10. кхандхасуттам̣

311. са̄ваттхинида̄нам̣. ‘‘рӯпам̣, бхиккхаве, аниччам̣ випарин̣а̄ми ан̃н̃атха̄бха̄ви; ведана̄ аничча̄ випарин̣а̄мӣ ан̃н̃атха̄бха̄вӣ; сан̃н̃а̄… сан̇кха̄ра̄ аничча̄ випарин̣а̄мино ан̃н̃атха̄бха̄вино; вин̃н̃а̄н̣ам̣ аниччам̣ випарин̣а̄ми ан̃н̃атха̄бха̄ви. йо, бхиккхаве, име дхамме евам̣ саддахати адхимуччати, айам̣ вуччати саддха̄нуса̄рӣ, окканто самматтанийа̄мам̣, саппурисабхӯмим̣ окканто, вӣтиватто путхуджджанабхӯмим̣; абхаббо там̣ каммам̣ ка̄тум̣, йам̣ каммам̣ катва̄ нирайам̣ ва̄ тираччха̄найоним̣ ва̄ петтивисайам̣ ва̄ упападжджеййа; абхаббо ча та̄ва ка̄лам̣ ка̄тум̣ йа̄ва на сота̄паттипхалам̣ саччхикароти’’.

‘‘йасса кхо, бхиккхаве, име дхамма̄ евам̣ пан̃н̃а̄йа маттасо ниджджха̄нам̣ кхаманти, айам̣ вуччати – ‘дхамма̄нуса̄рӣ, окканто самматтанийа̄мам̣, саппурисабхӯмим̣ окканто, вӣтиватто путхуджджанабхӯмим̣; абхаббо там̣ каммам̣ ка̄тум̣, йам̣ каммам̣ катва̄ нирайам̣ ва̄ тираччха̄найоним̣ ва̄ петтивисайам̣ ва̄ упападжджеййа; абхаббо ча та̄ва ка̄лам̣ ка̄тум̣ йа̄ва на сота̄паттипхалам̣ саччхикароти’. йо, бхиккхаве, име дхамме евам̣ паджа̄на̄ти евам̣ пассати, айам̣ вуччати – ‘сота̄панно авинипа̄тадхаммо нийато самбодхипара̄йано’’’ти. дасамам̣.

оккантасам̣йуттам̣ [оккантикасам̣йуттам̣ (пӣ. ка.)] саматтам̣.