5. нибба̄насаппа̄йапат̣ипада̄суттам̣

150. ‘‘нибба̄насаппа̄йам̣ во, бхиккхаве, пат̣ипадам̣ десесса̄ми. там̣ сун̣а̄тха…пе… катама̄ ча са̄, бхиккхаве, нибба̄насаппа̄йа̄ пат̣ипада̄? там̣ ким̣ ман̃н̃атха, бхиккхаве, чаккху ниччам̣ ва̄ аниччам̣ ва̄’’ти?

‘‘аниччам̣, бханте’’.

‘‘йам̣ пана̄ниччам̣ дуккхам̣ ва̄ там̣ сукхам̣ ва̄’’ти?

‘‘дуккхам̣, бханте’’.

‘‘йам̣ пана̄ниччам̣ дуккхам̣ випарин̣а̄мадхаммам̣, каллам̣ ну там̣ саманупасситум̣ – ‘етам̣ мама, есохамасми, есо ме атта̄’’’ти?

‘‘но хетам̣, бханте’’.

‘‘рӯпа̄ ничча̄ ва̄ аничча̄ ва̄’’ти?

‘‘аничча̄, бханте’’…пе….

‘‘чаккхувин̃н̃а̄н̣ам̣… чаккхусампхассо…пе… йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тампи ниччам̣ ва̄ аниччам̣ ва̄’’ти?

‘‘аниччам̣, бханте’’.

‘‘йам̣ пана̄ниччам̣ дуккхам̣ ва̄ там̣ сукхам̣ ва̄’’ти?

‘‘дуккхам̣, бханте’’.

‘‘йам̣ пана̄ниччам̣ дуккхам̣ випарин̣а̄мадхаммам̣, каллам̣ ну там̣ саманупасситум̣ – ‘етам̣ мама, есохамасми, есо ме атта̄’’’ти?

‘‘но хетам̣, бханте’’.

‘‘евам̣ пассам̣, бхиккхаве, сутава̄ арийаса̄вако чаккхусмимпи ниббиндати, рӯпесупи ниббиндати, чаккхувин̃н̃а̄н̣епи ниббиндати, чаккхусампхассепи ниббиндати…пе… йампидам̣ маносампхассапаччайа̄ уппаджджати ведайитам̣ сукхам̣ ва̄ дуккхам̣ ва̄ адуккхамасукхам̣ ва̄ тасмимпи ниббиндати. ниббиндам̣ вираджджати; вира̄га̄ вимуччати …пе… на̄парам̣ иттхатта̄йа̄ти паджа̄на̄ти. айам̣ кхо са̄, бхиккхаве, нибба̄насаппа̄йа̄ пат̣ипада̄’’ти. пан̃чамам̣.