1. сӣвакасуттам̣

269. екам̣ самайам̣ бхагава̄ ра̄джагахе вихарати вел̣уване каландаканива̄пе. атха кхо мол̣ийасӣвако парибба̄джако йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо мол̣ийасӣвако парибба̄джако бхагавантам̣ етадавоча – ‘‘санти, бхо готама, еке саман̣абра̄хман̣а̄ евам̣ва̄дино евам̣дит̣т̣хино – ‘йам̣ кин̃ча̄йам̣ пурисапуггало пат̣исам̣ведети сукхам̣ ва̄ дуккхам̣ ва̄ адуккхамасукхам̣ ва̄ саббам̣ там̣ пуббекатахетӯ’ти. идха [идха пана (сйа̄. кам̣. пӣ. ка.)] бхавам̣ готамо кима̄ха̄’’ти?

‘‘питтасамут̣т̣ха̄на̄нипи кхо, сӣвака, идхекачча̄ни ведайита̄ни уппаджджанти. са̄мампи кхо етам̣, сӣвака, ведитаббам̣ [евам̣ ведитаббам̣ (сйа̄. кам̣. ка.)] йатха̄ питтасамут̣т̣ха̄на̄нипи идхекачча̄ни ведайита̄ни уппаджджанти; локассапи кхо етам̣, сӣвака, саччасамматам̣ йатха̄ питтасамут̣т̣ха̄на̄нипи идхекачча̄ни ведайита̄ни уппаджджанти. татра, сӣвака, йе те саман̣абра̄хман̣а̄ евам̣ва̄дино евам̣дит̣т̣хино – ‘йам̣ кин̃ча̄йам̣ пурисапуггало пат̣исам̣ведети сукхам̣ ва̄ дуккхам̣ ва̄ адуккхамасукхам̣ ва̄ саббам̣ там̣ пуббекатахетӯ’ти. йан̃ча са̄мам̣ н̃а̄там̣ тан̃ча атидха̄ванти, йан̃ча локе саччасамматам̣ тан̃ча атидха̄ванти. тасма̄ тесам̣ саман̣абра̄хман̣а̄нам̣ миччха̄ти вада̄ми.

‘‘семхасамут̣т̣ха̄на̄нипи кхо, сӣвака…пе… ва̄тасамут̣т̣ха̄на̄нипи кхо, сӣвака…пе… саннипа̄тика̄нипи кхо, сӣвака…пе… утупарин̣а̄маджа̄нипи кхо, сӣвака…пе… висамапариха̄раджа̄нипи кхо, сӣвака…пе… опаккамика̄нипи кхо, сӣвака…пе… каммавипа̄каджа̄нипи кхо, сӣвака, идхекачча̄ни ведайита̄ни уппаджджанти. са̄мампи кхо етам̣, сӣвака, ведитаббам̣. йатха̄ каммавипа̄каджа̄нипи идхекачча̄ни ведайита̄ни уппаджджанти; локассапи кхо етам̣, сӣвака, саччасамматам̣. йатха̄ каммавипа̄каджа̄нипи идхекачча̄ни ведайита̄ни уппаджджанти; татра, сӣвака, йе те саман̣абра̄хман̣а̄ евам̣ва̄дино евам̣дит̣т̣хино – ‘йам̣ кин̃ча̄йам̣ пурисапуггало пат̣исам̣ведети сукхам̣ ва̄ дуккхам̣ ва̄ адуккхамасукхам̣ ва̄ саббам̣ там̣ пуббекатахетӯ’ти. йан̃ча са̄мам̣ н̃а̄там̣ тан̃ча атидха̄ванти йан̃ча локе саччасамматам̣ тан̃ча атидха̄ванти. тасма̄ тесам̣ саман̣абра̄хман̣а̄нам̣ миччха̄ти вада̄мӣти. евам̣ вутте, мол̣ийасӣвако парибба̄джако бхагавантам̣ етадавоча – ‘абхиккантам̣, бхо готама, абхиккантам̣, бхо готама …пе… упа̄сакам̣ мам̣ бхавам̣ готамо дха̄рету аджджатагге па̄н̣упетам̣ саран̣ам̣ гата’’’нти.

‘‘питтам̣ семхан̃ча ва̄то ча, саннипа̄та̄ утӯни ча;

висамам̣ опаккамикам̣, каммавипа̄кена ат̣т̣хамӣ’’ти. пат̣хамам̣;