2. дутийавагго

1. сасӣсакасуттам̣

212. евам̣ ме сутам̣ – екам̣ самайам̣ ра̄джагахе вел̣уване. ‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ пурисам̣ гӯтхакӯпе сасӣсакам̣ нимуггам̣…пе… есо, бхиккхаве, сатто имасмим̣йева ра̄джагахе па̄рада̄рико ахоси…пе…. пат̣хамам̣.

2. гӯтхакха̄дасуттам̣

213. ‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ пурисам̣ гӯтхакӯпе нимуггам̣ убхохи хаттхехи гӯтхам̣ кха̄дантам̣…пе… есо, бхиккхаве, сатто имасмим̣йева ра̄джагахе дут̣т̣хабра̄хман̣о ахоси. со кассапасса самма̄самбуддхасса па̄вачане бхиккхусан̇гхам̣ бхаттена нимантетва̄ дон̣ийо [дон̣ийа̄ (сйа̄. кам̣. пӣ. ка.)] гӯтхасса пӯра̄петва̄ етадавоча – ахо бхонто, йа̄вадаттхам̣ бхун̃джанту чева харанту ча̄ти…пе…. дутийам̣.

3. ниччхавиттхисуттам̣

214. ‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ ниччхавим̣ иттхим̣ веха̄сам̣ гаччхантим̣. таменам̣ гиджджха̄пи ка̄ка̄пи кулала̄пи анупатитва̄ анупатитва̄ витаччхенти вира̄дженти. са̄ судам̣ ат̣т̣ассарам̣ кароти…пе… еса̄, бхиккхаве, иттхӣ имасмим̣йева ра̄джагахе атича̄ринӣ ахоси…пе…. татийам̣.

4. ман̇гулиттхисуттам̣

215. ‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ иттхим̣ дуггандхам̣ ман̇гулим̣ веха̄сам̣ гаччхантим̣. таменам̣ гиджджха̄пи ка̄ка̄пи кулала̄пи анупатитва̄ анупатитва̄ витаччхенти вира̄дженти. са̄ судам̣ ат̣т̣ассарам̣ кароти…пе… еса̄, бхиккхаве, иттхӣ имасмим̣йева ра̄джагахе иккхан̣ика̄ ахоси…пе…. чатуттхам̣.

5. окилинӣсуттам̣

216. ‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ иттхим̣ уппаккам̣ окилиним̣ окириним̣ веха̄сам̣ гаччхантим̣. са̄ судам̣ ат̣т̣ассарам̣ кароти…пе… еса̄, бхиккхаве, иттхӣ калин̇гасса ран̃н̃о аггамахесӣ ахоси. са̄ исса̄паката̄ сапаттим̣ ан̇га̄ракат̣а̄хена окири…пе…. пан̃чамам̣.

6. асӣсакасуттам̣

217. ‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ асӣсакам̣ кабандхам̣ [кавандхам̣ (сӣ. пӣ.)] веха̄сам̣ гаччхантам̣. тасса уре аккхӣни чева хонти мукхан̃ча. таменам̣ гиджджха̄пи ка̄ка̄пи кулала̄пи анупатитва̄ анупатитва̄ витаччхенти вира̄дженти. со судам̣ ат̣т̣ассарам̣ кароти…пе… есо, бхиккхаве, сатто имасмим̣йева ра̄джагахе ха̄рико на̄ма чорагха̄тако ахоси…пе…. чхат̣т̣хам̣.

7. па̄пабхиккхусуттам̣

218. ‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ бхиккхум̣ веха̄сам̣ гаччхантам̣. тасса сан̇гха̄т̣ипи а̄дитта̄ сампаджджалита̄ саджотибхӯта̄ [сан̃джотибхӯта̄ (сйа̄. кам̣.)], паттопи а̄дитто сампаджджалито саджотибхӯто, ка̄йабандханампи а̄диттам̣ сампаджджалитам̣ саджотибхӯтам̣, ка̄йопи а̄дитто сампаджджалито саджотибхӯто. со судам̣ ат̣т̣ассарам̣ кароти…пе… есо, бхиккхаве, бхиккху кассапасса самма̄самбуддхасса па̄вачане па̄пабхиккху ахоси…пе…. саттамам̣.

8. па̄пабхиккхунӣсуттам̣

219. ‘‘аддасам̣ бхиккхуним̣ веха̄сам̣ гаччхантим̣. тасса̄ сан̇гха̄т̣ипи а̄дитта̄…пе… па̄пабхиккхунӣ ахоси…пе…. ат̣т̣хамам̣.

9. па̄пасиккхама̄насуттам̣

220. ‘‘аддасам̣ сиккхама̄нам̣ веха̄сам̣ гаччхантим̣. тасса̄ сан̇гха̄т̣ипи а̄дитта̄…пе… па̄пасиккхама̄на̄ ахоси…пе…. навамам̣.

10. па̄паса̄ман̣ерасуттам̣

221. ‘‘аддасам̣ са̄ман̣ерам̣ веха̄сам̣ гаччхантам̣. тасса сан̇гха̄т̣ипи а̄дитта̄…пе… па̄паса̄ман̣еро ахоси…пе…. дасамам̣.

11. па̄паса̄ман̣ерӣсуттам̣

222. ‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ са̄ман̣ерим̣ веха̄сам̣ гаччхантим̣. тасса̄ сан̇гха̄т̣ипи а̄дитта̄ сампаджджалита̄ саджотибхӯта̄, паттопи а̄дитто сампаджджалито саджотибхӯто, ка̄йабандханампи а̄диттам̣ сампаджджалитам̣ саджотибхӯтам̣, ка̄йопи а̄дитто сампаджджалито саджотибхӯто. са̄ судам̣ ат̣т̣ассарам̣ кароти. тасса майхам̣, а̄вусо, етадахоси – ‘аччхарийам̣ вата, бхо, аббхутам̣ вата, бхо! еварӯпопи на̄ма сатто бхависсати! еварӯпопи на̄ма йаккхо бхависсати! еварӯпопи на̄ма аттабха̄вапат̣ила̄бхо бхависсатӣ’’’ти!!

атха кхо бхагава̄ бхиккхӯ а̄мантеси – ‘‘чаккхубхӯта̄ вата, бхиккхаве, са̄вака̄ вихаранти; н̃а̄н̣абхӯта̄ вата, бхиккхаве, са̄вака̄ вихаранти, йатра хи на̄ма са̄вако еварӯпам̣ н̃ассати ва̄ даккхати ва̄ саккхим̣ ва̄ кариссати. пуббева ме са̄, бхиккхаве, са̄ман̣ерӣ дит̣т̣ха̄ ахоси. апи ча̄хам̣ на бйа̄ка̄сим̣. ахан̃четам̣ бйа̄кареййам̣, паре ча ме на саддахеййум̣. йе ме на саддахеййум̣, тесам̣ там̣ асса дӣгхараттам̣ ахита̄йа дуккха̄йа. еса̄, бхиккхаве, са̄ман̣ерӣ кассапасса самма̄самбуддхасса па̄вачане па̄паса̄ман̣ерӣ ахоси. са̄ тасса каммасса випа̄кена бахӯни васса̄ни бахӯни вассасата̄ни бахӯни вассасахасса̄ни бахӯни вассасатасахасса̄ни нирайе паччитва̄ тассева каммасса випа̄ка̄васесена еварӯпам̣ аттабха̄вапат̣ила̄бхам̣ пат̣исам̣ведайатӣ’’ти. ека̄дасамам̣.

дутийо вагго.

тассудда̄нам̣ –

кӯпе нимугго хи со па̄рада̄рико;

гӯтхакха̄ди аху дут̣т̣хабра̄хман̣о.

ниччхавиттхи атича̄ринӣ аху;

ман̇гулиттхи аху иккхан̣иттхика̄.

окилини сапаттан̇га̄рокири;

сӣсаччхинно аху чорагха̄тако.

бхиккху бхиккхунӣ сиккхама̄на̄;

са̄ман̣еро атха са̄ман̣ерика̄.

кассапасса винайасмим̣ паббаджджам̣;

па̄пакаммам̣ карим̣су та̄вадети.

лаккхан̣асам̣йуттам̣ саматтам̣.