1. пат̣хамаджха̄напан̃ха̄суттам̣

332. екам̣ самайам̣ а̄йасма̄ маха̄моггалла̄но са̄ваттхийам̣ вихарати джетаване ана̄тхапин̣д̣икасса а̄ра̄ме. татра кхо а̄йасма̄ маха̄моггалла̄но бхиккхӯ а̄мантеси – ‘‘а̄вусо, бхиккхаве’’ти. ‘‘а̄вусо’’ти кхо те бхиккхӯ а̄йасмато маха̄моггалла̄насса паччассосум̣. а̄йасма̄ маха̄моггалла̄но етадавоча –

‘‘идха майхам̣, а̄вусо, рахогатасса пат̣исаллӣнасса евам̣ четасо паривитакко удапа̄ди – ‘пат̣хамам̣ джха̄нам̣, пат̣хамам̣ джха̄на’нти вуччати. катамам̣ ну кхо пат̣хамам̣ джха̄нанти? тасса майхам̣, а̄вусо, етадахоси – ‘идха бхиккху вивиччева ка̄мехи вивичча акусалехи дхаммехи савитаккам̣ савича̄рам̣ вивекаджам̣ пӣтисукхам̣ пат̣хамам̣ джха̄нам̣ упасампаджджа вихарати. идам̣ вуччати пат̣хамам̣ джха̄на’нти. со кхва̄хам̣, а̄вусо, вивиччева ка̄мехи вивичча акусалехи дхаммехи савитаккам̣ савича̄рам̣ вивекаджам̣ пӣтисукхам̣ пат̣хамам̣ джха̄нам̣ упасампаджджа вихара̄ми. тасса майхам̣, а̄вусо, имина̄ виха̄рена вихарато ка̄масахагата̄ сан̃н̃а̄манасика̄ра̄ самуда̄чаранти.

‘‘атха кхо мам̣, а̄вусо, бхагава̄ иддхийа̄ упасан̇камитва̄ етадавоча – ‘моггалла̄на, моггалла̄на! ма̄, бра̄хман̣а, пат̣хамам̣ джха̄нам̣ пама̄до, пат̣хаме джха̄не читтам̣ сан̣т̣хапехи, пат̣хаме джха̄не читтам̣ екодим̣ карохи [екодикарохи (пӣ.)], пат̣хаме джха̄не читтам̣ сама̄даха̄’ти. со кхва̄хам̣, а̄вусо, апарена самайена вивиччева ка̄мехи вивичча акусалехи дхаммехи савитаккам̣ савича̄рам̣ вивекаджам̣ пӣтисукхам̣ пат̣хамам̣ джха̄нам̣ упасампаджджа виха̄сим̣. йан̃хи там̣, а̄вусо, самма̄ вадама̄но вадеййа – ‘саттха̄ра̄нуггахито са̄вако маха̄бхин̃н̃атам̣ патто’ти, мамам̣ там̣ самма̄ вадама̄но вадеййа – ‘саттха̄ра̄нуггахито са̄вако маха̄бхин̃н̃атам̣ патто’’’ти. пат̣хамам̣.