6. сандакасуттам̣

223. евам̣ ме сутам̣ – екам̣ самайам̣ бхагава̄ косамбийам̣ вихарати гхосита̄ра̄ме. тена кхо пана самайена сандако парибба̄джако пилаккхагуха̄йам̣ пат̣ивасати махатийа̄ парибба̄джакапариса̄йа саддхим̣ пан̃чаматтехи парибба̄джакасатехи. атха кхо а̄йасма̄ а̄нандо са̄йанхасамайам̣ пат̣исалла̄на̄ вут̣т̣хито бхиккхӯ а̄мантеси – ‘‘а̄йа̄ма̄вусо, йена девакатасоббхо тенупасан̇камисса̄ма гуха̄дассана̄йа̄’’ти. ‘‘евама̄вусо’’ти кхо те бхиккхӯ а̄йасмато а̄нандасса паччассосум̣. атха кхо а̄йасма̄ а̄нандо самбахулехи бхиккхӯхи саддхим̣ йена девакатасоббхо тенупасан̇ками. тена кхо пана самайена сандако парибба̄джако махатийа̄ парибба̄джакапариса̄йа саддхим̣ нисинно хоти унна̄динийа̄ учча̄саддамаха̄садда̄йа анекавихитам̣ тираччха̄накатхам̣ катхентийа̄, сеййатхидам̣ – ра̄джакатхам̣ чоракатхам̣ маха̄маттакатхам̣ сена̄катхам̣ бхайакатхам̣ йуддхакатхам̣ аннакатхам̣ па̄накатхам̣ ваттхакатхам̣ сайанакатхам̣ ма̄ла̄катхам̣ гандхакатхам̣ н̃а̄тикатхам̣ йа̄накатхам̣ га̄макатхам̣ нигамакатхам̣ нагаракатхам̣ джанападакатхам̣ иттхикатхам̣ сӯракатхам̣ висикха̄катхам̣ кумбхат̣т̣ха̄накатхам̣ пуббапетакатхам̣ на̄наттакатхам̣ локаккха̄йикам̣ самуддаккха̄йикам̣ итибхава̄бхавакатхам̣ ити ва̄. аддаса̄ кхо сандако парибба̄джако а̄йасмантам̣ а̄нандам̣ дӯратова а̄гаччхантам̣. дисва̄на сакам̣ парисам̣ сан̣т̣ха̄песи – ‘‘аппасадда̄ бхонто хонту, ма̄ бхонто саддамакаттха; айам̣ саман̣асса готамасса са̄вако а̄гаччхати саман̣о а̄нандо. йа̄вата̄ кхо пана саман̣асса готамасса са̄вака̄ косамбийам̣ пат̣ивасанти, айам̣ тесам̣ ан̃н̃атаро саман̣о а̄нандо. аппасаддака̄ма̄ кхо пана те а̄йасманто аппасаддавинӣта̄ аппасаддасса ван̣н̣ава̄дино; аппева на̄ма аппасаддам̣ парисам̣ видитва̄ упасан̇камитаббам̣ ман̃н̃еййа̄’’ти. атха кхо те парибба̄джака̄ тун̣хӣ ахесум̣.

224. атха кхо а̄йасма̄ а̄нандо йена сандако парибба̄джако тенупасан̇ками. атха кхо сандако парибба̄джако а̄йасмантам̣ а̄нандам̣ етадавоча – ‘‘ету кхо бхавам̣ а̄нандо, сва̄гатам̣ бхото а̄нандасса. чирассам̣ кхо бхавам̣ а̄нандо имам̣ парийа̄йамака̄си йадидам̣ идха̄гамана̄йа. нисӣдату бхавам̣ а̄нандо, идама̄санам̣ пан̃н̃атта’’нти. нисӣди кхо а̄йасма̄ а̄нандо пан̃н̃атте а̄сане. сандакопи кхо парибба̄джако ан̃н̃атарам̣ нӣчам̣ а̄санам̣ гахетва̄ екамантам̣ нисӣди. екамантам̣ нисиннам̣ кхо сандакам̣ парибба̄джакам̣ а̄йасма̄ а̄нандо етадавоча – ‘‘ка̄йануттха, сандака, етарахи катха̄йа саннисинна̄, ка̄ ча пана во антара̄катха̄ виппаката̄’’ти? ‘‘тит̣т̣хатеса̄, бхо а̄нанда, катха̄ йа̄йа майам̣ етарахи катха̄йа саннисинна̄. неса̄ бхото а̄нандасса катха̄ дуллабха̄ бхависсати паччха̄пи савана̄йа. са̄дху вата бхавантам̣йева а̄нандам̣ пат̣ибха̄ту саке а̄чарийаке дхаммӣкатха̄’’ти. ‘‘тена хи, сандака, сун̣а̄хи, са̄дхукам̣ манаси карохи, бха̄сисса̄мӣ’’ти. ‘‘евам̣ бхо’’ти кхо сандако парибба̄джако а̄йасмато а̄нандасса паччассоси. а̄йасма̄ а̄нандо етадавоча – ‘‘чатта̄роме, сандака, тена бхагавата̄ джа̄ната̄ пассата̄ арахата̄ самма̄самбуддхена абрахмачарийава̄са̄ аккха̄та̄ чатта̄ри ча анасса̄сика̄ни брахмачарийа̄ни аккха̄та̄ни, йаттха вин̃н̃ӯ пурисо сасаккам̣ брахмачарийам̣ на васеййа, васанто ча [васанто ва̄ (сӣ. пӣ.) евамупарипи ана̄ра̄дханапаккхе] на̄ра̄дхеййа н̃а̄йам̣ дхаммам̣ кусала’’нти. ‘‘катаме пана те, бхо а̄нанда, тена бхагавата̄ джа̄ната̄ пассата̄ арахата̄ самма̄самбуддхена чатта̄ро абрахмачарийава̄са̄ аккха̄та̄, йаттха вин̃н̃ӯ пурисо сасаккам̣ брахмачарийам̣ на васеййа, васанто ча на̄ра̄дхеййа н̃а̄йам̣ дхаммам̣ кусала’’нти?

225. ‘‘идха, сандака, екаччо саттха̄ евам̣ва̄дӣ хоти евам̣дит̣т̣хи – ‘наттхи диннам̣, наттхи йит̣т̣хам̣, наттхи хутам̣, наттхи сукатадуккат̣а̄нам̣ камма̄нам̣ пхалам̣ випа̄ко, наттхи айам̣ локо, наттхи паролоко, наттхи ма̄та̄, наттхи пита̄, наттхи сатта̄ опапа̄тика̄, наттхи локе саман̣абра̄хман̣а̄ саммаггата̄ самма̄пат̣ипанна̄ йе иман̃ча локам̣ паран̃ча локам̣ сайам̣ абхин̃н̃а̄ саччхикатва̄ паведенти. ча̄тумаха̄бхӯтико айам̣ пурисо йада̄ ка̄лан̇кароти, патхавӣ патхавӣка̄йам̣ анупети анупагаччхати, а̄по а̄пока̄йам̣ анупети анупагаччхати, теджо теджока̄йам̣ анупети анупагаччхати, ва̄йо ва̄йока̄йам̣ анупети анупагаччхати, а̄ка̄сам̣ индрийа̄ни сан̇каманти. а̄сандипан̃чама̄ пуриса̄ матам̣ а̄да̄йа гаччханти, йа̄ва̄л̣а̄хана̄ пада̄ни пан̃н̃а̄йанти. ка̄потака̄ни ат̣т̣хӣни бхаванти. бхассанта̄ а̄хутийо; даттупан̃н̃аттам̣ йадидам̣ да̄нам̣. тесам̣ туччха̄ муса̄ вила̄по йе кечи аттхикава̄дам̣ ваданти. ба̄ле ча пан̣д̣ите ча ка̄йасса бхеда̄ уччхиджджанти винассанти на хонти парам̣ маран̣а̄’ти.

‘‘татра, сандака, вин̃н̃ӯ пурисо ити пат̣исан̃чиккхати – ‘айам̣ кхо бхавам̣ саттха̄ евам̣ва̄дӣ евам̣дит̣т̣хи – наттхи диннам̣, наттхи йит̣т̣хам̣, наттхи хутам̣, наттхи сукатадуккат̣а̄нам̣ камма̄нам̣ пхалам̣ випа̄ко, наттхи айам̣ локо, наттхи паролоко, наттхи ма̄та̄, наттхи пита̄, наттхи сатта̄ опапа̄тика̄, наттхи локе саман̣абра̄хман̣а̄ саммаггата̄ самма̄пат̣ипанна̄ йе иман̃ча локам̣ паран̃ча локам̣ сайам̣ абхин̃н̃а̄ саччхикатва̄ паведенти. ча̄тумаха̄бхӯтико айам̣ пурисо йада̄ ка̄лан̇кароти, патхавӣ патхавӣка̄йам̣ анупети анупагаччхати, а̄по а̄пока̄йам̣ анупети анупагаччхати, теджо теджока̄йам̣ анупети анупагаччхати, ва̄йо ва̄йока̄йам̣ анупети анупагаччхати, а̄ка̄сам̣ индрийа̄ни сан̇каманти. а̄сандипан̃чама̄ пуриса̄ матам̣ а̄да̄йа гаччханти, йа̄ва̄л̣а̄хана̄ пада̄ни пан̃н̃а̄йанти. ка̄потака̄ни ат̣т̣хӣни бхаванти. бхассанта̄ а̄хутийо; даттупан̃н̃аттам̣ йадидам̣ да̄нам̣. тесам̣ туччха̄ муса̄ вила̄по йе кечи аттхикава̄дам̣ ваданти. ба̄ле ча пан̣д̣ите ча ка̄йасса бхеда̄ уччхиджджанти винассанти на хонти парам̣ маран̣а̄’ти. саче имасса бхото саттхуно саччам̣ вачанам̣, акатена ме еттха катам̣, авуситена ме еттха вуситам̣. убхопи майам̣ еттха самасама̄ са̄ман̃н̃ам̣ патта̄, йо ча̄хам̣ на вада̄ми ‘убхо ка̄йасса бхеда̄ уччхиджджисса̄ма, винассисса̄ма, на бхависса̄ма парам̣ маран̣а̄’ти. атирекам̣ кхо панимасса бхото саттхуно наггийам̣ мун̣д̣ийам̣ уккут̣икаппадха̄нам̣ кесамассулочанам̣ йохам̣ путтасамба̄дхасайанам̣ [путтасамба̄дхавасанам̣ (сӣ.)] аджджха̄васанто ка̄сикачанданам̣ паччанубхонто ма̄ла̄гандхавилепанам̣ дха̄ренто джа̄тарӯпараджатам̣ са̄дийанто имина̄ бхота̄ саттха̄ра̄ самасамагатико бхависса̄ми. абхисампара̄йам̣ сохам̣ ким̣ джа̄нанто ким̣ пассанто имасмим̣ саттхари брахмачарийам̣ чарисса̄ми? ‘со абрахмачарийава̄со айа’нти – ити видитва̄ тасма̄ брахмачарийа̄ ниббиджджа паккамати [ниббиджджа̄паккамати (сӣ.)]. айам̣ кхо, сандака, тена бхагавата̄ джа̄ната̄ пассата̄ арахата̄ самма̄самбуддхена пат̣хамо абрахмачарийава̄со аккха̄то йаттха вин̃н̃ӯ пурисо сасаккам̣ брахмачарийам̣ на васеййа, васанто ча на̄ра̄дхеййа н̃а̄йам̣ дхаммам̣ кусалам̣.

226. ‘‘пуна чапарам̣, сандака, идхекаччо саттха̄ евам̣ва̄дӣ хоти евам̣дит̣т̣хи – ‘карото ка̄райато чхиндато чхеда̄пайато пачато па̄ча̄пайато сочайато соча̄пайато киламато килама̄пайато пхандато пханда̄пайато па̄н̣аматипа̄тайато адиннам̣ а̄дийато сандхим̣ чхиндато ниллопам̣ харато ека̄га̄рикам̣ карото парипантхе тит̣т̣хато парада̄рам̣ гаччхато муса̄ бхан̣ато карото на карӣйати па̄пам̣. кхурапарийантена чепи чаккена йо имисса̄ патхавийа̄ па̄н̣е екам̣ мам̣сакхалам̣ екам̣ мам̣сапун̃джам̣ кареййа, наттхи татонида̄нам̣ па̄пам̣, наттхи па̄пасса а̄гамо. даккхин̣ан̃чепи ган̇га̄йа тӣрам̣ гаччхеййа хананто гха̄тенто чхинданто чхеда̄пенто пачанто пача̄пенто, наттхи татонида̄нам̣ па̄пам̣, наттхи па̄пасса а̄гамо. уттаран̃чепи ган̇га̄йа тӣрам̣ гаччхеййа даданто да̄пенто йаджанто йаджа̄пенто, наттхи татонида̄нам̣ пун̃н̃ам̣, наттхи пун̃н̃асса а̄гамо. да̄нена дамена сам̣йамена саччаваджджена наттхи пун̃н̃ам̣, наттхи пун̃н̃асса а̄гамо’ти.

‘‘татра, сандака, вин̃н̃ӯ пурисо ити пат̣исан̃чиккхати – ‘айам̣ кхо бхавам̣ саттха̄ евам̣ва̄дӣ евам̣дит̣т̣хи – карото ка̄райато чхиндато чхеда̄пайато пачато па̄ча̄пайато сочато соча̄пайато киламато килама̄пайато пхандато пханда̄пайато па̄н̣аматипа̄тайато адиннам̣ а̄дийато сандхим̣ чхиндато ниллопам̣ харато ека̄га̄рикам̣ карото парипантхе тит̣т̣хато парада̄рам̣ гаччхато муса̄ бхан̣ато карото на карӣйати па̄пам̣ кхурапарийантена чепи чаккена йо имисса̄ патхавийа̄ па̄н̣е екам̣ мам̣сакхалам̣ екам̣ мам̣сапун̃джам̣ кареййа, наттхи татонида̄нам̣ па̄пам̣, наттхи па̄пасса а̄гамо. даккхин̣ан̃чепи ган̇га̄йа тӣрам̣ гаччхеййа хананто гха̄тенто чхинданто чхеда̄пенто пачанто пача̄пенто, наттхи татонида̄нам̣ па̄пам̣, наттхи па̄пасса а̄гамо. уттаран̃чепи ган̇га̄йа тӣрам̣ гаччхеййа даданто да̄пенто йаджанто йаджа̄пенто, наттхи татонида̄нам̣ пун̃н̃ам̣, наттхи пун̃н̃асса а̄гамо. да̄нена дамена сам̣йамена саччаваджджена наттхи пун̃н̃ам̣, наттхи пун̃н̃асса а̄гамо’ти. саче имасса бхото саттхуно саччам̣ вачанам̣, акатена ме еттха катам̣, авуситена ме еттха вуситам̣. убхопи майам̣ еттха самасама̄ са̄ман̃н̃ам̣ патта̄, йо ча̄хам̣ на вада̄ми ‘убхиннам̣ курутам̣ на карӣйати па̄па’нти. атирекам̣ кхо панимасса бхото саттхуно наггийам̣ мун̣д̣ийам̣ уккут̣икаппадха̄нам̣ кесамассулочанам̣ йохам̣ путтасамба̄дхасайанам̣ аджджха̄васанто ка̄сикачанданам̣ паччанубхонто ма̄ла̄гандхавилепанам̣ дха̄ренто джа̄тарӯпараджатам̣ са̄дийанто имина̄ бхота̄ саттха̄ра̄ самасамагатико бхависса̄ми. абхисампара̄йам̣ сохам̣ ким̣ джа̄нанто ким̣ пассанто имасмим̣ саттхари брахмачарийам̣ чарисса̄ми? ‘со абрахмачарийава̄со айа’нти ити видитва̄ тасма̄ брахмачарийа̄ ниббиджджа паккамати. айам̣ кхо, сандака, тена бхагавата̄ джа̄ната̄ пассата̄ арахата̄ самма̄самбуддхена дутийо абрахмачарийава̄со аккха̄то йаттха вин̃н̃ӯ пурисо сасаккам̣ брахмачарийам̣ на васеййа, васанто ча на̄ра̄дхеййа н̃а̄йам̣ дхаммам̣ кусалам̣.

227. ‘‘пуна чапарам̣, сандака, идхекаччо саттха̄ евам̣ва̄дӣ хоти евам̣дит̣т̣хи – ‘наттхи хету, наттхи паччайо сатта̄нам̣ сам̣килеса̄йа; ахетӯ аппаччайа̄ сатта̄ сам̣килиссанти; наттхи хету, наттхи паччайо сатта̄нам̣ висуддхийа̄; ахетӯ аппаччайа̄ сатта̄ висуджджханти; наттхи балам̣, наттхи вӣрийам̣, наттхи пурисатха̄мо, наттхи пурисапараккамо; саббе сатта̄ саббе па̄н̣а̄ саббе бхӯта̄ саббе джӣва̄ аваса̄ абала̄ авӣрийа̄ нийатисан̇гатибха̄вапарин̣ата̄ чхасвева̄бхиджа̄тӣсу сукхадуккхам̣ пат̣исам̣ведентӣ’ти.

‘‘татра, сандака, вин̃н̃ӯ пурисо ити пат̣исан̃чиккхати – ‘айам̣ кхо бхавам̣ саттха̄ евам̣ва̄дӣ евам̣дит̣т̣хи – наттхи хету, наттхи паччайо сатта̄нам̣ сам̣килеса̄йа, ахетӯ аппаччайа̄ сатта̄ сам̣килиссанти. наттхи хету наттхи паччайо сатта̄нам̣ висуддхийа̄, ахетӯ аппаччайа̄ сатта̄ висуджджханти. наттхи балам̣, наттхи вӣрийам̣, наттхи пурисатха̄мо, наттхи пурисапараккамо, саббе сатта̄ саббе па̄н̣а̄ саббе бхӯта̄ саббе джӣва̄ аваса̄ абала̄ авӣрийа̄ нийатисан̇гатибха̄вапарин̣ата̄ чхасвева̄бхиджа̄тӣсу сукхадуккхам̣ пат̣исам̣ведентӣ’ти. саче имасса бхото саттхуно саччам̣ вачанам̣, акатена ме еттха катам̣, авуситена ме еттха вуситам̣. убхопи майам̣ еттха самасама̄ са̄ман̃н̃ам̣ патта̄, йо ча̄хам̣ на вада̄ми ‘убхо ахетӯ аппаччайа̄ висуджджхисса̄ма̄’ти. атирекам̣ кхо панимасса бхото саттхуно наггийам̣ мун̣д̣ийам̣ уккут̣икаппадха̄нам̣ кесамассулочанам̣ йохам̣ путтасамба̄дхасайанам̣ аджджха̄васанто ка̄сикачанданам̣ паччанубхонто ма̄ла̄гандхавилепанам̣ дха̄ренто джа̄тарӯпараджатам̣ са̄дийанто имина̄ бхота̄ саттха̄ра̄ самасамагатико бхависса̄ми. абхисампара̄йам̣ сохам̣ ким̣ джа̄нанто ким̣ пассанто имасмим̣ саттхари брахмачарийам̣ чарисса̄ми? ‘со абрахмачарийава̄со айа’нти – ити видитва̄ тасма̄ брахмачарийа̄ ниббиджджа паккамати. айам̣ кхо, сандака, тена бхагавата̄ джа̄ната̄ пассата̄ арахата̄ самма̄самбуддхена татийо абрахмачарийава̄со аккха̄то йаттха вин̃н̃ӯ пурисо сасаккам̣ брахмачарийам̣ на васеййа, васанто ча на̄ра̄дхеййа н̃а̄йам̣ дхаммам̣ кусалам̣.

228. ‘‘пуна чапарам̣, сандака, идхекаччо саттха̄ евам̣ва̄дӣ хоти евам̣дит̣т̣хи – ‘саттиме ка̄йа̄ акат̣а̄ акат̣авидха̄ аниммита̄ анимма̄та̄ ван̃джха̄ кӯт̣ат̣т̣ха̄ есикат̣т̣ха̄йит̣т̣хита̄, те на ин̃джанти на випарин̣аманти на ан̃н̃аман̃н̃ам̣ бйа̄ба̄дхенти на̄лам̣ ан̃н̃аман̃н̃асса сукха̄йа ва̄ дуккха̄йа ва̄ сукхадуккха̄йа ва̄. катаме сатта? патхавӣка̄йо а̄пока̄йо теджока̄йо ва̄йока̄йо сукхе дуккхе джӣве саттаме – име саттака̄йа̄ акат̣а̄ акат̣авидха̄ аниммита̄ анимма̄та̄ ван̃джха̄ кӯт̣ат̣т̣ха̄ есикат̣т̣ха̄йит̣т̣хита̄. те на ин̃джанти на випарин̣аманти на ан̃н̃аман̃н̃ам̣ бйа̄ба̄дхенти. на̄лам̣ ан̃н̃аман̃н̃асса сукха̄йа ва̄ дуккха̄йа ва̄ сукхадуккха̄йа ва̄. таттха наттхи ханта̄ ва̄ гха̄тета̄ ва̄ сота̄ ва̄ са̄вета̄ ва̄ вин̃н̃а̄та̄ ва̄ вин̃н̃а̄пета̄ ва̄. йопи тин̣хена саттхена сӣсам̣ чхиндати, на кочи кан̃чи [кин̃чи (ка.)] джӣвита̄ воропети. саттаннам̣твева ка̄йа̄намантарена саттхам̣ вивараманупатати. чуддаса кхо панима̄ни йонипамукхасатасахасса̄ни сат̣т̣хи ча сата̄ни чха ча сата̄ни пан̃ча ча каммуно сата̄ни пан̃ча ча камма̄ни тӣн̣и ча камма̄ни, камме ча ад̣д̣хакамме ча, дват̣т̣хипат̣ипада̄, дват̣т̣хантаракаппа̄, чхал̣а̄бхиджа̄тийо, ат̣т̣ха пурисабхӯмийо, екӯнапан̃н̃а̄са а̄джӣвакасате, екӯнапан̃н̃а̄са парибба̄джакасате, екӯнапан̃н̃а̄са на̄га̄ва̄сасате, вӣсе индрийасате, тим̣се нирайасате, чхаттим̣са раджодха̄туйо, сатта сан̃н̃ӣгаббха̄, сатта асан̃н̃ӣгаббха̄, сатта ниган̣т̣хигаббха̄, сатта дева̄, сатта ма̄нуса̄, сатта песа̄ча̄, сатта сара̄, сатта павут̣а̄, сатта папа̄та̄, сатта папа̄тасата̄ни, сатта супина̄, сатта супинасата̄ни, чулла̄сӣти [чӯл̣а̄сӣти (сӣ. сйа̄. кам̣. пӣ.)] маха̄каппино [маха̄каппуно (сӣ. пӣ.)] сатасахасса̄ни, йа̄ни ба̄ле ча пан̣д̣ите ча сандха̄витва̄ сам̣саритва̄ дуккхассантам̣ кариссанти. таттха наттхи имина̄хам̣ сӣлена ва̄ ватена ва̄ тапена ва̄ брахмачарийена ва̄ апарипаккам̣ ва̄ каммам̣ парипа̄чесса̄ми, парипаккам̣ ва̄ каммам̣ пхусса пхусса бйантим̣ карисса̄мӣти. хевам̣ наттхи дон̣амите сукхадуккхе парийантакате сам̣са̄ре, наттхи ха̄йанавад̣д̣хане, наттхи уккам̣са̄вакам̣се. сеййатха̄пи на̄ма суттагул̣е кхитте ниббет̣хийама̄намева палети, евамева ба̄ле ча пан̣д̣ите ча сандха̄витва̄ сам̣саритва̄ дуккхассантам̣ кариссантӣ’ти.

‘‘татра, сандака, вин̃н̃ӯ пурисо ити пат̣исан̃чиккхати – ‘айам̣ кхо бхавам̣ саттха̄ евам̣ва̄дӣ евам̣дит̣т̣хи – саттиме ка̄йа̄ акат̣а̄ акат̣авидха̄ аниммита̄ анимма̄та̄ ван̃джха̄ кӯт̣ат̣т̣ха̄ есикат̣т̣ха̄йит̣т̣хита̄. те на ин̃джанти на випарин̣аманти на ан̃н̃аман̃н̃ам̣ бйа̄ба̄дхенти. на̄лам̣ ан̃н̃аман̃н̃асса сукха̄йа ва̄ дуккха̄йа ва̄ сукхадуккха̄йа ва̄. катаме сатта? патхавӣка̄йо а̄пока̄йо теджока̄йо ва̄йока̄йо сукхе дуккхе джӣве саттаме – име сатта ка̄йа̄ акат̣а̄ акат̣авидха̄ аниммита̄ анимма̄та̄ ван̃джха̄ кӯт̣ат̣т̣ха̄ есикат̣т̣ха̄йит̣т̣хита̄. те на ин̃джанти на випарин̣аманти на ан̃н̃аман̃н̃ам̣ бйа̄ба̄дхенти. на̄лам̣ ан̃н̃аман̃н̃асса сукха̄йа ва̄ дуккха̄йа ва̄ сукхадуккха̄йа ва̄. таттха наттхи ханта̄ ва̄ гха̄тета̄ ва̄ сота̄ ва̄ са̄вета̄ ва̄ вин̃н̃а̄та̄ ва̄ вин̃н̃а̄пета̄ ва̄. йопи тин̣хена саттхена сӣсам̣ чхиндати, на кочи кан̃чи джӣвита̄ воропети. саттаннам̣твева ка̄йа̄намантарена саттхам̣ вивараманупатати. чуддаса кхо панима̄ни йонипамукхасатасахасса̄ни сат̣т̣хи ча сата̄ни чха ча сата̄ни пан̃ча ча каммуно сата̄ни пан̃ча ча камма̄ни тӣн̣и ча камма̄ни, камме ча ад̣д̣хакамме ча, дват̣т̣хипат̣ипада̄, дват̣т̣хантаракаппа̄, чхал̣а̄бхиджа̄тийо, ат̣т̣ха пурисабхӯмийо, екӯнапан̃н̃а̄са а̄джӣвакасате, екӯнапан̃н̃а̄са парибба̄джакасате, екӯнапан̃н̃а̄са на̄га̄ва̄сасате, вӣсе индрийасате, тим̣се нирайасате, чхаттим̣са раджодха̄туйо, сатта сан̃н̃ӣгаббха̄, сатта асан̃н̃ӣгаббха̄, сатта ниган̣т̣хигаббха̄, сатта дева̄, сатта ма̄нуса̄, сатта песа̄ча̄, сатта сара̄, сатта павут̣а̄, сатта папа̄та̄, сатта папа̄тасата̄ни, сатта супина̄, сатта супинасата̄ни, чулла̄сӣти маха̄каппино сатасахасса̄ни, йа̄ни ба̄ле ча пан̣д̣ите ча сандха̄витва̄ сам̣саритва̄ дуккхассантам̣ кариссанти. таттха наттхи имина̄хам̣ сӣлена ва̄ ватена ва̄ тапена ва̄ брахмачарийена ва̄ апарипаккам̣ ва̄ каммам̣ парипа̄чесса̄ми, парипаккам̣ ва̄ каммам̣ пхусса пхусса бйантим̣ карисса̄мӣти, хевам̣ наттхи дон̣амите сукхадуккхе парийантакате сам̣са̄ре, наттхи ха̄йанавад̣д̣хане, наттхи уккам̣са̄вакам̣се. сеййатха̄пи на̄ма суттагул̣е кхитте ниббет̣хийама̄намева палети, евамева ба̄ле ча пан̣д̣ите ча сандха̄витва̄ сам̣саритва̄ дуккхассантам̣ кариссантӣ’ти. саче пана имасса бхото саттхуно саччам̣ вачанам̣, акатена ме еттха катам̣, авуситена ме еттха вуситам̣. убхопи майам̣ еттха самасама̄ са̄ман̃н̃ам̣ патта̄, йо ча̄хам̣ на вада̄ми. ‘убхо сандха̄витва̄ сам̣саритва̄ дуккхассантам̣ карисса̄ма̄’ти. атирекам̣ кхо панимасса бхото саттхуно наггийам̣ мун̣д̣ийам̣ уккут̣икаппадха̄нам̣ кесамассулочанам̣ йохам̣ путтасамба̄дхасайанам̣ аджджха̄васанто ка̄сикачанданам̣ паччанубхонто ма̄ла̄гандхавилепанам̣ дха̄ренто джа̄тарӯпараджатам̣ са̄дийанто имина̄ бхота̄ саттха̄ра̄ самасамагатико бхависса̄ми. абхисампара̄йам̣ сохам̣ ким̣ джа̄нанто ким̣ пассанто имасмим̣ саттхари брахмачарийам̣ чарисса̄ми? ‘со абрахмачарийава̄со айа’нти – ити видитва̄ тасма̄ брахмачарийа̄ ниббиджджа паккамати. айам̣ кхо, сандака, тена бхагавата̄ джа̄ната̄ пассата̄ арахата̄ самма̄самбуддхена чатуттхо абрахмачарийава̄со аккха̄то йаттха вин̃н̃ӯ пурисо сасаккам̣ брахмачарийам̣ на васеййа, васанто ча на̄ра̄дхеййа н̃а̄йам̣ дхаммам̣ кусалам̣.

‘‘име кхо те, сандака, тена бхагавата̄ джа̄ната̄ пассата̄ арахата̄ самма̄самбуддхена чатта̄ро абрахмачарийава̄са̄ аккха̄та̄ йаттха вин̃н̃ӯ пурисо сасаккам̣ брахмачарийам̣ на васеййа, васанто ча на̄ра̄дхеййа н̃а̄йам̣ дхаммам̣ кусала’’нти.

‘‘аччхарийам̣, бхо а̄нанда, аббхутам̣, бхо а̄нанда! йа̄ван̃чидам̣ тена бхагавата̄ джа̄ната̄ пассата̄ арахата̄ самма̄самбуддхена чатта̄ро абрахмачарийава̄са̄ва сама̄на̄ ‘абрахмачарийава̄са̄’ти аккха̄та̄ йаттха вин̃н̃ӯ пурисо сасаккам̣ брахмачарийам̣ на васеййа, васанто ча на̄ра̄дхеййа н̃а̄йам̣ дхаммам̣ кусаланти. катама̄ни пана та̄ни, бхо а̄нанда, тена бхагавата̄ джа̄ната̄ пассата̄ арахата̄ самма̄самбуддхена чатта̄ри анасса̄сика̄ни брахмачарийа̄ни аккха̄та̄ни йаттха вин̃н̃ӯ пурисо сасаккам̣ брахмачарийам̣ на васеййа, васанто ча на̄ра̄дхеййа н̃а̄йам̣ дхаммам̣ кусала’’нти?

229. ‘‘идха, сандака, екаччо саттха̄ саббан̃н̃ӯ саббадасса̄вӣ апарисесам̣ н̃а̄н̣адассанам̣ пат̣иджа̄на̄ти – ‘чарато ча ме тит̣т̣хато ча суттасса ча джа̄гарасса ча сататам̣ самитам̣ н̃а̄н̣адассанам̣ паччупат̣т̣хита’нти. со сун̃н̃ампи ага̄рам̣ пависати, пин̣д̣ампи на лабхати, куккуропи д̣ам̣сати, чан̣д̣енапи хаттхина̄ сама̄гаччхати, чан̣д̣енапи ассена сама̄гаччхати, чан̣д̣енапи гон̣ена сама̄гаччхати, иттхийа̄пи пурисассапи на̄мампи готтампи пуччхати, га̄массапи нигамассапи на̄мампи маггампи пуччхати. со ‘кимида’нти пут̣т̣хо сама̄но ‘сун̃н̃ам̣ ме ага̄рам̣ пависитаббам̣ ахоси’, тена па̄висим̣; ‘пин̣д̣ампи аладдхаббам̣ ахоси’, тена на̄латтхам̣; ‘куккурена д̣ам̣ситаббам̣ ахоси’, тенамхи [тена (ка.), тена̄сим̣ (?)] дат̣т̣хо; ‘чан̣д̣ена хаттхина̄ сама̄гантаббам̣ ахоси’, тена сама̄гамим̣; ‘чан̣д̣ена ассена сама̄гантаббам̣ ахоси’, тена сама̄гамим̣; ‘чан̣д̣ена гон̣ена сама̄гантаббам̣ ахоси’, тена сама̄гамим̣; ‘иттхийа̄пи пурисассапи на̄мампи готтампи пуччхитаббам̣ ахоси’, тена пуччхим̣; ‘га̄массапи нигамассапи на̄мампи маггампи пуччхитаббам̣ ахоси’, тена пуччхинти. татра, сандака, вин̃н̃ӯ пурисо ити пат̣исан̃чиккхати – ‘айам̣ кхо бхавам̣ саттха̄ саббан̃н̃ӯ саббадасса̄вӣ апарисесам̣ н̃а̄н̣адассанам̣ пат̣иджа̄на̄ти…пе… ‘га̄массапи нигамассапи на̄мампи маггампи пуччхитаббам̣ ахоси, тена пуччхи’нти. со ‘анасса̄сикам̣ идам̣ брахмачарийа’нти – ити видитва̄ тасма̄ брахмачарийа̄ ниббиджджа паккамати. идам̣ кхо, сандака, тена бхагавата̄ джа̄ната̄ пассата̄ арахата̄ самма̄самбуддхена пат̣хамам̣ анасса̄сикам̣ брахмачарийам̣ аккха̄там̣ йаттха вин̃н̃ӯ пурисо сасаккам̣ брахмачарийам̣ на васеййа, васанто ча на̄ра̄дхеййа н̃а̄йам̣ дхаммам̣ кусалам̣.

230. ‘‘пуна чапарам̣, сандака, идхекаччо саттха̄ ануссавико хоти ануссавасаччо. со ануссавена итихитихапарампара̄йа пит̣акасампада̄йа дхаммам̣ десети. ануссавикасса кхо пана, сандака, саттхуно ануссавасаччасса суссутампи хоти дуссутампи хоти татха̄пи хоти ан̃н̃атха̄пи хоти. татра, сандака, вин̃н̃ӯ пурисо ити пат̣исан̃чиккхати – ‘айам̣ кхо бхавам̣ саттха̄ ануссавико ануссавасаччо со ануссавена итихитихапарампара̄йа пит̣акасампада̄йа дхаммам̣ десети. ануссавикасса кхо пана саттхуно ануссавасаччасса суссутампи хоти дуссутампи хоти татха̄пи хоти ан̃н̃атха̄пи хоти’. со ‘анасса̄сикам̣ идам̣ брахмачарийа’нти – ити видитва̄ тасма̄ брахмачарийа̄ ниббиджджа паккамати. идам̣ кхо, сандака, тена бхагавата̄ джа̄ната̄ пассата̄ арахата̄ самма̄самбуддхена дутийам̣ анасса̄сикам̣ брахмачарийам̣ аккха̄там̣ йаттха вин̃н̃ӯ пурисо сасаккам̣ брахмачарийам̣ на васеййа, васанто ча на̄ра̄дхеййа н̃а̄йам̣ дхаммам̣ кусалам̣.

231. ‘‘пуна чапарам̣, сандака, идхекаччо саттха̄ таккӣ хоти вӣмам̣сӣ. со таккапарийа̄хатам̣ вӣмам̣са̄нучаритам̣ сайам̣пат̣ибха̄нам̣ дхаммам̣ десети. таккисса кхо пана, сандака, саттхуно вӣмам̣сисса сутаккитампи хоти дуттаккитампи хоти татха̄пи хоти ан̃н̃атха̄пи хоти. татра, сандака, вин̃н̃ӯ пурисо ити пат̣исан̃чиккхати – ‘айам̣ кхо бхавам̣ саттха̄ таккӣ вӣмам̣сӣ. со таккапарийа̄хатам̣ вӣмам̣са̄нучаритам̣ сайам̣пат̣ибха̄нам̣ дхаммам̣ десети. таккисса кхо пана саттхуно вӣмам̣сисса сутаккитампи хоти дуттаккитампи хоти татха̄пи хоти ан̃н̃атха̄пи хоти’. со ‘анасса̄сикам̣ идам̣ брахмачарийа’нти – ити видитва̄ тасма̄ брахмачарийа̄ ниббиджджа паккамати. идам̣ кхо, сандака, тена бхагавата̄ джа̄ната̄ пассата̄ арахата̄ самма̄самбуддхена татийам̣ анасса̄сикам̣ брахмачарийам̣ аккха̄там̣ йаттха вин̃н̃ӯ пурисо сасаккам̣ брахмачарийам̣ на васеййа, васанто ча на̄ра̄дхеййа н̃а̄йам̣ дхаммам̣ кусалам̣.

232. ‘‘пуна чапарам̣, сандака, идхекаччо саттха̄ мандо хоти момӯхо. со мандатта̄ момӯхатта̄ таттха таттха [татха̄ татха̄ (сӣ. сйа̄. кам̣. пӣ.)] пан̃хам̣ пут̣т̣хо сама̄но ва̄ча̄виккхепам̣ а̄паджджати амара̄виккхепам̣ – ‘евантипи [евампи (сӣ. пӣ.)] ме но, татха̄типи [татха̄пи (сӣ. пӣ.)] ме но, ан̃н̃атха̄типи [ан̃н̃атха̄пи (сӣ. пӣ.) ( ) саббаттха наттхи] ме но, нотипи ме но, но нотипи ме но’ти. татра, сандака, вин̃н̃ӯ пурисо ити пат̣исан̃чиккхати – ‘айам̣ кхо бхавам̣ саттха̄ мандо момӯхо. со мандатта̄ момӯхатта̄ таттха таттха пан̃хам̣ пут̣т̣хо сама̄но ва̄ча̄виккхепам̣ а̄паджджати амара̄виккхепам̣ – евантипи ме но, татха̄типи ме но, ан̃н̃атха̄типи ме но, нотипи ме но, но нотипи ме но’ти. со ‘анасса̄сикам̣ идам̣ брахмачарийа’нти – ити видитва̄ тасма̄ брахмачарийа̄ ниббиджджа паккамати. идам̣ кхо, сандака, тена бхагавата̄ джа̄ната̄ пассата̄ арахата̄ самма̄самбуддхена чатуттхам̣ анасса̄сикам̣ брахмачарийам̣ аккха̄там̣ йаттха вин̃н̃ӯ пурисо сасаккам̣ брахмачарийам̣ на васеййа, васанто ча на̄ра̄дхеййа н̃а̄йам̣ дхаммам̣ кусалам̣.

‘‘има̄ни кхо, (та̄ни сандака, тена бхагавата̄ джа̄ната̄ пассата̄ арахата̄ самма̄самбуддхена чатта̄ри анасса̄сика̄ни брахмачарийа̄ни аккха̄та̄ни йаттха вин̃н̃ӯ пурисо сасаккам̣ брахмачарийам̣ на васеййа, васанто ча на̄ра̄дхеййа н̃а̄йам̣ дхаммам̣ кусала’’нти.

‘‘аччхарийам̣, бхо а̄нанда, аббхутам̣, бхо а̄нанда! йа̄ван̃чидам̣ тена бхагавата̄ джа̄ната̄ пассата̄ арахата̄ самма̄самбуддхена чатта̄ри анасса̄сика̄нева брахмачарийа̄ни анасса̄сика̄ни брахмачарийа̄нӣти аккха̄та̄ни йаттха вин̃н̃ӯ пурисо сасаккам̣ брахмачарийам̣ на васеййа, васанто ча на̄ра̄дхеййа н̃а̄йам̣ дхаммам̣ кусалам̣. со пана, бхо а̄нанда, саттха̄ ким̣ ва̄дӣ ким̣ аккха̄йӣ йаттха вин̃н̃ӯ пурисо сасаккам̣ брахмачарийам̣ васеййа, васанто ча а̄ра̄дхеййа н̃а̄йам̣ дхаммам̣ кусала’’нти.

233. ‘‘идха, сандака, татха̄гато локе уппаджджати арахам̣ самма̄самбуддхо виджджа̄чаран̣асампанно сугато локавидӯ ануттаро пурисадаммаса̄ратхи саттха̄ деваманусса̄нам̣ буддхо бхагава̄…пе… [виттха̄ро ма. ни. 2.9-10 кандаракасутте] со име пан̃ча нӣваран̣е паха̄йа четасо упаккилесе пан̃н̃а̄йа дуббалӣкаран̣е вивиччева ка̄мехи вивичча акусалехи дхаммехи савитаккам̣ савича̄рам̣ вивекаджам̣ пӣтисукхам̣ пат̣хамам̣ джха̄нам̣ упасампаджджа вихарати. йасмим̣ кхо [йасмим̣ кхо пана (сйа̄. кам̣. ка.)], сандака, саттхари са̄вако еварӯпам̣ ул̣а̄рависесам̣ адхигаччхати таттха вин̃н̃ӯ пурисо сасаккам̣ брахмачарийам̣ васеййа, васанто ча а̄ра̄дхеййа н̃а̄йам̣ дхаммам̣ кусалам̣.

‘‘пуна чапарам̣, сандака, бхиккху витаккавича̄ра̄нам̣ вӯпасама̄…пе... дутийам̣ джха̄нам̣ упасампаджджа вихарати. йасмим̣ кхо, сандака, саттхари са̄вако еварӯпам̣ ул̣а̄рависесам̣ адхигаччхати таттха вин̃н̃ӯ пурисо сасаккам̣ брахмачарийам̣ васеййа, васанто ча а̄ра̄дхеййа н̃а̄йам̣ дхаммам̣ кусалам̣.

‘‘пуна чапарам̣, сандака, бхиккху пӣтийа̄ ча вира̄га̄ упеккхако ча вихарати…пе… татийам̣ джха̄нам̣ упасампаджджа вихарати. йасмим̣ кхо, сандака, саттхари са̄вако еварӯпам̣ ул̣а̄рависесам̣ адхигаччхати таттха вин̃н̃ӯ пурисо сасаккам̣ брахмачарийам̣ васеййа, васанто ча а̄ра̄дхеййа н̃а̄йам̣ дхаммам̣ кусалам̣.

‘‘пуна чапарам̣, сандака, бхиккху сукхасса ча паха̄на̄…пе… чатуттхам̣ джха̄нам̣ упасампаджджа вихарати. йасмим̣ кхо, сандака, саттхари са̄вако еварӯпам̣ ул̣а̄рависесам̣ адхигаччхати таттха вин̃н̃ӯ пурисо сасаккам̣ брахмачарийам̣ васеййа, васанто ча а̄ра̄дхеййа н̃а̄йам̣ дхаммам̣ кусалам̣.

‘‘со евам̣ сама̄хите читте парисуддхе парийода̄те анан̇ган̣е вигатӯпаккилесе мудубхӯте камманийе т̣хите а̄нен̃джаппатте пуббенива̄са̄нуссатин̃а̄н̣а̄йа читтам̣ абхининна̄мети. со анекавихитам̣ пуббенива̄сам̣ ануссарати, сеййатхидам̣ – екампи джа̄тим̣ двепи джа̄тийо…пе… ити са̄ка̄рам̣ сауддесам̣ анекавихитам̣ пуббенива̄сам̣ ануссарати. йасмим̣ кхо, сандака, саттхари са̄вако еварӯпам̣ ул̣а̄рависесам̣ адхигаччхати таттха вин̃н̃ӯ пурисо сасаккам̣ брахмачарийам̣ васеййа, васанто ча а̄ра̄дхеййа н̃а̄йам̣ дхаммам̣ кусалам̣.

‘‘со евам̣ сама̄хите читте парисуддхе парийода̄те анан̇ган̣е вигатӯпаккилесе мудубхӯте камманийе т̣хите а̄нен̃джаппатте сатта̄нам̣ чутӯпапа̄тан̃а̄н̣а̄йа читтам̣ абхининна̄мети. со диббена чаккхуна̄ висуддхена атиккантама̄нусакена сатте пассати чавама̄не упападжджама̄не хӣне пан̣ӣте суван̣н̣е дуббан̣н̣е сугате дуггате…пе… йатха̄каммӯпаге сатте паджа̄на̄ти. йасмим̣ кхо, сандака, саттхари са̄вако еварӯпам̣ ул̣а̄рависесам̣ адхигаччхати таттха вин̃н̃ӯ пурисо сасаккам̣ брахмачарийам̣ васеййа, васанто ча а̄ра̄дхеййа н̃а̄йам̣ дхаммам̣ кусалам̣.

‘‘со евам̣ сама̄хите читте парисуддхе парийода̄те анан̇ган̣е вигатӯпаккилесе мудубхӯте камманийе т̣хите а̄нен̃джаппатте а̄сава̄нам̣ кхайан̃а̄н̣а̄йа читтам̣ абхининна̄мети. со ‘идам̣ дуккха’нти йатха̄бхӯтам̣ паджа̄на̄ти, ‘айам̣ дуккхасамудайо’ти йатха̄бхӯтам̣ паджа̄на̄ти, ‘айам̣ дуккханиродхо’ти йатха̄бхӯтам̣ паджа̄на̄ти, ‘айам̣ дуккханиродхага̄минӣ пат̣ипада̄’ти йатха̄бхӯтам̣ паджа̄на̄ти; ‘име а̄сава̄’ти йатха̄бхӯтам̣ паджа̄на̄ти, ‘айам̣ а̄савасамудайо’ти йатха̄бхӯтам̣ паджа̄на̄ти, ‘айам̣ а̄саваниродхо’ти йатха̄бхӯтам̣ паджа̄на̄ти, ‘айам̣ а̄саваниродхага̄минӣ пат̣ипада̄’ти йатха̄бхӯтам̣ паджа̄на̄ти. тасса евам̣ джа̄нато евам̣ пассато ка̄ма̄сава̄пи читтам̣ вимуччати, бхава̄сава̄пи читтам̣ вимуччати, авиджджа̄сава̄пи читтам̣ вимуччати. вимуттасмим̣ вимуттамити н̃а̄н̣ам̣ хоти. ‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄’ти паджа̄на̄ти. йасмим̣ кхо, сандака, саттхари са̄вако еварӯпам̣ ул̣а̄рависесам̣ адхигаччхати таттха вин̃н̃ӯ пурисо сасаккам̣ брахмачарийам̣ васеййа, васанто ча а̄ра̄дхеййа н̃а̄йам̣ дхаммам̣ кусала’’нти.

234. ‘‘йо пана со, бхо а̄нанда, бхиккху арахам̣ кхӣн̣а̄саво вуситава̄ катакаран̣ӣйо охитабха̄ро ануппаттасадаттхо париккхӣн̣абхавасам̣йоджано саммадан̃н̃а̄ вимутто парибхун̃джеййа со ка̄ме’’ти? ‘‘йо со, сандака, бхиккху арахам̣ кхӣн̣а̄саво вуситава̄ катакаран̣ӣйо охитабха̄ро ануппаттасадаттхо париккхӣн̣абхавасам̣йоджано саммадан̃н̃а̄ вимутто абхаббо со пан̃чат̣т̣ха̄на̄ни аджджха̄чаритум̣. абхаббо кхӣн̣а̄саво бхиккху сан̃чичча па̄н̣ам̣ джӣвита̄ воропетум̣, абхаббо кхӣн̣а̄саво бхиккху адиннам̣ тхеййасан̇кха̄там̣ а̄да̄тум̣, абхаббо кхӣн̣а̄саво бхиккху метхунам̣ дхаммам̣ пат̣исеветум̣, абхаббо кхӣн̣а̄саво бхиккху сампаджа̄намуса̄ бха̄ситум̣, абхаббо кхӣн̣а̄саво бхиккху саннидхика̄ракам̣ ка̄ме парибхун̃джитум̣, сеййатха̄пи пуббе ага̄рийабхӯто. йо со, сандака, бхиккху арахам̣ кхӣн̣а̄саво вуситава̄ катакаран̣ӣйо охитабха̄ро ануппаттасадаттхо париккхӣн̣абхавасам̣йоджано саммадан̃н̃а̄ вимутто абхаббо со има̄ни пан̃чат̣т̣ха̄на̄ни аджджха̄чариту’’нти.

235. ‘‘йо пана со, бхо а̄нанда, бхиккху арахам̣ кхӣн̣а̄саво вуситава̄ катакаран̣ӣйо охитабха̄ро ануппаттасадаттхо париккхӣн̣абхавасам̣йоджано саммадан̃н̃а̄ вимутто тасса чарато чева тит̣т̣хато ча суттасса ча джа̄гарасса ча сататам̣ самитам̣ н̃а̄н̣адассанам̣ паччупат̣т̣хитам̣ – ‘кхӣн̣а̄ ме а̄сава̄’’’ти? ‘‘тена хи, сандака, упамам̣ те карисса̄ми; упама̄йапидхекачче вин̃н̃ӯ пуриса̄ бха̄ситасса аттхам̣ а̄джа̄нанти. сеййатха̄пи, сандака, пурисасса хаттхапа̄да̄ чхинна̄; тасса чарато чева тит̣т̣хато ча суттасса ча джа̄гарасса ча сататам̣ самитам̣ (джа̄на̄ти – ‘чхинна̄ ме хаттхапа̄да̄’ти, уда̄ху паччавеккхама̄но джа̄на̄ти – ‘чхинна̄ ме хаттхапа̄да̄’’’ти? ‘‘на кхо, бхо а̄нанда, со пурисо сататам̣ самитам̣ джа̄на̄ти – ‘чхинна̄ ме хаттхапа̄да̄’ ти.) [(чхинна̄ва хаттхапа̄да̄,) (сӣ. сйа̄. кам̣. пӣ.)] апи ча кхо пана нам̣ паччавеккхама̄но джа̄на̄ти – ‘чхинна̄ ме хаттхапа̄да̄’’’ти. ‘‘евамева кхо, сандака, йо со бхиккху арахам̣ кхӣн̣а̄саво вуситава̄ катакаран̣ӣйо охитабха̄ро ануппаттасадаттхо париккхӣн̣абхавасам̣йоджано саммадан̃н̃а̄ вимутто тасса чарато чева тит̣т̣хато ча суттасса ча джа̄гарасса ча сататам̣ самитам̣ (н̃а̄н̣адассанам̣ на паччупат̣т̣хитам̣ – ‘кхӣн̣а̄ ме а̄сава̄’ти;) [(кхӣн̣а̄ва а̄сава̄,) (сӣ. сйа̄. кам̣. пӣ.)] апи ча кхо пана нам̣ паччавеккхама̄но джа̄на̄ти – ‘кхӣн̣а̄ ме а̄сава̄’’’ти.

236. ‘‘кӣвабахука̄ пана, бхо а̄нанда, имасмим̣ дхаммавинайе ниййа̄та̄ро’’ти? ‘‘на кхо, сандака, екам̣йева сатам̣ на две сата̄ни на тӣн̣и сата̄ни на чатта̄ри сата̄ни на пан̃ча сата̄ни, атха кхо бхиййова йе имасмим̣ дхаммавинайе ниййа̄та̄ро’’ти. ‘‘аччхарийам̣, бхо а̄нанда, аббхутам̣, бхо а̄нанда! на ча на̄ма садхаммоккам̣сана̄ бхависсати, на парадхаммавамбхана̄, а̄йатане ча дхаммадесана̄ та̄ва бахука̄ ча ниййа̄та̄ро пан̃н̃а̄йиссанти. име пана̄джӣвака̄ путтамата̄йа путта̄ атта̄нан̃чева уккам̣сенти, паре ча вамбхенти тайо чева ниййа̄та̄ро пан̃н̃апенти, сеййатхидам̣ – нандам̣ ваччхам̣, кисам̣ сам̣киччам̣, маккхалим̣ госа̄ла’’нти. атха кхо сандако парибба̄джако сакам̣ парисам̣ а̄мантеси – ‘‘чаранту бхонто саман̣е готаме брахмачарийава̄со. на да̄ни сукарам̣ амхехи ла̄бхасакка̄расилоке париччаджиту’’нти. ити хидам̣ сандако парибба̄джако сакам̣ парисам̣ уййоджеси бхагавати брахмачарийети.

сандакасуттам̣ нит̣т̣хитам̣ чхат̣т̣хам̣.