4. навасуттам̣

238. са̄ваттхийам̣ вихарати. тена кхо пана самайена ан̃н̃атаро наво бхиккху паччха̄бхаттам̣ пин̣д̣апа̄тапат̣икканто виха̄рам̣ пависитва̄ аппоссукко тун̣хӣбхӯто сан̇каса̄йати, на бхиккхӯнам̣ веййа̄ваччам̣ кароти чӣварака̄расамайе. атха кхо самбахула̄ бхиккхӯ йена бхагава̄ тенупасан̇камим̣су; упасан̇камитва̄ бхагавантам̣ абхива̄детва̄ екамантам̣ нисӣдим̣су. екамантам̣ нисинна̄ кхо те бхиккхӯ бхагавантам̣ етадавочум̣ – ‘‘идха, бханте, ан̃н̃атаро наво бхиккху паччха̄бхаттам̣ пин̣д̣апа̄тапат̣икканто виха̄рам̣ пависитва̄ аппоссукко тун̣хӣбхӯто сан̇каса̄йати, на бхиккхӯнам̣ веййа̄ваччам̣ кароти чӣварака̄расамайе’’ти.

атха кхо бхагава̄ ан̃н̃атарам̣ бхиккхум̣ а̄мантеси – ‘‘ехи твам̣, бхиккху, мама вачанена там̣ бхиккхум̣ а̄мантехи ‘саттха̄ там̣, а̄вусо, а̄мантетӣ’’’ти. ‘‘евам̣ бханте’’ти кхо со бхиккху бхагавато пат̣иссутва̄ йена со бхиккху тенупасан̇ками; упасан̇камитва̄ там̣ бхиккхум̣ етадавоча – ‘‘саттха̄ там̣, а̄вусо, а̄мантетӣ’’ти. ‘‘евама̄вусо’’ти кхо со бхиккху тасса бхиккхуно пат̣иссутва̄ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо там̣ бхиккхум̣ бхагава̄ етадавоча – ‘‘саччам̣ кира твам̣, бхиккху, паччха̄бхаттам̣ пин̣д̣апа̄тапат̣икканто виха̄рам̣ пависитва̄ аппоссукко тун̣хӣбхӯто сан̇каса̄йаси, на бхиккхӯнам̣ веййа̄ваччам̣ кароси чӣварака̄расамайе’’ти? ‘‘ахампи кхо, бханте, сакам̣ киччам̣ каромӣ’’ти.

атха кхо бхагава̄ тасса бхиккхуно четаса̄ четопаривитаккаман̃н̃а̄йа бхиккхӯ а̄мантеси – ‘‘ма̄ кхо тумхе, бхиккхаве, етасса бхиккхуно уджджха̄йиттха. есо кхо, бхиккхаве, бхиккху чатуннам̣ джха̄на̄нам̣ а̄бхичетасика̄нам̣ дит̣т̣хадхаммасукхавиха̄ра̄нам̣ ника̄мала̄бхӣ акиччхала̄бхӣ акасирала̄бхӣ, йасса чаттха̄йа кулапутта̄ саммадева ага̄расма̄ анага̄рийам̣ паббаджанти, тадануттарам̣ брахмачарийапарийоса̄нам̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа вихаратӣ’’ти.

идамавоча бхагава̄. идам̣ ватва̄на сугато атха̄парам̣ етадавоча саттха̄ –

‘‘найидам̣ ситхилама̄раббха, найидам̣ аппена тха̄маса̄;

нибба̄нам̣ адхигантаббам̣, саббадуккхаппамочанам̣.

‘‘айан̃ча дахаро бхиккху, айамуттамапурисо;

дха̄рети антимам̣ дехам̣, джетва̄ ма̄рам̣ сава̄хини’’нти. чатуттхам̣;