6. маха̄дхаммасама̄да̄насуттам̣

473. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. татра кхо бхагава̄ бхиккхӯ а̄мантеси – ‘‘бхиккхаво’’ти. ‘‘бхаданте’’ти те бхиккхӯ бхагавато паччассосум̣. бхагава̄ етадавоча – ‘‘йебхуййена, бхиккхаве, сатта̄ евам̣ка̄ма̄ евам̣чханда̄ евам̣адхиппа̄йа̄ – ‘ахо вата анит̣т̣ха̄ аканта̄ амана̄па̄ дхамма̄ париха̄йеййум̣, ит̣т̣ха̄ канта̄ мана̄па̄ дхамма̄ абхивад̣д̣хеййу’нти. тесам̣, бхиккхаве, сатта̄нам̣ евам̣ка̄ма̄нам̣ евам̣чханда̄нам̣ евам̣адхиппа̄йа̄нам̣ анит̣т̣ха̄ аканта̄ амана̄па̄ дхамма̄ абхивад̣д̣ханти, ит̣т̣ха̄ канта̄ мана̄па̄ дхамма̄ париха̄йанти. татра тумхе, бхиккхаве, кам̣ хетум̣ паччетха̄’’ти? ‘‘бхагавам̣мӯлака̄ но, бханте, дхамма̄, бхагавам̣неттика̄, бхагавам̣пат̣исаран̣а̄. са̄дху вата, бханте, бхагавантан̃н̃ева пат̣ибха̄ту етасса бха̄ситасса аттхо; бхагавато сутва̄ бхиккхӯ дха̄рессантӣ’’ти. ‘‘тена хи, бхиккхаве, сун̣а̄тха, са̄дхукам̣ манаси каротха, бха̄сисса̄мӣ’’ти. ‘‘евам̣, бханте’’ти кхо те бхиккхӯ бхагавато паччассосум̣. бхагава̄ етадавоча –

474. ‘‘идха, бхиккхаве, ассутава̄ путхуджджано, арийа̄нам̣ адасса̄вӣ арийадхаммасса аковидо арийадхамме авинӣто, саппуриса̄нам̣ адасса̄вӣ саппурисадхаммасса аковидо саппурисадхамме авинӣто, севитаббе дхамме на джа̄на̄ти асевитаббе дхамме на джа̄на̄ти, бхаджитаббе дхамме на джа̄на̄ти абхаджитаббе дхамме на джа̄на̄ти. со севитаббе дхамме аджа̄нанто асевитаббе дхамме аджа̄нанто, бхаджитаббе дхамме аджа̄нанто абхаджитаббе дхамме аджа̄нанто, асевитаббе дхамме севати севитаббе дхамме на севати, абхаджитаббе дхамме бхаджати бхаджитаббе дхамме на бхаджати. тасса асевитаббе дхамме севато севитаббе дхамме асевато, абхаджитаббе дхамме бхаджато бхаджитаббе дхамме абхаджато анит̣т̣ха̄ аканта̄ амана̄па̄ дхамма̄ абхивад̣д̣ханти, ит̣т̣ха̄ канта̄ мана̄па̄ дхамма̄ париха̄йанти. там̣ кисса хету? еван̃хетам̣, бхиккхаве, хоти йатха̄ там̣ авиддасуно.

‘‘сутава̄ ча кхо, бхиккхаве, арийаса̄вако, арийа̄нам̣ дасса̄вӣ арийадхаммасса ковидо арийадхамме сувинӣто, саппуриса̄нам̣ дасса̄вӣ саппурисадхаммасса ковидо саппурисадхамме сувинӣто, севитаббе дхамме джа̄на̄ти асевитаббе дхамме джа̄на̄ти, бхаджитаббе дхамме джа̄на̄ти абхаджитаббе дхамме джа̄на̄ти. со севитаббе дхамме джа̄нанто асевитаббе дхамме джа̄нанто, бхаджитаббе дхамме джа̄нанто абхаджитаббе дхамме джа̄нанто, асевитаббе дхамме на севати севитаббе дхамме севати, абхаджитаббе дхамме на бхаджати бхаджитаббе дхамме бхаджати. тасса асевитаббе дхамме асевато севитаббе дхамме севато, абхаджитаббе дхамме абхаджато бхаджитаббе дхамме бхаджато, анит̣т̣ха̄ аканта̄ амана̄па̄ дхамма̄ париха̄йанти, ит̣т̣ха̄ канта̄ мана̄па̄ дхамма̄ абхивад̣д̣ханти. там̣ кисса хету? еван̃хетам̣, бхиккхаве, хоти йатха̄ там̣ виддасуно.

475. ‘‘чатта̄рима̄ни, бхиккхаве, дхаммасама̄да̄на̄ни. катама̄ни чатта̄ри? аттхи, бхиккхаве, дхаммасама̄да̄нам̣ паччуппаннадуккхан̃чева а̄йатин̃ча дуккхавипа̄кам̣; аттхи, бхиккхаве, дхаммасама̄да̄нам̣ паччуппаннасукхам̣ а̄йатим̣ дуккхавипа̄кам̣; аттхи, бхиккхаве, дхаммасама̄да̄нам̣ паччуппаннадуккхам̣ а̄йатим̣ сукхавипа̄кам̣; аттхи, бхиккхаве, дхаммасама̄да̄нам̣ паччуппаннасукхан̃чева а̄йатин̃ча сукхавипа̄кам̣.

476. ‘‘татра, бхиккхаве, йамидам̣ [йадидам̣ (сӣ.)] дхаммасама̄да̄нам̣ паччуппаннадуккхан̃чева а̄йатин̃ча дуккхавипа̄кам̣, там̣ авидва̄ авиджджа̄гато йатха̄бхӯтам̣ наппаджа̄на̄ти – ‘идам̣ кхо дхаммасама̄да̄нам̣ паччуппаннадуккхан̃чева а̄йатин̃ча дуккхавипа̄ка’нти. там̣ авидва̄ авиджджа̄гато йатха̄бхӯтам̣ аппаджа̄нанто там̣ севати, там̣ на париваджджети. тасса там̣ севато, там̣ апариваджджайато, анит̣т̣ха̄ аканта̄ амана̄па̄ дхамма̄ абхивад̣д̣ханти, ит̣т̣ха̄ канта̄ мана̄па̄ дхамма̄ париха̄йанти. там̣ кисса хету? еван̃хетам̣, бхиккхаве, хоти йатха̄ там̣ авиддасуно.

‘‘татра, бхиккхаве, йамидам̣ дхаммасама̄да̄нам̣ паччуппаннасукхам̣ а̄йатим̣ дуккхавипа̄кам̣ там̣ авидва̄ авиджджа̄гато йатха̄бхӯтам̣ наппаджа̄на̄ти – ‘идам̣ кхо дхаммасама̄да̄нам̣ паччуппаннасукхам̣ а̄йатим̣ дуккхавипа̄ка’нти. там̣ авидва̄ авиджджа̄гато йатха̄бхӯтам̣ аппаджа̄нанто там̣ севати, там̣ на париваджджети. тасса там̣ севато, там̣ апариваджджайато, анит̣т̣ха̄ аканта̄ амана̄па̄ дхамма̄ абхивад̣д̣ханти, ит̣т̣ха̄ канта̄ мана̄па̄ дхамма̄ париха̄йанти. там̣ кисса хету? еван̃хетам̣, бхиккхаве, хоти йатха̄ там̣ авиддасуно.

‘‘татра, бхиккхаве, йамидам̣ дхаммасама̄да̄нам̣ паччуппаннадуккхам̣ а̄йатим̣ сукхавипа̄кам̣, там̣ авидва̄ авиджджа̄гато йатха̄бхӯтам̣ наппаджа̄на̄ти – ‘идам̣ кхо дхаммасама̄да̄нам̣ паччуппаннадуккхам̣ а̄йатим̣ сукхавипа̄ка’нти. там̣ авидва̄ авиджджа̄гато йатха̄бхӯтам̣ аппаджа̄нанто там̣ на севати, там̣ париваджджети. тасса там̣ асевато, там̣ париваджджайато, анит̣т̣ха̄ аканта̄ амана̄па̄ дхамма̄ абхивад̣д̣ханти, ит̣т̣ха̄ канта̄ мана̄па̄ дхамма̄ париха̄йанти. там̣ кисса хету? еван̃хетам̣, бхиккхаве, хоти йатха̄ там̣ авиддасуно.

‘‘татра, бхиккхаве, йамидам̣ дхаммасама̄да̄нам̣ паччуппаннасукхан̃чева а̄йатин̃ча сукхавипа̄кам̣, там̣ авидва̄ авиджджа̄гато йатха̄бхӯтам̣ наппаджа̄на̄ти – ‘идам̣ кхо дхаммасама̄да̄нам̣ паччуппаннасукхан̃чева а̄йатин̃ча сукхавипа̄ка’нти. там̣ авидва̄ авиджджа̄гато йатха̄бхӯтам̣ аппаджа̄нанто там̣ на севати, там̣ париваджджети. тасса там̣ асевато, там̣ париваджджайато, анит̣т̣ха̄ аканта̄ амана̄па̄ дхамма̄ абхивад̣д̣ханти, ит̣т̣ха̄ канта̄ мана̄па̄ дхамма̄ париха̄йанти. там̣ кисса хету? еван̃хетам̣, бхиккхаве, хоти йатха̄ там̣ авиддасуно.

477. ‘‘татра, бхиккхаве, йамидам̣ дхаммасама̄да̄нам̣ паччуппаннадуккхан̃чева а̄йатин̃ча дуккхавипа̄кам̣ там̣ видва̄ виджджа̄гато йатха̄бхӯтам̣ паджа̄на̄ти – ‘идам̣ кхо дхаммасама̄да̄нам̣ паччуппаннадуккхан̃чева а̄йатин̃ча дуккхавипа̄ка’нти. там̣ видва̄ виджджа̄гато йатха̄бхӯтам̣ паджа̄нанто там̣ на севати, там̣ париваджджети. тасса там̣ асевато, там̣ париваджджайато, анит̣т̣ха̄ аканта̄ амана̄па̄ дхамма̄ париха̄йанти, ит̣т̣ха̄ канта̄ мана̄па̄ дхамма̄ абхивад̣д̣ханти. там̣ кисса хету? еван̃хетам̣, бхиккхаве, хоти йатха̄ там̣ виддасуно.

‘‘татра, бхиккхаве, йамидам̣ дхаммасама̄да̄нам̣ паччуппаннасукхам̣ а̄йатим̣ дуккхавипа̄кам̣ там̣ видва̄ виджджа̄гато йатха̄бхӯтам̣ паджа̄на̄ти – ‘идам̣ кхо дхаммасама̄да̄нам̣ паччуппаннасукхам̣ а̄йатим̣ дуккхавипа̄ка’нти. там̣ видва̄ виджджа̄гато йатха̄бхӯтам̣ паджа̄нанто там̣ на севати, там̣ париваджджети. тасса там̣ асевато, там̣ париваджджайато, анит̣т̣ха̄ аканта̄ амана̄па̄ дхамма̄ париха̄йанти, ит̣т̣ха̄ канта̄ мана̄па̄ дхамма̄ абхивад̣д̣ханти. там̣ кисса хету? еван̃хетам̣, бхиккхаве, хоти йатха̄ там̣ виддасуно.

‘‘татра, бхиккхаве, йамидам̣ дхаммасама̄да̄нам̣ паччуппаннадуккхам̣ а̄йатим̣ сукхавипа̄кам̣ там̣ видва̄ виджджа̄гато йатха̄бхӯтам̣ паджа̄на̄ти – ‘идам̣ кхо дхаммасама̄да̄нам̣ паччуппаннадуккхам̣ а̄йатим̣ сукхавипа̄ка’нти. там̣ видва̄ виджджа̄гато йатха̄бхӯтам̣ паджа̄нанто там̣ севати, там̣ на париваджджети. тасса там̣ севато, там̣ апариваджджайато, анит̣т̣ха̄ аканта̄ амана̄па̄ дхамма̄ париха̄йанти, ит̣т̣ха̄ канта̄ мана̄па̄ дхамма̄ абхивад̣д̣ханти. там̣ кисса хету? еван̃хетам̣, бхиккхаве, хоти йатха̄ там̣ виддасуно.

‘‘татра, бхиккхаве, йамидам̣ дхаммасама̄да̄нам̣ паччуппаннасукхан̃чева а̄йатин̃ча сукхавипа̄кам̣ там̣ видва̄ виджджа̄гато йатха̄бхӯтам̣ паджа̄на̄ти – ‘идам̣ кхо дхаммасама̄да̄нам̣ паччуппаннасукхан̃чева а̄йатин̃ча сукхавипа̄ка’нти. там̣ видва̄ виджджа̄гато йатха̄бхӯтам̣ паджа̄нанто там̣ севати, там̣ на париваджджети. тасса там̣ севато, там̣ апариваджджайато, анит̣т̣ха̄ аканта̄ амана̄па̄ дхамма̄ париха̄йанти, ит̣т̣ха̄ канта̄ мана̄па̄ дхамма̄ абхивад̣д̣ханти. там̣ кисса хету? еван̃хетам̣, бхиккхаве, хоти йатха̄ там̣ виддасуно.

478. ‘‘катаман̃ча, бхиккхаве, дхаммасама̄да̄нам̣ паччуппаннадуккхан̃чева а̄йатин̃ча дуккхавипа̄кам̣? идха, бхиккхаве, екаччо саха̄пи дуккхена саха̄пи доманассена па̄н̣а̄типа̄тӣ хоти, па̄н̣а̄типа̄тапаччайа̄ ча дуккхам̣ доманассам̣ пат̣исам̣ведети; саха̄пи дуккхена саха̄пи доманассена адинна̄да̄йӣ хоти, адинна̄да̄напаччайа̄ ча дуккхам̣ доманассам̣ пат̣исам̣ведети; саха̄пи дуккхена саха̄пи доманассена ка̄месу миччха̄ча̄рӣ хоти, ка̄месу миччха̄ча̄рапаччайа̄ ча дуккхам̣ доманассам̣ пат̣исам̣ведети; саха̄пи дуккхена саха̄пи доманассена муса̄ва̄дӣ хоти, муса̄ва̄дапаччайа̄ ча дуккхам̣ доманассам̣ пат̣исам̣ведети; саха̄пи дуккхена саха̄пи доманассена писун̣ава̄чо хоти, писун̣ава̄ча̄паччайа̄ ча дуккхам̣ доманассам̣ пат̣исам̣ведети; саха̄пи дуккхена саха̄пи доманассена пхарусава̄чо хоти, пхарусава̄ча̄паччайа̄ ча дуккхам̣ доманассам̣ пат̣исам̣ведети; саха̄пи дуккхена саха̄пи доманассена сампхаппала̄пӣ хоти, сампхаппала̄папаччайа̄ ча дуккхам̣ доманассам̣ пат̣исам̣ведети; саха̄пи дуккхена саха̄пи доманассена абхиджджха̄лу хоти, абхиджджха̄паччайа̄ ча дуккхам̣ доманассам̣ пат̣исам̣ведети; саха̄пи дуккхена саха̄пи доманассена бйа̄панначитто хоти, бйа̄па̄дапаччайа̄ ча дуккхам̣ доманассам̣ пат̣исам̣ведети; саха̄пи дуккхена саха̄пи доманассена миччха̄дит̣т̣хи хоти, миччха̄дит̣т̣хипаччайа̄ ча дуккхам̣ доманассам̣ пат̣исам̣ведети. со ка̄йасса бхеда̄ парам̣ маран̣а̄ апа̄йам̣ дуггатим̣ винипа̄там̣ нирайам̣ упападжджати. идам̣ вуччати, бхиккхаве, дхаммасама̄да̄нам̣ паччуппаннадуккхан̃чева а̄йатин̃ча дуккхавипа̄кам̣.

479. ‘‘катаман̃ча, бхиккхаве, дхаммасама̄да̄нам̣ паччуппаннасукхам̣ а̄йатим̣ дуккхавипа̄кам̣? идха, бхиккхаве, екаччо саха̄пи сукхена саха̄пи соманассена па̄н̣а̄типа̄тӣ хоти, па̄н̣а̄типа̄тапаччайа̄ ча сукхам̣ соманассам̣ пат̣исам̣ведети; саха̄пи сукхена саха̄пи соманассена адинна̄да̄йӣ хоти, адинна̄да̄напаччайа̄ ча сукхам̣ соманассам̣ пат̣исам̣ведети; саха̄пи сукхена саха̄пи соманассена ка̄месумиччха̄ча̄рӣ хоти, ка̄месумиччха̄ча̄рапаччайа̄ ча сукхам̣ соманассам̣ пат̣исам̣ведети; саха̄пи сукхена саха̄пи соманассена муса̄ва̄дӣ хоти, муса̄ва̄дапаччайа̄ ча сукхам̣ соманассам̣ пат̣исам̣ведети; саха̄пи сукхена саха̄пи соманассена писун̣ава̄чо хоти, писун̣ава̄ча̄паччайа̄ ча сукхам̣ соманассам̣ пат̣исам̣ведети; саха̄пи сукхена саха̄пи соманассена пхарусава̄чо хоти, пхарусава̄ча̄паччайа̄ ча сукхам̣ соманассам̣ пат̣исам̣ведети; саха̄пи сукхена саха̄пи соманассена сампхаппала̄пӣ хоти, сампхаппала̄папаччайа̄ ча сукхам̣ соманассам̣ пат̣исам̣ведети; саха̄пи сукхена саха̄пи соманассена абхиджджха̄лу хоти, абхиджджха̄паччайа̄ ча сукхам̣ соманассам̣ пат̣исам̣ведети; саха̄пи сукхена саха̄пи соманассена бйа̄панначитто хоти, бйа̄па̄дапаччайа̄ ча сукхам̣ соманассам̣ пат̣исам̣ведети; саха̄пи сукхена саха̄пи соманассена миччха̄дит̣т̣хи хоти, миччха̄дит̣т̣хипаччайа̄ ча сукхам̣ соманассам̣ пат̣исам̣ведети. со ка̄йасса бхеда̄ парам̣ маран̣а̄ апа̄йам̣ дуггатим̣ винипа̄там̣ нирайам̣ упападжджати. идам̣ вуччати, бхиккхаве, дхаммасама̄да̄нам̣ паччуппаннасукхам̣ а̄йатим̣ дуккхавипа̄кам̣.

480. ‘‘катаман̃ча, бхиккхаве, дхаммасама̄да̄нам̣ паччуппаннадуккхам̣ а̄йатим̣ сукхавипа̄кам̣? идха, бхиккхаве, екаччо саха̄пи дуккхена саха̄пи доманассена па̄н̣а̄типа̄та̄ пат̣ивирато хоти, па̄н̣а̄типа̄та̄ вераман̣ӣпаччайа̄ ча дуккхам̣ доманассам̣ пат̣исам̣ведети; саха̄пи дуккхена саха̄пи доманассена адинна̄да̄на̄ пат̣ивирато хоти, адинна̄да̄на̄ вераман̣ӣпаччайа̄ ча дуккхам̣ доманассам̣ пат̣исам̣ведети; саха̄пи дуккхена саха̄пи доманассена ка̄месумиччха̄ча̄ра̄ пат̣ивирато хоти, ка̄месумиччха̄ча̄ра̄ вераман̣ӣпаччайа̄ ча дуккхам̣ доманассам̣ пат̣исам̣ведети; саха̄пи дуккхена саха̄пи доманассена муса̄ва̄да̄ пат̣ивирато хоти, муса̄ва̄да̄ вераман̣ӣпаччайа̄ ча дуккхам̣ доманассам̣ пат̣исам̣ведети; саха̄пи дуккхена саха̄пи доманассена писун̣а̄йа ва̄ча̄йа пат̣ивирато хоти, писун̣а̄йа ва̄ча̄йа вераман̣ӣпаччайа̄ ча дуккхам̣ доманассам̣ пат̣исам̣ведети; саха̄пи дуккхена саха̄пи доманассена пхаруса̄йа ва̄ча̄йа пат̣ивирато хоти, пхаруса̄йа ва̄ча̄йа вераман̣ӣпаччайа̄ ча дуккхам̣ доманассам̣ пат̣исам̣ведети; саха̄пи дуккхена саха̄пи доманассена сампхаппала̄па̄ пат̣ивирато хоти, сампхаппала̄па̄ вераман̣ӣпаччайа̄ ча дуккхам̣ доманассам̣ пат̣исам̣ведети; саха̄пи дуккхена саха̄пи доманассена анабхиджджха̄лу хоти, анабхиджджха̄паччайа̄ ча дуккхам̣ доманассам̣ пат̣исам̣ведети; саха̄пи дуккхена саха̄пи доманассена абйа̄панначитто хоти, абйа̄па̄дапаччайа̄ ча дуккхам̣ доманассам̣ пат̣исам̣ведети; саха̄пи дуккхена саха̄пи доманассена самма̄дит̣т̣хи хоти, самма̄дит̣т̣хипаччайа̄ ча дуккхам̣ доманассам̣ пат̣исам̣ведети. со ка̄йасса бхеда̄ парам̣ маран̣а̄ сугатим̣ саггам̣ локам̣ упападжджати. идам̣ вуччати, бхиккхаве, дхаммасама̄да̄нам̣ паччуппаннадуккхам̣ а̄йатим̣ сукхавипа̄кам̣.

481. ‘‘катаман̃ча, бхиккхаве, дхаммасама̄да̄нам̣ паччуппаннасукхан̃чева а̄йатин̃ча сукхавипа̄кам̣? идха, бхиккхаве, екаччо саха̄пи сукхена саха̄пи соманассена па̄н̣а̄типа̄та̄ пат̣ивирато хоти, па̄н̣а̄типа̄та̄ вераман̣ӣпаччайа̄ ча сукхам̣ соманассам̣ пат̣исам̣ведети; саха̄пи сукхена саха̄пи соманассена адинна̄да̄на̄ пат̣ивирато хоти, адинна̄да̄на̄ вераман̣ӣпаччайа̄ ча сукхам̣ соманассам̣ пат̣исам̣ведети; саха̄пи сукхена саха̄пи соманассена ка̄месумиччха̄ча̄ра̄ пат̣ивирато хоти, ка̄месумиччха̄ча̄ра̄ вераман̣ӣпаччайа̄ ча сукхам̣ соманассам̣ пат̣исам̣ведети; саха̄пи сукхена саха̄пи соманассена муса̄ва̄да̄ пат̣ивирато хоти, муса̄ва̄да̄ вераман̣ӣпаччайа̄ ча сукхам̣ соманассам̣ пат̣исам̣ведети; саха̄пи сукхена саха̄пи соманассена писун̣а̄йа ва̄ча̄йа пат̣ивирато хоти, писун̣а̄йа ва̄ча̄йа вераман̣ӣпаччайа̄ ча сукхам̣ соманассам̣ пат̣исам̣ведети; саха̄пи сукхена саха̄пи соманассена пхаруса̄йа ва̄ча̄йа пат̣ивирато хоти, пхаруса̄йа ва̄ча̄йа вераман̣ӣпаччайа̄ ча сукхам̣ соманассам̣ пат̣исам̣ведети; саха̄пи сукхена саха̄пи соманассена сампхаппала̄па̄ пат̣ивирато хоти, сампхаппала̄па̄ вераман̣ӣпаччайа̄ ча сукхам̣ соманассам̣ пат̣исам̣ведети; саха̄пи сукхена саха̄пи соманассена анабхиджджха̄лу хоти, анабхиджджха̄паччайа̄ ча сукхам̣ соманассам̣ пат̣исам̣ведети; саха̄пи сукхена саха̄пи соманассена абйа̄панначитто хоти, абйа̄па̄дапаччайа̄ ча сукхам̣ соманассам̣ пат̣исам̣ведети; саха̄пи сукхена саха̄пи соманассена самма̄дит̣т̣хи хоти, самма̄дит̣т̣хипаччайа̄ ча сукхам̣ соманассам̣ пат̣исам̣ведети. со ка̄йасса бхеда̄ парам̣ маран̣а̄ сугатим̣ саггам̣ локам̣ упападжджати. идам̣, вуччати, бхиккхаве, дхаммасама̄да̄нам̣ паччуппаннасукхан̃чева а̄йатин̃ча сукхавипа̄кам̣. има̄ни кхо, бхиккхаве, чатта̄ри дхаммасама̄да̄на̄ни.

482. ‘‘сеййатха̄пи, бхиккхаве, титтака̄ла̄бу висена сам̣сат̣т̣хо. атха пурисо а̄гаччхеййа джӣвитука̄мо амаритука̄мо сукхака̄мо дуккхаппат̣икӯло. таменам̣ евам̣ вадеййум̣ – ‘амбхо пуриса, айам̣ титтака̄ла̄бу висена сам̣сат̣т̣хо, саче а̄кан̇кхаси пива [пипа (сӣ. пӣ.)]. тасса те пивато [пипато (сӣ. пӣ.)] чева наччха̄дессати ван̣н̣енапи гандхенапи расенапи, пивитва̄ [пӣтва̄ (сӣ.)] ча пана маран̣ам̣ ва̄ нигаччхаси маран̣аматтам̣ ва̄ дуккха’нти. со там̣ аппат̣исан̇кха̄йа пивеййа, наппат̣иниссаджджеййа. тасса там̣ пивато чева наччха̄деййа ван̣н̣енапи гандхенапи расенапи, пивитва̄ ча пана маран̣ам̣ ва̄ нигаччхеййа маран̣аматтам̣ ва̄ дуккхам̣. татхӯпама̄хам̣, бхиккхаве, имам̣ дхаммасама̄да̄нам̣ вада̄ми, йамидам̣ дхаммасама̄да̄нам̣ паччуппаннадуккхан̃чева а̄йатин̃ча дуккхавипа̄кам̣.

483. ‘‘сеййатха̄пи, бхиккхаве, а̄па̄нӣйакам̣со ван̣н̣асампанно гандхасампанно расасампанно. со ча кхо висена сам̣сат̣т̣хо. атха пурисо а̄гаччхеййа джӣвитука̄мо амаритука̄мо сукхака̄мо дуккхаппат̣икӯло. таменам̣ евам̣ вадеййум̣ – ‘амбхо пуриса, айам̣ а̄па̄нӣйакам̣со ван̣н̣асампанно гандхасампанно расасампанно. со ча кхо висена сам̣сат̣т̣хо, саче а̄кан̇кхаси пива. тасса те пиватохи [пиватопи (ка.)] кхо чха̄дессати ван̣н̣енапи гандхенапи расенапи, пивитва̄ ча пана маран̣ам̣ ва̄ нигаччхаси маран̣аматтам̣ ва̄ дуккха’нти. со там̣ аппат̣исан̇кха̄йа пивеййа, наппат̣иниссаджджеййа. тасса там̣ пиватохи кхо чха̄деййа ван̣н̣енапи гандхенапи расенапи, пивитва̄ ча пана маран̣ам̣ ва̄ нигаччхеййа маран̣аматтам̣ ва̄ дуккхам̣. татхӯпама̄хам̣, бхиккхаве, имам̣ дхаммасама̄да̄нам̣ вада̄ми, йамидам̣ дхаммасама̄да̄нам̣ паччуппаннасукхам̣ а̄йатим̣ дуккхавипа̄кам̣.

484. ‘‘сеййатха̄пи, бхиккхаве, пӯтимуттам̣ на̄на̄бхесаджджехи сам̣сат̣т̣хам̣. атха пурисо а̄гаччхеййа пан̣д̣укарогӣ. таменам̣ евам̣ вадеййум̣ – ‘амбхо пуриса, идам̣ пӯтимуттам̣ на̄на̄бхесаджджехи сам̣сат̣т̣хам̣, саче а̄кан̇кхаси пива. тасса те пиватохи кхо наччха̄дессати ван̣н̣енапи гандхенапи расенапи, пивитва̄ ча пана сукхӣ бхависсасӣ’ти. со там̣ пат̣исан̇кха̄йа пивеййа, наппат̣иниссаджджеййа. тасса там̣ пиватохи кхо наччха̄деййа ван̣н̣енапи гандхенапи расенапи, пивитва̄ ча пана сукхӣ асса. татхӯпама̄хам̣, бхиккхаве, имам̣ дхаммасама̄да̄нам̣ вада̄ми, йамидам̣ дхаммасама̄да̄нам̣ паччуппаннадуккхам̣ а̄йатим̣ сукхавипа̄кам̣.

485. ‘‘сеййатха̄пи, бхиккхаве, дадхи ча мадху ча саппи ча пха̄н̣итан̃ча екаджджхам̣ сам̣сат̣т̣хам̣. атха пурисо а̄гаччхеййа лохитапаккхандико. таменам̣ евам̣ вадеййум̣ – ‘амбхо пуриса, идам̣ дадхим̣ ча мадхум̣ ча саппим̣ ча пха̄н̣итан̃ча екаджджхам̣ сам̣сат̣т̣хам̣, саче а̄кан̇кхаси пива. тасса те пивато чева чха̄дессати ван̣н̣енапи гандхенапи расенапи, пивитва̄ ча пана сукхӣ бхависсасӣ’ти. со там̣ пат̣исан̇кха̄йа пивеййа, наппат̣иниссаджджеййа. тасса там̣ пивато чева чха̄деййа ван̣н̣енапи гандхенапи расенапи, пивитва̄ ча пана сукхӣ асса. татхӯпама̄хам̣, бхиккхаве, имам̣ дхаммасама̄да̄нам̣ вада̄ми, йамидам̣ дхаммасама̄да̄нам̣ паччуппаннасукхан̃чева а̄йатин̃ча сукхавипа̄кам̣.

486. ‘‘сеййатха̄пи, бхиккхаве, васса̄нам̣ паччхиме ма̄се сарадасамайе виддхе вигатавала̄хаке деве а̄диччо набхам̣ аббхуссаккама̄но саббам̣ а̄ка̄сагатам̣ тамагатам̣ абхивихачча бха̄сате ча тапате ча вирочате ча; евамева кхо, бхиккхаве, йамидам̣ дхаммасама̄да̄нам̣ паччуппаннасукхан̃чева а̄йатин̃ча сукхавипа̄кам̣ тадан̃н̃е путхусаман̣абра̄хман̣апараппава̄де абхивихачча бха̄сате ча тапате ча вирочате ча̄’’ти.

идамавоча бхагава̄. аттамана̄ те бхиккхӯ бхагавато бха̄ситам̣ абхинандунти.

маха̄дхаммасама̄да̄насуттам̣ нит̣т̣хитам̣ чхат̣т̣хам̣.