3. балавагго

1. виса̄радасуттам̣

304. ‘‘пан̃чима̄ни, бхиккхаве, ма̄туга̄масса бала̄ни. катама̄ни пан̃ча? рӯпабалам̣, бхогабалам̣, н̃а̄тибалам̣, путтабалам̣, сӣлабалам̣ – има̄ни кхо, бхиккхаве, пан̃ча ма̄туга̄масса бала̄ни. имехи кхо, бхиккхаве, пан̃чахи балехи саманна̄гато ма̄туга̄мо виса̄радо ага̄рам̣ аджджха̄васатӣ’’ти. пат̣хамам̣.

2. пасайхасуттам̣

305. ‘‘пан̃чима̄ни, бхиккхаве, ма̄туга̄масса бала̄ни. катама̄ни пан̃ча? рӯпабалам̣, бхогабалам̣, н̃а̄тибалам̣, путтабалам̣, сӣлабалам̣ – има̄ни кхо, бхиккхаве, пан̃ча ма̄туга̄масса бала̄ни. имехи кхо, бхиккхаве, пан̃чахи балехи саманна̄гато ма̄туга̄мо са̄микам̣ пасайха ага̄рам̣ аджджха̄васатӣ’’ти. дутийам̣.

3. абхибхуййасуттам̣

306. ‘‘пан̃чима̄ни, бхиккхаве, ма̄туга̄масса бала̄ни. катама̄ни пан̃ча? рӯпабалам̣, бхогабалам̣, н̃а̄тибалам̣, путтабалам̣, сӣлабалам̣ – има̄ни кхо, бхиккхаве, пан̃ча ма̄туга̄масса бала̄ни. имехи кхо, бхиккхаве, пан̃чахи балехи саманна̄гато ма̄туга̄мо са̄микам̣ абхибхуййа ваттатӣ’’ти. татийам̣.

4. екасуттам̣

307. ‘‘екена ча кхо, бхиккхаве, балена саманна̄гато пурисо ма̄туга̄мам̣ абхибхуййа ваттати. катамена екена балена? иссарийабалена абхибхӯтам̣ ма̄туга̄мам̣ нева рӯпабалам̣ та̄йати, на бхогабалам̣ та̄йати, на н̃а̄тибалам̣ та̄йати, на путтабалам̣ та̄йати, на сӣлабалам̣ та̄йатӣ’’ти. чатуттхам̣.

5. ан̇гасуттам̣

308. ‘‘пан̃чима̄ни, бхиккхаве, ма̄туга̄масса бала̄ни. катама̄ни пан̃ча? рӯпабалам̣, бхогабалам̣, н̃а̄тибалам̣, путтабалам̣, сӣлабалам̣. рӯпабалена ча, бхиккхаве, ма̄туга̄мо саманна̄гато хоти, на ча бхогабалена – евам̣ со тенан̇гена апарипӯро хоти. йато ча кхо, бхиккхаве, ма̄туга̄мо рӯпабалена ча саманна̄гато хоти, бхогабалена ча – евам̣ со тенан̇гена парипӯро хоти. рӯпабалена ча, бхиккхаве, ма̄туга̄мо саманна̄гато хоти, бхогабалена ча, на ча н̃а̄тибалена – евам̣ со тенан̇гена апарипӯро хоти. йато ча кхо, бхиккхаве, ма̄туга̄мо рӯпабалена ча саманна̄гато хоти, бхогабалена ча, н̃а̄тибалена ча – евам̣ со тенан̇гена парипӯро хоти. рӯпабалена ча, бхиккхаве, ма̄туга̄мо саманна̄гато хоти, бхогабалена ча, н̃а̄тибалена ча, на ча путтабалена – евам̣ со тенан̇гена апарипӯро хоти. йато ча кхо, бхиккхаве, ма̄туга̄мо рӯпабалена ча саманна̄гато хоти, бхогабалена ча, н̃а̄тибалена ча, путтабалена ча – евам̣ со тенан̇гена парипӯро хоти. рӯпабалена ча, бхиккхаве, ма̄туга̄мо саманна̄гато хоти, бхогабалена ча, н̃а̄тибалена ча, путтабалена ча, на ча сӣлабалена – евам̣ со тенан̇гена апарипӯро хоти. йато ча кхо, бхиккхаве, ма̄туга̄мо рӯпабалена ча саманна̄гато хоти, бхогабалена ча, н̃а̄тибалена ча, путтабалена ча, сӣлабалена ча – евам̣ со тенан̇гена парипӯро хоти. има̄ни кхо, бхиккхаве, пан̃ча ма̄туга̄масса бала̄нӣ’’ти. пан̃чамам̣.

6. на̄сентисуттам̣

309. ‘‘пан̃чима̄ни, бхиккхаве, ма̄туга̄масса бала̄ни. катама̄ни пан̃ча? рӯпабалам̣, бхогабалам̣, н̃а̄тибалам̣, путтабалам̣, сӣлабалам̣. рӯпабалена ча, бхиккхаве, ма̄туга̄мо саманна̄гато хоти, на ча сӣлабалена, на̄сентева нам̣, куле на ва̄сенти. рӯпабалена ча, бхиккхаве, ма̄туга̄мо саманна̄гато хоти, бхогабалена ча, на ча сӣлабалена, на̄сентева нам̣, куле на ва̄сенти. рӯпабалена ча, бхиккхаве, ма̄туга̄мо саманна̄гато хоти, бхогабалена ча, н̃а̄тибалена ча, на ча сӣлабалена, на̄сентева нам̣, куле на ва̄сенти. рӯпабалена ча, бхиккхаве, ма̄туга̄мо саманна̄гато хоти, бхогабалена ча, н̃а̄тибалена ча, путтабалена ча, на ча сӣлабалена, на̄сентева нам̣, куле на ва̄сенти. сӣлабалена ча, бхиккхаве, ма̄туга̄мо саманна̄гато хоти, на ча рӯпабалена, ва̄сентева нам̣, куле на на̄сенти. сӣлабалена ча, бхиккхаве, ма̄туга̄мо саманна̄гато хоти, на ча бхогабалена, ва̄сентева нам̣, куле на на̄сенти. сӣлабалена ча, бхиккхаве, ма̄туга̄мо саманна̄гато хоти, на ча н̃а̄тибалена, ва̄сентева нам̣, куле на на̄сенти. сӣлабалена ча, бхиккхаве, ма̄туга̄мо саманна̄гато хоти, на ча путтабалена, ва̄сентева нам̣, куле на на̄сенти. има̄ни кхо, бхиккхаве, пан̃ча ма̄туга̄масса бала̄нӣ’’ти. чхат̣т̣хам̣.

7. хетусуттам̣

310. ‘‘пан̃чима̄ни, бхиккхаве, ма̄туга̄масса бала̄ни. катама̄ни пан̃ча? рӯпабалам̣, бхогабалам̣, н̃а̄тибалам̣, путтабалам̣, сӣлабалам̣. на, бхиккхаве, ма̄туга̄мо рӯпабалахету ва̄ бхогабалахету ва̄ н̃а̄тибалахету ва̄ путтабалахету ва̄ ка̄йасса бхеда̄ парам̣ маран̣а̄ сугатим̣ саггам̣ локам̣ упападжджати. сӣлабалахету кхо, бхиккхаве, ма̄туга̄мо ка̄йасса бхеда̄ парам̣ маран̣а̄ сугатим̣ саггам̣ локам̣ упападжджати. има̄ни кхо, бхиккхаве, пан̃ча ма̄туга̄масса бала̄нӣ’’ти. саттамам̣.

8. т̣ха̄насуттам̣

311. ‘‘пан̃чима̄ни, бхиккхаве, т̣ха̄на̄ни дуллабха̄ни акатапун̃н̃ена ма̄туга̄мена. катама̄ни пан̃ча? патирӯпе куле джа̄йеййанти – идам̣, бхиккхаве, пат̣хамам̣ т̣ха̄нам̣ дуллабхам̣ акатапун̃н̃ена ма̄туга̄мена. патирӯпе куле джа̄йитва̄ патирӯпам̣ кулам̣ гаччхеййанти – идам̣, бхиккхаве, дутийам̣ т̣ха̄нам̣ дуллабхам̣ акатапун̃н̃ена ма̄туга̄мена. патирӯпе куле джа̄йитва̄, патирӯпам̣ кулам̣ гантва̄, асапатти ага̄рам̣ аджджха̄васеййанти – идам̣, бхиккхаве, татийам̣ т̣ха̄нам̣ дуллабхам̣ акатапун̃н̃ена ма̄туга̄мена. патирӯпе куле джа̄йитва̄, патирӯпам̣ кулам̣ гантва̄, асапатти ага̄рам̣ аджджха̄васантӣ путтаватӣ ассанти – идам̣, бхиккхаве, чатуттхам̣ т̣ха̄нам̣ дуллабхам̣ акатапун̃н̃ена ма̄туга̄мена. патирӯпе куле джа̄йитва̄, патирӯпам̣ кулам̣ гантва̄, асапатти ага̄рам̣ аджджха̄васантӣ путтаватӣ сама̄на̄ са̄микам̣ абхибхуййа ваттеййанти – идам̣, бхиккхаве, пан̃чамам̣ т̣ха̄нам̣ дуллабхам̣ акатапун̃н̃ена ма̄туга̄мена. има̄ни кхо, бхиккхаве, пан̃ча т̣ха̄на̄ни дуллабха̄ни акатапун̃н̃ена ма̄туга̄мена̄ти.

‘‘пан̃чима̄ни, бхиккхаве, т̣ха̄на̄ни сулабха̄ни катапун̃н̃ена ма̄туга̄мена. катама̄ни пан̃ча? патирӯпе куле джа̄йеййанти – идам̣, бхиккхаве, пат̣хамам̣ т̣ха̄нам̣ сулабхам̣ катапун̃н̃ена ма̄туга̄мена. патирӯпе куле джа̄йитва̄ патирӯпам̣ кулам̣ гаччхеййанти – идам̣, бхиккхаве, дутийам̣ т̣ха̄нам̣ сулабхам̣ катапун̃н̃ена ма̄туга̄мена. патирӯпе куле джа̄йитва̄ патирӯпам̣ кулам̣ гантва̄ асапатти ага̄рам̣ аджджха̄васеййанти – идам̣, бхиккхаве, татийам̣ т̣ха̄нам̣ сулабхам̣ катапун̃н̃ена ма̄туга̄мена. патирӯпе куле джа̄йитва̄ патирӯпам̣ кулам̣ гантва̄ асапатти ага̄рам̣ аджджха̄васантӣ путтаватӣ ассанти – идам̣, бхиккхаве, чатуттхам̣ т̣ха̄нам̣ сулабхам̣ катапун̃н̃ена ма̄туга̄мена. патирӯпе куле джа̄йитва̄ патирӯпам̣ кулам̣ гантва̄ асапатти ага̄рам̣ аджджха̄васантӣ путтаватӣ сама̄на̄ са̄микам̣ абхибхуййа ваттеййанти – идам̣, бхиккхаве, пан̃чамам̣ т̣ха̄нам̣ сулабхам̣ катапун̃н̃ена ма̄туга̄мена. има̄ни кхо, бхиккхаве, пан̃ча т̣ха̄на̄ни сулабха̄ни катапун̃н̃ена ма̄туга̄мена̄’’ти. ат̣т̣хамам̣.

9. пан̃часӣлависа̄радасуттам̣

312. ‘‘пан̃чахи, бхиккхаве, дхаммехи саманна̄гато ма̄туга̄мо виса̄радо ага̄рам̣ аджджха̄васати. катамехи пан̃чахи? па̄н̣а̄типа̄та̄ пат̣ивирато ча хоти, адинна̄да̄на̄ пат̣ивирато ча хоти, ка̄месумиччха̄ча̄ра̄ пат̣ивирато ча хоти, муса̄ва̄да̄ пат̣ивирато ча хоти, сура̄мерайамаджджаппама̄дат̣т̣ха̄на̄ пат̣ивирато ча хоти – имехи кхо, бхиккхаве, пан̃чахи дхаммехи саманна̄гато ма̄туга̄мо виса̄радо ага̄рам̣ аджджха̄васатӣ’’ти. навамам̣.

10. вад̣д̣хӣсуттам̣

313. ‘‘пан̃чахи, бхиккхаве, вад̣д̣хӣхи вад̣д̣хама̄на̄ арийаса̄вика̄ арийа̄йа вад̣д̣хийа̄ вад̣д̣хати са̄ра̄да̄йинӣ ча хоти вара̄да̄йинӣ ча ка̄йасса. катамехи пан̃чахи? саддха̄йа вад̣д̣хати, сӣлена вад̣д̣хати, сутена вад̣д̣хати, ча̄гена вад̣д̣хати, пан̃н̃а̄йа вад̣д̣хати – имехи кхо, бхиккхаве, пан̃чахи вад̣д̣хӣхи вад̣д̣хама̄на̄ арийаса̄вика̄ арийа̄йа вад̣д̣хийа̄ вад̣д̣хати, са̄ра̄да̄йинӣ ча хоти, вара̄да̄йинӣ ча ка̄йасса̄’’ти.

‘‘саддха̄йа сӣлена ча йа̄дха вад̣д̣хати,

пан̃н̃а̄йа ча̄гена сутена чӯбхайам̣;

са̄ та̄дисӣ сӣлаватӣ упа̄сика̄,

а̄дӣйати са̄рамидхева аттано’’ти. дасамам̣;

балавагго татийо.

тассудда̄нам̣ –

виса̄рада̄ пасайха абхибхуййа, екам̣ ан̇гена пан̃чамам̣;

на̄сенти хету т̣ха̄нан̃ча, виса̄радо вад̣д̣хина̄ даса̄ти.

ма̄туга̄масам̣йуттам̣ саматтам̣.