ди – ‘‘‘сам̣йоджана’нти ва̄, а̄вусо, ‘сам̣йоджанийа̄ дхамма̄’ти ва̄ име дхамма̄ на̄наттха̄ на̄на̄бйан̃джана̄ уда̄ху екаттха̄ бйан̃джанамева на̄на’’нти? татрекаччехи тхерехи бхиккхӯхи евам̣ бйа̄катам̣ – ‘‘‘сам̣йоджана’нти ва̄, а̄вусо, ‘сам̣йоджанийа̄ дхамма̄’ти ва̄ име дхамма̄ на̄наттха̄ чева на̄на̄бйан̃джана̄ ча̄’’ти. екаччехи тхерехи бхиккхӯхи евам̣ бйа̄катам̣ ‘сам̣йоджана’нти ва̄, а̄вусо ‘сам̣йоджанийа̄ дхамма̄’ти ва̄ име дхамма̄ екаттха̄ бйан̃джанамева на̄нанти. атха кхо читто гахапати йена тхера̄ бхиккхӯ тенупасан̇ками; упасан̇камитва̄ тхере бхиккхӯ абхива̄детва̄ екамантам̣ нисӣди. екамантам̣ нисинно кхо читто гахапати тхере бхиккхӯ етадавоча – ‘‘сутам̣ метам̣, бханте, самбахула̄нам̣ кира тхера̄нам̣ бхиккхӯнам̣ паччха̄бхаттам̣ пин̣д̣апа̄тапат̣икканта̄нам̣ ман̣д̣алама̄л̣е саннисинна̄нам̣ саннипатита̄нам̣ айамантара̄катха̄ удапа̄ди – ‘сам̣йоджана’нти ва̄, а̄вусо, ‘сам̣йоджанийа̄ дхамма̄’ти ва̄ име дхамма̄ на̄наттха̄ на̄на̄бйан̃джана̄ уда̄ху екаттха̄ бйан̃джанамева на̄на’’нти? екаччехи тхерехи бхиккхӯхи евам̣ бйа̄катам̣ – ‘‘‘сам̣йоджана’нти ва̄, а̄вусо, ‘сам̣йоджанийа̄ дхамма̄’ти ва̄ име дхамма̄ на̄наттха̄ чева на̄на̄бйан̃джана̄ ча̄’’ти. екаччехи тхерехи бхиккхӯхи евам̣ бйа̄катам̣ ‘‘‘сам̣йоджана’нти ва̄, а̄вусо, ‘сам̣йоджанийа̄ дхамма̄’ти ва̄ име дхамма̄ екаттха̄ бйан̃джанамева на̄на’’нти. ‘‘евам̣, гахапатӣ’’ти.

‘‘‘сам̣йоджана’нти ва̄, бханте, ‘сам̣йоджанийа̄ дхамма̄’ти ва̄ име дхамма̄ на̄наттха̄ чева на̄на̄бйан̃джана̄ ча. тена хи, бханте, упамам̣ во карисса̄ми. упама̄йапидхекачче вин̃н̃ӯ пуриса̄ бха̄ситасса аттхам̣ а̄джа̄нанти. сеййатха̄пи, бханте, ка̄л̣о ча балӣбаддо ода̄то ча балӣбаддо екена да̄мена ва̄ йоттена ва̄ сам̣йутта̄ ассу. йо ну кхо евам̣ вадеййа – ‘ка̄л̣о балӣбаддо ода̄тасса балӣбаддасса сам̣йоджанам̣, ода̄то балӣбаддо ка̄л̣асса балӣбаддасса сам̣йоджана’нти, самма̄ ну кхо со вадама̄но вадеййа̄’’ти? ‘‘но хетам̣, гахапати! на кхо, гахапати, ка̄л̣о балӣбаддо ода̄тасса балӣбаддасса сам̣йоджанам̣, напи ода̄то балӣбаддо ка̄л̣асса бал̣ӣбаддасса сам̣йоджанам̣; йена кхо те екена да̄мена ва̄ йоттена ва̄ сам̣йутта̄ там̣ таттха сам̣йоджана’’нти. ‘‘евамева кхо, бханте, на чаккху рӯпа̄нам̣ сам̣йоджанам̣, на рӯпа̄ чаккхусса сам̣йоджанам̣; йан̃ча таттха тадубхайам̣ пат̣ичча уппаджджати чхандара̄го там̣ таттха сам̣йоджанам̣. на сотам̣ садда̄нам̣… на гха̄нам̣ гандха̄нам̣… на дживха̄ раса̄нам̣… на ка̄йо пхот̣т̣хабба̄нам̣ сам̣йоджанам̣, на пхот̣т̣хабба̄ ка̄йасса сам̣йоджанам̣; йан̃ча таттха тадубхайам̣ пат̣ичча уппаджджати чхандара̄го там̣ таттха сам̣йоджанам̣. на мано дхамма̄нам̣ сам̣йоджанам̣, на дхамма̄ манасса сам̣йоджанам̣; йан̃ча таттха тадубхайам̣ пат̣ичча уппаджджати чхандара̄го там̣ таттха сам̣йоджана’’нти. ‘‘ла̄бха̄ те, гахапати, суладдхам̣ те, гахапати, йасса те гамбхӣре буддхавачане пан̃н̃а̄чаккху каматӣ’’ти. пат̣хамам̣.