3. татийавагго

1. чхетва̄суттам̣

267. са̄ваттхийам̣ джетаване. атха кхо сакко дева̄наминдо йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ ат̣т̣ха̄си. екамантам̣ т̣хито кхо сакко дева̄наминдо бхагавантам̣ га̄тха̄йа аджджхабха̄си –

‘‘ким̣су чхетва̄ сукхам̣ сети, ким̣су чхетва̄ на сочати;

киссассу екадхаммасса, вадхам̣ рочеси готама̄’’ти.

‘‘кодхам̣ чхетва̄ сукхам̣ сети, кодхам̣ чхетва̄ на сочати;

кодхасса висамӯласса, мадхураггасса ва̄сава;

вадхам̣ арийа̄ пасам̣санти, тан̃хи чхетва̄ на сочатӣ’’ти.

2. дуббан̣н̣ийасуттам̣

268. са̄ваттхийам̣ джетаване. татра кхо…пе… етадавоча – ‘‘бхӯтапуббам̣, бхиккхаве, ан̃н̃атаро йаккхо дуббан̣н̣о окот̣имако саккасса дева̄наминдасса а̄сане нисинно ахоси. татра судам̣, бхиккхаве, дева̄ та̄ватим̣са̄ уджджха̄йанти кхиййанти випа̄ченти – ‘аччхарийам̣ вата бхо, аббхутам̣ вата, бхо! айам̣ йаккхо дуббан̣н̣о окот̣имако саккасса дева̄наминдасса а̄сане нисинно’’’ти! йатха̄ йатха̄ кхо, бхиккхаве, дева̄ та̄ватим̣са̄ уджджха̄йанти кхиййанти випа̄ченти, татха̄ татха̄ со йаккхо абхирӯпатаро чева хоти дассанӣйатаро ча па̄са̄дикатаро ча.

‘‘атха кхо, бхиккхаве, дева̄ та̄ватим̣са̄ йена сакко дева̄наминдо тенупасан̇камим̣су; упасан̇камитва̄ саккам̣ дева̄наминдам̣ етадавочум̣ – ‘идха те, ма̄риса, ан̃н̃атаро йаккхо дуббан̣н̣о окот̣имако саккасса дева̄наминдасса а̄сане нисинно. татра судам̣, ма̄риса, дева̄ та̄ватим̣са̄ уджджха̄йанти кхиййанти випа̄ченти – аччхарийам̣ вата, бхо, аббхутам̣ вата, бхо! айам̣ йаккхо дуббан̣н̣о окот̣имако саккасса дева̄наминдасса а̄сане нисинноти. йатха̄ йатха̄ кхо, ма̄риса, дева̄ уджджха̄йанти кхиййанти випа̄ченти, татха̄ татха̄ со йаккхо абхирӯпатаро чева хоти дассанӣйатаро ча па̄са̄дикатаро ча̄ти. со хи нӯна, ма̄риса, кодхабхаккхо йаккхо бхависсатӣ’’’ти.

‘‘атха кхо, бхиккхаве, сакко дева̄наминдо йена со кодхабхаккхо йаккхо тенупасан̇ками; упасан̇камитва̄ екам̣сам̣ уттара̄сан̇гам̣ каритва̄ даккхин̣аджа̄н̣уман̣д̣алам̣ патхавийам̣ нихантва̄ йена со кодхабхаккхо йаккхо тенан̃джалим̣ пан̣а̄метва̄ тиккхаттум̣ на̄мам̣ са̄вети – ‘саккохам̣ ма̄риса, дева̄наминдо, саккохам̣, ма̄риса, дева̄наминдо’ти. йатха̄ йатха̄ кхо, бхиккхаве, сакко дева̄наминдо на̄мам̣ са̄веси, татха̄ татха̄ со йаккхо дуббан̣н̣атаро чева ахоси окот̣имакатаро ча. дуббан̣н̣атаро чева хутва̄ окот̣имакатаро ча таттхевантарадха̄йӣ’’ти. атха кхо, бхиккхаве, сакко дева̄наминдо саке а̄сане нисӣдитва̄ деве та̄ватим̣се анунайама̄но та̄йам̣ вела̄йам̣ има̄ га̄тха̄йо абха̄си –

‘‘на сӯпахатачиттомхи, на̄ваттена сува̄найо;

на во чира̄хам̣ куджджха̄ми, кодхо майи на̄ватит̣т̣хати.

‘‘куддха̄хам̣ на пхарусам̣ брӯми, на ча дхамма̄ни киттайе;

саннигган̣ха̄ми атта̄нам̣, сампассам̣ аттхаматтано’’ти.

3. самбарима̄йа̄суттам̣

269. са̄ваттхийам̣…пе… бхагава̄ етадавоча – ‘‘бхӯтапуббам̣, бхиккхаве, вепачитти асуриндо а̄ба̄дхико ахоси дуккхито ба̄л̣хагила̄но. атха кхо бхиккхаве, сакко дева̄наминдо йена вепачитти асуриндо тенупасан̇ками гила̄напуччхако. аддаса̄ кхо, бхиккхаве, вепачитти асуриндо саккам̣ дева̄наминдам̣ дӯратова а̄гаччхантам̣. дисва̄на саккам̣ дева̄наминдам̣ етадавоча – ‘тикиччха мам̣ дева̄наминда̄’ти. ‘ва̄чехи мам̣, вепачитти, самбарима̄йа’нти. ‘на та̄ва̄хам̣ ва̄чеми, йа̄ва̄хам̣, ма̄риса, асуре пат̣ипуччха̄мӣ’’’ти. ‘‘атха кхо, бхиккхаве, вепачитти асуриндо асуре пат̣ипуччхи – ‘ва̄чемахам̣, ма̄риса̄, саккам̣ дева̄наминдам̣ самбарима̄йа’нти? ‘ма̄ кхо твам̣, ма̄риса, ва̄чеси саккам̣ дева̄наминдам̣ самбарима̄йа’’’нти. атха кхо, бхиккхаве, вепачитти асуриндо саккам̣ дева̄наминдам̣ га̄тха̄йа аджджхабха̄си –

‘‘ма̄йа̄вӣ магхава̄ сакка, девара̄джа суджампати;

упети нирайам̣ гхорам̣, самбарова сатам̣ сама’’нти.

4. аччайасуттам̣

270. са̄ваттхийам̣…пе… а̄ра̄ме. тена кхо пана самайена две бхиккхӯ сампайоджесум̣. татреко бхиккху аччасара̄. атха кхо со бхиккху тасса бхиккхуно сантике аччайам̣ аччайато десети; со бхиккху наппат̣игган̣ха̄ти. атха кхо самбахула̄ бхиккхӯ йена бхагава̄ тенупасан̇камим̣су; упасан̇камитва̄ бхагавантам̣ абхива̄детва̄ екамантам̣ нисӣдим̣су. екамантам̣ нисинна̄ кхо те бхиккхӯ бхагавантам̣ етадавочум̣ – ‘‘идха, бханте, две бхиккхӯ сампайоджесум̣, татреко бхиккху аччасара̄. атха кхо со, бханте, бхиккху тасса бхиккхуно сантике аччайам̣ аччайато десети, со бхиккху наппат̣игган̣ха̄тӣ’’ти.

‘‘двеме, бхиккхаве, ба̄ла̄. йо ча аччайам̣ аччайато на пассати, йо ча аччайам̣ десентасса йатха̄дхаммам̣ наппат̣игган̣ха̄’’ти – име кхо, бхиккхаве, две ба̄ла̄. ‘‘двеме, бхиккхаве, пан̣д̣ита̄. йо ча аччайам̣ аччайато пассати, йо ча аччайам̣ десентасса йатха̄дхаммам̣ пат̣игган̣ха̄’’ти – име кхо, бхиккхаве, две пан̣д̣ита̄.

‘‘бхӯтапуббам̣, бхиккхаве, сакко дева̄наминдо судхамма̄йам̣ сабха̄йам̣ деве та̄ватим̣се анунайама̄но та̄йам̣ вела̄йам̣ имам̣ га̄тхам̣ абха̄си –

‘‘кодхо во васама̄йа̄ту, ма̄ ча миттехи во джара̄;

агарахийам̣ ма̄ гарахиттха, ма̄ ча бха̄ситтха песун̣ам̣;

атха па̄паджанам̣ кодхо, паббатова̄бхимаддатӣ’’ти.

5. аккодхасуттам̣

271. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. татра кхо бхагава̄ бхиккхӯ…пе… бхагава̄ етадавоча – ‘‘бхӯтапуббам̣, бхиккхаве, сакко дева̄наминдо судхамма̄йам̣ сабха̄йам̣ деве та̄ватим̣се анунайама̄но та̄йам̣ вела̄йам̣ имам̣ га̄тхам̣ абха̄си –

‘‘ма̄ во кодхо аджджхабхави, ма̄ ча куджджхиттха куджджхатам̣;

аккодхо авихим̣са̄ ча, арийесу ча пат̣ипада̄ [васатӣ сада̄ (сӣ. сйа̄. кам̣. пӣ.)];

атха па̄паджанам̣ кодхо, паббатова̄бхимаддатӣ’’ти.

татийо вагго.

тассудда̄нам̣ –

чхетва̄ дуббан̣н̣ийама̄йа̄, аччайена акодхано;

деситам̣ буддхасет̣т̣хена, идан̃хи саккапан̃чаканти.

саккасам̣йуттам̣ саматтам̣.