1. тевиджджаваччхасуттам̣

185. евам̣ ме сутам̣ – екам̣ самайам̣ бхагава̄ веса̄лийам̣ вихарати маха̄ване кӯт̣а̄га̄раса̄ла̄йам̣. тена кхо пана самайена ваччхаготто парибба̄джако екапун̣д̣арӣке парибба̄джака̄ра̄ме пат̣ивасати. атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа веса̄лим̣ пин̣д̣а̄йа па̄виси. атха кхо бхагавато етадахоси – ‘‘атиппаго кхо та̄ва веса̄лийам̣ пин̣д̣а̄йа чаритум̣; йам̣нӯна̄хам̣ йена екапун̣д̣арӣко парибба̄джака̄ра̄мо йена ваччхаготто парибба̄джако тенупасан̇камеййа’’нти. атха кхо бхагава̄ йена екапун̣д̣арӣко парибба̄джака̄ра̄мо йена ваччхаготто парибба̄джако тенупасан̇ками. аддаса̄ кхо ваччхаготто парибба̄джако бхагавантам̣ дӯратова а̄гаччхантам̣. дисва̄на бхагавантам̣ етадавоча – ‘‘ету кхо, бханте, бхагава̄. сва̄гатам̣ [са̄гатам̣ (сӣ. пӣ.)], бханте, бхагавато. чирассам̣ кхо, бханте, бхагава̄ имам̣ парийа̄йамака̄си йадидам̣ идха̄гамана̄йа. нисӣдату, бханте, бхагава̄ идама̄санам̣ пан̃н̃атта’’нти. нисӣди бхагава̄ пан̃н̃атте а̄сане. ваччхаготтопи кхо парибба̄джако ан̃н̃атарам̣ нӣчам̣ а̄санам̣ гахетва̄ екамантам̣ нисӣди. екамантам̣ нисинно кхо ваччхаготто парибба̄джако бхагавантам̣ етадавоча – ‘‘сутам̣ метам̣, бханте – ‘саман̣о готамо саббан̃н̃ӯ саббадасса̄вӣ, апарисе+сам̣ н̃а̄н̣адассанам̣ пат̣иджа̄на̄ти, чарато ча ме тит̣т̣хато ча суттасса ча джа̄гарасса ча сататам̣ самитам̣ н̃а̄н̣адассанам̣ паччупат̣т̣хита’нти. йе те, бханте, евама̄хам̣су – ‘саман̣о готамо саббан̃н̃ӯ саббадасса̄вӣ, апарисесам̣ н̃а̄н̣адассанам̣ пат̣иджа̄на̄ти, чарато ча ме тит̣т̣хато ча суттасса ча джа̄гарасса ча сататам̣ самитам̣ н̃а̄н̣адассанам̣ паччупат̣т̣хита’нти, каччи те, бханте, бхагавато вуттава̄дино, на ча бхагавантам̣ абхӯтена аббха̄чиккханти, дхаммасса ча̄нудхаммам̣ бйа̄каронти, на ча кочи сахадхаммико ва̄да̄нува̄до га̄райхам̣ т̣ха̄нам̣ а̄гаччхатӣ’’ти? ‘‘йе те, ваччха, евама̄хам̣су – ‘саман̣о готамо саббан̃н̃ӯ саббадасса̄вӣ, апарисесам̣ н̃а̄н̣адассанам̣ пат̣иджа̄на̄ти, чарато ча ме тит̣т̣хато ча суттасса ча джа̄гарасса ча сататам̣ самитам̣ н̃а̄н̣адассанам̣ паччупат̣т̣хита’нти, на ме те вуттава̄дино, аббха̄чиккханти ча пана мам̣ асата̄ абхӯтена̄’’ти.

186. ‘‘катхам̣ бйа̄карама̄на̄ пана майам̣, бханте, вуттава̄дино чева бхагавато асса̄ма, на ча бхагавантам̣ абхӯтена аббха̄чиккхеййа̄ма, дхаммасса ча̄нудхаммам̣ бйа̄кареййа̄ма, на ча кочи сахадхаммико ва̄да̄нува̄до га̄райхам̣ т̣ха̄нам̣ а̄гаччхеййа̄’’ти?

‘‘‘тевиджджо саман̣о готамо’ти кхо, ваччха, бйа̄карама̄но вуттава̄дӣ чева ме асса, на ча мам̣ абхӯтена аббха̄чиккхеййа, дхаммасса ча̄нудхаммам̣ бйа̄кареййа, на ча кочи сахадхаммико ва̄да̄нува̄до га̄райхам̣ т̣ха̄нам̣ а̄гаччхеййа. ахан̃хи, ваччха, йа̄вадева а̄кан̇кха̄ми анекавихитам̣ пуббенива̄сам̣ ануссара̄ми, сеййатхидам̣ – екампи джа̄тим̣ двепи джа̄тийо…пе… ити са̄ка̄рам̣ сауддесам̣ анекавихитам̣ пуббенива̄сам̣ ануссара̄ми. ахан̃хи, ваччха, йа̄вадева а̄кан̇кха̄ми диббена чаккхуна̄ висуддхена атиккантама̄нусакена сатте пасса̄ми чавама̄не упападжджама̄не хӣне пан̣ӣте суван̣н̣е дуббан̣н̣е сугате дуггате…пе… йатха̄каммӯпаге сатте паджа̄на̄ми. ахан̃хи, ваччха, а̄сава̄нам̣ кхайа̄ ана̄савам̣ четовимуттим̣ пан̃н̃а̄вимуттим̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа вихара̄ми.

евам̣ вутте, ваччхаготто парибба̄джако бхагавантам̣ етадавоча – ‘‘аттхи ну кхо, бхо готама, кочи гихӣ гихисам̣йоджанам̣ аппаха̄йа ка̄йасса бхеда̄ дуккхассантакаро’’ти? ‘‘наттхи кхо, ваччха, кочи гихӣ гихисам̣йоджанам̣ аппаха̄йа ка̄йасса бхеда̄ дуккхассантакаро’’ти.

‘‘аттхи пана, бхо готама, кочи гихӣ гихисам̣йоджанам̣ аппаха̄йа ка̄йасса бхеда̄ саггӯпаго’’ти? ‘‘на кхо, ваччха, екам̣йева сатам̣ на две сата̄ни на тӣн̣и сата̄ни на чатта̄ри сата̄ни на пан̃ча сата̄ни, атха кхо бхиййова йе гихӣ гихисам̣йоджанам̣ аппаха̄йа ка̄йасса бхеда̄ саггӯпага̄’’ти [‘‘аттхи кхо ваччха кочи гихӣ гихисам̣йоджанам̣ аппаха̄йа ка̄йасса бхеда̄ саггӯпаготи’’. (ка.)].

‘‘аттхи ну кхо, бхо готама, кочи а̄джӣвако [а̄джӣвико (ка.)] ка̄йасса бхеда̄ дуккхассантакаро’’ти? ‘‘наттхи кхо, ваччха, кочи а̄джӣвако ка̄йасса бхеда̄ дуккхассантакаро’’ти.

‘‘аттхи пана, бхо готама, кочи а̄джӣвако ка̄йасса бхеда̄ саггӯпаго’’ти? ‘‘ито кхо со, ваччха, еканавуто каппо [ито ко ваччха еканавуте каппе (ка.)] йамахам̣ ануссара̄ми, на̄бхиджа̄на̄ми кан̃чи а̄джӣвакам̣ саггӯпагам̣ ан̃н̃атра екена; сопа̄си каммава̄дӣ кирийава̄дӣ’’ти. ‘‘евам̣ санте, бхо готама, сун̃н̃ам̣ адум̣ титтха̄йатанам̣ антамасо саггӯпагенапӣ’’ти? ‘‘евам̣, ваччха, сун̃н̃ам̣ адум̣ титтха̄йатанам̣ антамасо саггӯпагенапӣ’’ти.

идамавоча бхагава̄. аттамано ваччхаготто парибба̄джако бхагавато бха̄ситам̣ абхинандӣти.

тевиджджаваччхасуттам̣ нит̣т̣хитам̣ пат̣хамам̣.