3. пӣтисуттам̣

334. са̄ваттхинида̄нам̣. аддаса̄ кхо а̄йасма̄ а̄нандо…пе… ‘‘виппасанна̄ни кхо те, а̄вусо са̄рипутта, индрийа̄ни; парисуддхо мукхаван̣н̣о парийода̄то. катамена̄йасма̄ са̄рипутто аджджа виха̄рена виха̄сӣ’’ти?

‘‘идха̄хам̣, а̄вусо, пӣтийа̄ ча вира̄га̄ упеккхако ча виха̄сим̣ сато ча сампаджа̄но сукхан̃ча ка̄йена пат̣исам̣ведеми; йам̣ там̣ арийа̄ а̄чиккханти ‘упеккхако сатима̄ сукхавиха̄рӣ’ти татийам̣ джха̄нам̣ упасампаджджа вихара̄ми. тасса майхам̣, а̄вусо, на евам̣ хоти – ‘ахам̣ татийам̣ джха̄нам̣ сама̄паджджа̄мӣ’ти ва̄ ‘ахам̣ татийам̣ джха̄нам̣ сама̄панно’ти ва̄ ‘ахам̣ татийа̄ джха̄на̄ вут̣т̣хито’ти ва̄’’ти. ‘‘татха̄ хи пана̄йасмато са̄рипуттасса дӣгхараттам̣ ахан̇ка̄рамаман̇ка̄рама̄на̄нусайа̄ сусамӯхата̄. тасма̄ а̄йасмато са̄рипуттасса на евам̣ хоти – ‘ахам̣ татийам̣ джха̄нам̣ сама̄паджджа̄мӣ’ти ва̄ ‘ахам̣ татийам̣ джха̄нам̣ сама̄панно’ти ва̄ ‘ахам̣ татийа̄ джха̄на̄ вут̣т̣хито’ти ва̄’’ти. татийам̣.