3. бхаванеттисуттам̣

162. са̄ваттхинида̄нам̣. екамантам̣ нисинно кхо а̄йасма̄ ра̄дхо бхагавантам̣ етадавоча – ‘‘‘бхаванеттиниродхо [бхаванетти (сӣ. сйа̄. кам̣. пӣ.)], бхаванеттиниродхо’ти [бхаванеттӣти (сӣ. сйа̄. кам̣.)], бханте, вуччати. катама̄ ну кхо, бханте, бхаванетти, катамо бхаванеттиниродхо’’ти? ‘‘рӯпе кхо, ра̄дха, йо чхандо йо ра̄го йа̄ нандӣ йа̄ тан̣ха̄ йе упайупа̄да̄на̄ четасо адхит̣т̣ха̄на̄бхинивеса̄нусайа̄ – айам̣ вуччати бхаванетти. тесам̣ ниродхо [ниродха̄ (сӣ. сйа̄. кам̣. пӣ.)] бхаванеттиниродхо. ведана̄йа… сан̃н̃а̄йа… сан̇кха̄ресу … вин̃н̃а̄н̣е йо чхандо…пе… адхит̣т̣ха̄на̄бхинивеса̄нусайа̄ – айам̣ вуччати бхаванетти. тесам̣ ниродхо бхаванеттиниродхо’’ти. татийам̣.