10. тхерана̄макасуттам̣

244. екам̣ самайам̣ бхагава̄ ра̄джагахе вихарати вел̣уване каландаканива̄пе. тена кхо пана самайена ан̃н̃атаро бхиккху тхерана̄мако екавиха̄рӣ чева хоти екавиха̄расса ча ван̣н̣ава̄дӣ. со еко га̄мам̣ пин̣д̣а̄йа пависати еко пат̣иккамати еко рахо нисӣдати еко чан̇камам̣ адхит̣т̣ха̄ти. атха кхо самбахула̄ бхиккхӯ йена бхагава̄ тенупасан̇камим̣су; упасан̇камитва̄ бхагавантам̣ абхива̄детва̄ екамантам̣ нисӣдим̣су. екамантам̣ нисинна̄ кхо те бхиккхӯ бхагавантам̣ етадавочум̣ – ‘‘идха, бханте, ан̃н̃атаро бхиккху тхерана̄мако екавиха̄рӣ екавиха̄расса ча ван̣н̣ава̄дӣ’’ти.

атха кхо бхагава̄ ан̃н̃атарам̣ бхиккхум̣ а̄мантеси – ‘‘ехи твам̣, бхиккху, мама вачанена тхерам̣ бхиккхум̣ а̄мантехи – ‘саттха̄ там̣, а̄вусо тхера, а̄мантетӣ’’’ти. ‘‘евам̣, бханте’’ти кхо со бхиккху бхагавато пат̣иссутва̄ йена̄йасма̄ тхеро тенупасан̇ками; упасан̇камитва̄ а̄йасмантам̣ тхерам̣ етадавоча – ‘‘саттха̄ там̣, а̄вусо тхера, а̄мантетӣ’’ти. ‘‘евама̄вусо’’ти кхо а̄йасма̄ тхеро тасса бхиккхуно пат̣иссутва̄ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо а̄йасмантам̣ тхерам̣ бхагава̄ етадавоча – ‘‘саччам̣ кира твам̣, тхера, екавиха̄рӣ екавиха̄расса ча ван̣н̣ава̄дӣ’’ти? ‘‘евам̣, бханте’’. ‘‘йатха̄ катхам̣ пана твам̣, тхера, екавиха̄рӣ екавиха̄расса ча ван̣н̣ава̄дӣ’’ти? ‘‘идха̄хам̣, бханте, еко га̄мам̣ пин̣д̣а̄йа пависа̄ми еко пат̣иккама̄ми еко рахо нисӣда̄ми еко чан̇камам̣ адхит̣т̣ха̄ми. евам̣ кхва̄хам̣, бханте, екавиха̄рӣ екавиха̄расса ча ван̣н̣ава̄дӣ’’ти.

‘‘аттхесо, тхера, екавиха̄ро несо наттхӣти вада̄ми. апи ча, тхера, йатха̄ екавиха̄ро виттха̄рена парипун̣н̣о хоти там̣ сун̣а̄хи, са̄дхукам̣ манаси карохи; бха̄сисса̄мӣ’’ти. ‘‘евам̣, бханте’’ти кхо…пе…. ‘‘катхан̃ча, тхера, екавиха̄ро виттха̄рена парипун̣н̣о хоти. идха, тхера, йам̣ атӣтам̣ там̣ пахӣнам̣, йам̣ ана̄гатам̣ там̣ пат̣иниссат̣т̣хам̣, паччуппаннесу ча аттабха̄вапат̣ила̄бхесу чхандара̄го суппат̣ивинӣто. евам̣ кхо, тхера, екавиха̄ро виттха̄рена парипун̣н̣о хотӣ’’ти.

идамавоча бхагава̄. идам̣ ватва̄на сугато атха̄парам̣ етадавоча саттха̄ –

‘‘сабба̄бхибхум̣ саббавидум̣ сумедхам̣,

саббесу дхаммесу анӯпалиттам̣;

саббан̃джахам̣ тан̣ха̄ккхайе вимуттам̣,

тамахам̣ нарам̣ екавиха̄рӣти брӯмӣ’’ти. дасамам̣;