2. накхасикхасуттам̣

224. са̄ваттхийам̣ вихарати. атха кхо бхагава̄ париттам̣ накхасикха̄йам̣ пам̣сум̣ а̄ропетва̄ бхиккхӯ а̄мантеси – ‘‘там̣ ким̣ ман̃н̃атха бхиккхаве, катамам̣ ну кхо бахутарам̣, йо ва̄йам̣ [йо ча̄йам̣ (бахӯсу)] майа̄ паритто накхасикха̄йам̣ пам̣су а̄ропито айам̣ ва̄ [йа̄ ча̄йам̣ (сйа̄. ка.)] маха̄патхавӣ’’ти? ‘‘етадева, бханте, бахутарам̣ йадидам̣ маха̄патхавӣ. аппаматтакойам̣ бхагавата̄ паритто накхасикха̄йам̣ пам̣су а̄ропито. сан̇кхампи на упети упанидхимпи на упети калабха̄гампи на упети маха̄патхавим̣ упанидха̄йа бхагавата̄ паритто накхасикха̄йам̣ пам̣су а̄ропито’’ти. ‘‘евамева кхо, бхиккхаве, аппака̄ те сатта̄ йе мануссесу пачча̄джа̄йанти; атха кхо етейева бахутара̄ сатта̄ йе ан̃н̃атра мануссехи пачча̄джа̄йанти. тасма̄тиха, бхиккхаве, евам̣ сиккхитаббам̣ – ‘аппаматта̄ вихарисса̄ма̄’ти. еван̃хи во, бхиккхаве, сиккхитабба’’нти. дутийам̣.