8. дутийаупа̄да̄паритассана̄суттам̣

8. са̄ваттхинида̄нам̣. ‘‘упа̄да̄паритассанан̃ча во, бхиккхаве, десесса̄ми анупа̄да̄апаритассанан̃ча. там̣ сун̣а̄тха…пе… катхан̃ча, бхиккхаве, упа̄да̄паритассана̄ хоти? идха, бхиккхаве, ассутава̄ путхуджджано рӯпам̣ ‘етам̣ мама, есохамасми, есо ме атта̄’ти саманупассати. тасса там̣ рӯпам̣ випарин̣амати ан̃н̃атха̄ хоти. тасса рӯпавипарин̣а̄ман̃н̃атха̄бха̄ва̄ уппаджджанти сокапаридевадуккхадоманассупа̄йа̄са̄. веданам̣ етам̣ мама…пе… сан̃н̃ам̣ етам̣ мама… сан̇кха̄ре етам̣ мама… вин̃н̃а̄н̣ам̣ ‘етам̣ мама, есохамасми, есо ме атта̄’ти саманупассати. тасса там̣ вин̃н̃а̄н̣ам̣ випарин̣амати ан̃н̃атха̄ хоти. тасса вин̃н̃а̄н̣авипарин̣а̄ман̃н̃атха̄бха̄ва̄ уппаджджанти сокапаридевадуккхадоманассупа̄йа̄са̄. евам̣ кхо, бхиккхаве, упа̄да̄паритассана̄ хоти.

‘‘катхан̃ча, бхиккхаве, анупа̄да̄апаритассана̄ хоти? идха, бхиккхаве, сутава̄ арийаса̄вако рӯпам̣ ‘нетам̣ мама, несохамасми, на месо атта̄’ти саманупассати. тасса там̣ рӯпам̣ випарин̣амати ан̃н̃атха̄ хоти. тасса рӯпавипарин̣а̄ман̃н̃атха̄бха̄ва̄ нуппаджджанти сокапаридевадуккхадоманассупа̄йа̄са̄. веданам̣ нетам̣ мама… сан̃н̃ам̣ нетам̣ мама… сан̇кха̄ре нетам̣ мама… вин̃н̃а̄н̣ам̣ ‘нетам̣ мама, несохамасми, на месо атта̄’ти саманупассати. тасса там̣ вин̃н̃а̄н̣ам̣ випарин̣амати ан̃н̃атха̄ хоти. тасса вин̃н̃а̄н̣авипарин̣а̄ман̃н̃атха̄бха̄ва̄ нуппаджджанти сокапаридевадуккхадоманассупа̄йа̄са̄. евам̣ кхо, бхиккхаве, анупа̄да̄апаритассана̄ хотӣ’’ти. ат̣т̣хамам̣.