2. авитаккасуттам̣

333. са̄ваттхинида̄нам̣. аддаса̄ кхо а̄йасма̄ а̄нандо…пе… а̄йасмантам̣ са̄рипуттам̣ етадавоча – ‘‘виппасанна̄ни кхо те, а̄вусо са̄рипутта, индрийа̄ни; парисуддхо мукхаван̣н̣о парийода̄то. катамена̄йасма̄ са̄рипутто аджджа виха̄рена виха̄сӣ’’ти?

‘‘идха̄хам̣, а̄вусо, витаккавича̄ра̄нам̣ вӯпасама̄ аджджхаттам̣ сампаса̄данам̣ четасо екодибха̄вам̣ авитаккам̣ авича̄рам̣ сама̄дхиджам̣ пӣтисукхам̣ дутийам̣ джха̄нам̣ упасампаджджа вихара̄ми. тасса майхам̣, а̄вусо, на евам̣ хоти – ‘ахам̣ дутийам̣ джха̄нам̣ сама̄паджджа̄мӣ’ти ва̄ ‘ахам̣ дутийам̣ джха̄нам̣ сама̄панно’ти ва̄ ‘ахам̣ дутийа̄ джха̄на̄ вут̣т̣хито’ти ва̄’’ти. ‘‘татха̄ хи пана̄йасмато са̄рипуттасса дӣгхараттам̣ ахан̇ка̄рамаман̇ка̄рама̄на̄нусайа̄ сусамӯхата̄. тасма̄ а̄йасмато са̄рипуттасса на евам̣ хоти – ‘ахам̣ дутийам̣ джха̄нам̣ сама̄паджджа̄мӣ’ти ва̄ ‘ахам̣ дутийам̣ джха̄нам̣ сама̄панно’ти ва̄ ‘ахам̣ дутийа̄ джха̄на̄ вут̣т̣хито’ти ва̄’’ти. дутийам̣.