2. сама̄дхимӯлакат̣хитисуттам̣

663. са̄ваттхинида̄нам̣. ‘‘чатта̄роме, бхиккхаве, джха̄йӣ. катаме чатта̄ро? идха, бхиккхаве, екаччо джха̄йӣ сама̄дхисмим̣ сама̄дхикусало хоти, на сама̄дхисмим̣ т̣хитикусало. идха пана, бхиккхаве, екаччо джха̄йӣ сама̄дхисмим̣ т̣хитикусало хоти, на сама̄дхисмим̣ сама̄дхикусало. идха пана, бхиккхаве, екаччо джха̄йӣ нева сама̄дхисмим̣ сама̄дхикусало хоти, на ча сама̄дхисмим̣ т̣хитикусало. идха пана, бхиккхаве, екаччо джха̄йӣ сама̄дхисмим̣ сама̄дхикусало ча хоти, сама̄дхисмим̣ т̣хитикусало ча. татра, бхиккхаве, йва̄йам̣ джха̄йӣ сама̄дхисмим̣ сама̄дхикусало ча хоти сама̄дхисмим̣ т̣хитикусало ча айам̣ имесам̣ чатуннам̣ джха̄йӣнам̣ агго ча сет̣т̣хо ча моккхо ча уттамо ча паваро ча. сеййатха̄пи, бхиккхаве, гава̄ кхӣрам̣, кхӣрамха̄ дадхи, дадхимха̄ наванӣтам̣, наванӣтамха̄ саппи, саппимха̄ саппиман̣д̣о татра аггамаккха̄йати; евамева кхо, бхиккхаве, йва̄йам̣ джха̄йӣ сама̄дхисмим̣ сама̄дхикусало ча хоти сама̄дхисмим̣ т̣хитикусало ча айам̣ имесам̣ чатуннам̣ джха̄йӣнам̣ агго ча сет̣т̣хо ча моккхо ча уттамо ча паваро ча̄’’ти. дутийам̣.