4. оккантасам̣йуттам̣

1. чаккхусуттам̣

302. са̄ваттхинида̄нам̣. ‘‘чаккхум̣, бхиккхаве, аниччам̣ випарин̣а̄ми ан̃н̃атха̄бха̄ви; сотам̣ аниччам̣ випарин̣а̄ми ан̃н̃атха̄бха̄ви; гха̄нам̣ аниччам̣ випарин̣а̄ми ан̃н̃атха̄бха̄ви; дживха̄ аничча̄ випарин̣а̄мӣ ан̃н̃атха̄бха̄вӣ [випарин̣а̄минӣ ан̃н̃атха̄бха̄винӣ (?)]; ка̄йо аниччо випарин̣а̄мӣ ан̃н̃атха̄бха̄вӣ; мано аниччо випарин̣а̄мӣ ан̃н̃атха̄бха̄вӣ. йо, бхиккхаве, име дхамме евам̣ саддахати адхимуччати – айам̣ вуччати саддха̄нуса̄рӣ, окканто самматтанийа̄мам̣, саппурисабхӯмим̣ окканто, вӣтиватто путхуджджанабхӯмим̣; абхаббо там̣ каммам̣ ка̄тум̣, йам̣ каммам̣ катва̄ нирайам̣ ва̄ тираччха̄найоним̣ ва̄ петтивисайам̣ ва̄ упападжджеййа; абхаббо ча [абхаббова (сӣ. сйа̄. кам̣.)] та̄ва ка̄лам̣ ка̄тум̣ йа̄ва на сота̄паттипхалам̣ саччхикароти’’.

‘‘йасса кхо, бхиккхаве, име дхамма̄ евам̣ пан̃н̃а̄йа маттасо ниджджха̄нам̣ кхаманти, айам̣ вуччати – ‘дхамма̄нуса̄рӣ, окканто самматтанийа̄мам̣, саппурисабхӯмим̣ окканто, вӣтиватто путхуджджанабхӯмим̣; абхаббо там̣ каммам̣ ка̄тум̣, йам̣ каммам̣ катва̄ нирайам̣ ва̄ тираччха̄найоним̣ ва̄ петтивисайам̣ ва̄ упападжджеййа; абхаббо ча та̄ва ка̄лам̣ ка̄тум̣ йа̄ва на сота̄паттипхалам̣ саччхикароти’. йо, бхиккхаве, име дхамме евам̣ паджа̄на̄ти евам̣ пассати, айам̣ вуччати – ‘сота̄панно авинипа̄тадхаммо нийато самбодхипара̄йано’’’ти. пат̣хамам̣.

2. рӯпасуттам̣

303. са̄ваттхинида̄нам̣. ‘‘рӯпа̄, бхиккхаве, аничча̄ випарин̣а̄мино ан̃н̃атха̄бха̄вино; садда̄ аничча̄ випарин̣а̄мино ан̃н̃атха̄бха̄вино; гандха̄ аничча̄ випарин̣а̄мино ан̃н̃атха̄бха̄вино; раса̄ аничча̄ випарин̣а̄мино ан̃н̃атха̄бха̄вино; пхот̣т̣хабба̄ аничча̄ випарин̣а̄мино ан̃н̃атха̄бха̄вино; дхамма̄ аничча̄ випарин̣а̄мино ан̃н̃атха̄бха̄вино. йо, бхиккхаве, име дхамме евам̣ саддахати адхимуччати, айам̣ вуччати саддха̄нуса̄рӣ, окканто самматтанийа̄мам̣, саппурисабхӯмим̣ окканто, вӣтиватто путхуджджанабхӯмим̣; абхаббо там̣ каммам̣ ка̄тум̣, йам̣ каммам̣ катва̄ нирайам̣ ва̄ тираччха̄найоним̣ ва̄ петтивисайам̣ ва̄ упападжджеййа; абхаббо ча та̄ва ка̄лам̣ ка̄тум̣ йа̄ва на сота̄паттипхалам̣ саччхикароти’’.

3. вин̃н̃а̄н̣асуттам̣

304. са̄ваттхинида̄нам̣. ‘‘чаккхувин̃н̃а̄н̣ам̣, бхиккхаве, аниччам̣ випарин̣а̄ми ан̃н̃атха̄бха̄ви; сотавин̃н̃а̄н̣ам̣… гха̄навин̃н̃а̄н̣ам̣… дживха̄вин̃н̃а̄н̣ам̣… ка̄йавин̃н̃а̄н̣ам̣… мановин̃н̃а̄н̣ам̣ аниччам̣ випарин̣а̄ми ан̃н̃атха̄бха̄ви. йо бхиккхаве…пе… самбодхипара̄йано’’ти. татийам̣.

4. сампхассасуттам̣

305. са̄ваттхинида̄нам̣. ‘‘чаккхусампхассо, бхиккхаве, аниччо випарин̣а̄мӣ ан̃н̃атха̄бха̄вӣ; сотасампхассо… гха̄насампхассо… дживха̄сампхассо… ка̄йасампхассо… маносампхассо аниччо випарин̣а̄мӣ ан̃н̃атха̄бха̄вӣ. йо, бхиккхаве, име дхамме евам̣ саддахати адхимуччати, айам̣ вуччати ‘саддха̄нуса̄рӣ…пе… самбодхипара̄йано’’’ти. чатуттхам̣.

5. сампхассаджа̄суттам̣

306. са̄ваттхинида̄нам̣. ‘‘чаккхусампхассаджа̄, бхиккхаве, ведана̄ аничча̄ випарин̣а̄мӣ ан̃н̃атха̄бха̄вӣ; сотасампхассаджа̄ ведана̄…пе… гха̄насампхассаджа̄ ведана̄…пе… дживха̄сампхассаджа̄ ведана̄…пе… ка̄йасампхассаджа̄ ведана̄…пе… маносампхассаджа̄ ведана̄ аничча̄ випарин̣а̄мӣ ан̃н̃атха̄бха̄вӣ. йо, бхиккхаве, име дхамме евам̣ саддахати адхимуччати, айам̣ вуччати ‘саддха̄нуса̄рӣ…пе… самбодхипара̄йано’’’ти. пан̃чамам̣.

6. рӯпасан̃н̃а̄суттам̣

307. са̄ваттхинида̄нам̣. ‘‘рӯпасан̃н̃а̄, бхиккхаве, аничча̄ випарин̣а̄мӣ ан̃н̃атха̄бха̄вӣ; саддасан̃н̃а̄… гандхасан̃н̃а̄… расасан̃н̃а̄… пхот̣т̣хаббасан̃н̃а̄… дхаммасан̃н̃а̄ аничча̄ випарин̣а̄мӣ ан̃н̃атха̄бха̄вӣ. йо, бхиккхаве, име дхамме евам̣ саддахати адхимуччати, айам̣ вуччати ‘саддха̄нуса̄рӣ…пе… самбодхипара̄йано’’’ти. чхат̣т̣хам̣.

7. рӯпасан̃четана̄суттам̣

308. са̄ваттхинида̄нам̣. ‘‘рӯпасан̃четана̄, бхиккхаве, аничча̄ випарин̣а̄мӣ ан̃н̃атха̄бха̄вӣ; саддасан̃четана̄… гандхасан̃четана̄… расасан̃четана̄… пхот̣т̣хаббасан̃четана̄… дхаммасан̃четана̄ аничча̄ випарин̣а̄мӣ ан̃н̃атха̄бха̄вӣ. йо, бхиккхаве, име дхамме евам̣ саддахати адхимуччати, айам̣ вуччати ‘саддха̄нуса̄рӣ…пе… самбодхипара̄йано’’’ти. саттамам̣.

8. рӯпатан̣ха̄суттам̣

309. са̄ваттхинида̄нам̣. ‘‘рӯпатан̣ха̄, бхиккхаве, аничча̄ випарин̣а̄мӣ ан̃н̃атха̄бха̄вӣ; саддатан̣ха̄… гандхатан̣ха̄… расатан̣ха̄… пхот̣т̣хаббатан̣ха̄… дхамматан̣ха̄ аничча̄ випарин̣а̄мӣ ан̃н̃атха̄бха̄вӣ. йо, бхиккхаве, име дхамме евам̣ саддахати адхимуччати, айам̣ вуччати ‘саддха̄нуса̄рӣ…пе… самбодхипара̄йано’’’ти. ат̣т̣хамам̣.

9. патхавӣдха̄тусуттам̣

310. са̄ваттхинида̄нам̣. ‘‘патхавӣдха̄ту, бхиккхаве, аничча̄ випарин̣а̄мӣ ан̃н̃атха̄бха̄вӣ; а̄подха̄ту… теджодха̄ту… ва̄йодха̄ту… а̄ка̄садха̄ту… вин̃н̃а̄н̣адха̄ту аничча̄ випарин̣а̄мӣ ан̃н̃атха̄бха̄вӣ. йо, бхиккхаве, име дхамме евам̣ саддахати адхимуччати, айам̣ вуччати ‘саддха̄нуса̄рӣ…пе… самбодхипара̄йано’’’ти. навамам̣.

10. кхандхасуттам̣

311. са̄ваттхинида̄нам̣. ‘‘рӯпам̣, бхиккхаве, аниччам̣ випарин̣а̄ми ан̃н̃атха̄бха̄ви; ведана̄ аничча̄ випарин̣а̄мӣ ан̃н̃атха̄бха̄вӣ; сан̃н̃а̄… сан̇кха̄ра̄ аничча̄ випарин̣а̄мино ан̃н̃атха̄бха̄вино; вин̃н̃а̄н̣ам̣ аниччам̣ випарин̣а̄ми ан̃н̃атха̄бха̄ви. йо, бхиккхаве, име дхамме евам̣ саддахати адхимуччати, айам̣ вуччати саддха̄нуса̄рӣ, окканто самматтанийа̄мам̣, саппурисабхӯмим̣ окканто, вӣтиватто путхуджджанабхӯмим̣; абхаббо там̣ каммам̣ ка̄тум̣, йам̣ каммам̣ катва̄ нирайам̣ ва̄ тираччха̄найоним̣ ва̄ петтивисайам̣ ва̄ упападжджеййа; абхаббо ча та̄ва ка̄лам̣ ка̄тум̣ йа̄ва на сота̄паттипхалам̣ саччхикароти’’.

оккантасам̣йуттам̣ [оккантикасам̣йуттам̣ (пӣ. ка.)] саматтам̣.