12. саха̄йакасуттам̣

246. са̄ваттхийам̣ вихарати. атха кхо две бхиккхӯ саха̄йака̄ а̄йасмато маха̄каппинасса саддхивиха̄рино йена бхагава̄ тенупасан̇камим̣су. аддаса̄ кхо бхагава̄ те бхиккхӯ дӯратова а̄гаччханте. дисва̄на бхиккхӯ а̄мантеси – ‘‘пассатха но тумхе, бхиккхаве, ете бхиккхӯ саха̄йаке а̄гаччханте каппинасса саддхивиха̄рино’’ти? ‘‘евам̣, бханте’’. ‘‘ете кхо те бхиккхӯ махиддхика̄ маха̄нубха̄ва̄. на ча са̄ сама̄патти сулабхарӯпа̄, йа̄ техи бхиккхӯхи асама̄паннапубба̄. йасса чаттха̄йа кулапутта̄ саммадева ага̄расма̄ анага̄рийам̣ паббаджанти тадануттарам̣ брахмачарийапарийоса̄нам̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа вихарантӣ’’ти.

идамавоча бхагава̄. идам̣ ватва̄на сугато атха̄парам̣ етадавоча саттха̄ –

‘‘саха̄йа̄ ватиме бхиккхӯ, чирараттам̣ саметика̄;

самети несам̣ саддхаммо, дхамме буддхаппаведите.

‘‘сувинӣта̄ каппинена, дхамме арийаппаведите;

дха̄ренти антимам̣ дехам̣, джетва̄ ма̄рам̣ сава̄хини’’нти. два̄дасамам̣;

бхиккхусам̣йуттам̣ саматтам̣.