2. сучаритасуттам̣

439. са̄ваттхинида̄нам̣. екамантам̣ нисинно кхо со бхиккху бхагавантам̣ етадавоча – ‘‘ко ну кхо, бханте, хету, ко паччайо, йена мидхекаччо ка̄йасса бхеда̄ парам̣ маран̣а̄ гандхаббака̄йика̄нам̣ дева̄нам̣ сахабйатам̣ упападжджатӣ’’ти? ‘‘идха, бхиккху, екаччо ка̄йена сучаритам̣ чарати, ва̄ча̄йа сучаритам̣ чарати, манаса̄ сучаритам̣ чарати. тасса сутам̣ хоти – ‘гандхаббака̄йика̄ дева̄ дӣгха̄йука̄ ван̣н̣аванто сукхабахула̄’ти. тасса евам̣ хоти – ‘ахо вата̄хам̣ ка̄йасса бхеда̄ парам̣ маран̣а̄ гандхаббака̄йика̄нам̣ дева̄нам̣ сахабйатам̣ упападжджеййа’нти. со ка̄йасса бхеда̄ парам̣ маран̣а̄ гандхаббака̄йика̄нам̣ дева̄нам̣ сахабйатам̣ упападжджати. айам̣ кхо, бхиккху, хету, айам̣ паччайо, йена мидхекаччо ка̄йасса бхеда̄ парам̣ маран̣а̄ гандхаббака̄йика̄нам̣ дева̄нам̣ сахабйатам̣ упападжджатӣ’’ти. дутийам̣.