5. анан̇ган̣асуттам̣

57. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. татра кхо а̄йасма̄ са̄рипутто бхиккхӯ а̄мантеси – ‘‘а̄вусо, бхиккхаве’’ти. ‘‘а̄вусо’’ти кхо те бхиккхӯ а̄йасмато са̄рипуттасса паччассосум̣. а̄йасма̄ са̄рипутто етадавоча –

‘‘чатта̄роме, а̄вусо, пуггала̄ санто сам̣виджджама̄на̄ локасмим̣. катаме чатта̄ро? идха̄вусо, екаччо пуггало са̄н̇ган̣ова сама̄но ‘аттхи ме аджджхаттам̣ ан̇ган̣а’нти йатха̄бхӯтам̣ наппаджа̄на̄ти. идха пана̄вусо, екаччо пуггало са̄н̇ган̣ова сама̄но ‘аттхи ме аджджхаттам̣ ан̇ган̣а’нти йатха̄бхӯтам̣ паджа̄на̄ти. идха̄вусо, екаччо пуггало анан̇ган̣ова сама̄но ‘наттхи ме аджджхаттам̣ ан̇ган̣а’нти йатха̄бхӯтам̣ наппаджа̄на̄ти. идха пана̄вусо, екаччо пуггало анан̇ган̣ова сама̄но ‘наттхи ме аджджхаттам̣ ан̇ган̣а’нти йатха̄бхӯтам̣ паджа̄на̄ти. татра̄вусо, йва̄йам̣ пуггало са̄н̇ган̣ова сама̄но ‘аттхи ме аджджхаттам̣ ан̇ган̣а’нти йатха̄бхӯтам̣ наппаджа̄на̄ти, айам̣ имесам̣ двиннам̣ пуггала̄нам̣ са̄н̇ган̣а̄нам̣йева сатам̣ хӣнапурисо аккха̄йати. татра̄вусо, йва̄йам̣ пуггало са̄н̇ган̣ова сама̄но ‘аттхи ме аджджхаттам̣ ан̇ган̣а’нти йатха̄бхӯтам̣ паджа̄на̄ти, айам̣ имесам̣ двиннам̣ пуггала̄нам̣ са̄н̇ган̣а̄нам̣йева сатам̣ сет̣т̣хапурисо аккха̄йати. татра̄вусо, йва̄йам̣ пуггало анан̇ган̣ова сама̄но ‘наттхи ме аджджхаттам̣ ан̇ган̣а’нти йатха̄бхӯтам̣ наппаджа̄на̄ти, айам̣ имесам̣ двиннам̣ пуггала̄нам̣ анан̇ган̣а̄нам̣йева сатам̣ хӣнапурисо аккха̄йати. татра̄вусо, йва̄йам̣ пуггало анан̇ган̣ова сама̄но ‘наттхи ме аджджхаттам̣ ан̇ган̣а’нти йатха̄бхӯтам̣ паджа̄на̄ти, айам̣ имесам̣ двиннам̣ пуггала̄нам̣ анан̇ган̣а̄нам̣йева сатам̣ сет̣т̣хапурисо аккха̄йатӣ’’ти.

58. евам̣ вутте, а̄йасма̄ маха̄моггалла̄но а̄йасмантам̣ са̄рипуттам̣ етадавоча –

‘‘ко ну кхо, а̄вусо са̄рипутта, хету ко паччайо йенимесам̣ двиннам̣ пуггала̄нам̣ са̄н̇ган̣а̄нам̣йева сатам̣ еко хӣнапурисо аккха̄йати, еко сет̣т̣хапурисо аккха̄йати? ко пана̄вусо са̄рипутта, хету ко паччайо йенимесам̣ двиннам̣ пуггала̄нам̣ анан̇ган̣а̄нам̣йева сатам̣ еко хӣнапурисо аккха̄йати, еко сет̣т̣хапурисо аккха̄йатӣ’’ти?

59. ‘‘татра̄вусо, йва̄йам̣ пуггало са̄н̇ган̣ова сама̄но ‘аттхи ме аджджхаттам̣ ан̇ган̣а’нти йатха̄бхӯтам̣ наппаджа̄на̄ти, тассетам̣ па̄т̣икан̇кхам̣ – на чхандам̣ джанессати на ва̄йамиссати на вӣрийам̣ а̄рабхиссати тассан̇ган̣асса паха̄на̄йа; со сара̄го садосо самохо са̄н̇ган̣о сам̣килит̣т̣хачитто ка̄лам̣ кариссати. сеййатха̄пи, а̄вусо, кам̣сапа̄ти а̄бхата̄ а̄пан̣а̄ ва̄ камма̄ракула̄ ва̄ раджена ча малена ча парийонаддха̄. таменам̣ са̄мика̄ на чева парибхун̃джеййум̣ на ча парийодапеййум̣ [парийода̄пеййум̣ (?)], раджа̄патхе ча нам̣ никкхипеййум̣. еван̃хи са̄, а̄вусо, кам̣сапа̄ти апарена самайена сам̣килит̣т̣хатара̄ асса малаггахита̄’’ти? ‘‘евама̄вусо’’ти. ‘‘евамева кхо, а̄вусо, йва̄йам̣ пуггало са̄н̇ган̣ова сама̄но ‘аттхи ме аджджхаттам̣ ан̇ган̣а’нти йатха̄бхӯтам̣ наппаджа̄на̄ти, тассетам̣ па̄т̣икан̇кхам̣ – на чхандам̣ джанессати на ва̄йамиссати на вӣрийам̣ а̄рабхиссати тассан̇ган̣асса паха̄на̄йа; со сара̄го садосо самохо са̄н̇ган̣о сам̣килит̣т̣хачитто ка̄лам̣ кариссати.

‘‘татра̄вусо, йва̄йам̣ пуггало са̄н̇ган̣ова сама̄но ‘аттхи ме аджджхаттам̣ ан̇ган̣а’нти йатха̄бхӯтам̣ паджа̄на̄ти, тассетам̣ па̄т̣икан̇кхам̣ – чхандам̣ джанессати ва̄йамиссати вӣрийам̣ а̄рабхиссати тассан̇ган̣асса паха̄на̄йа; со ара̄го адосо амохо анан̇ган̣о асам̣килит̣т̣хачитто ка̄лам̣ кариссати. сеййатха̄пи, а̄вусо, кам̣сапа̄ти а̄бхата̄ а̄пан̣а̄ ва̄ камма̄ракула̄ ва̄ раджена ча малена ча парийонаддха̄. таменам̣ са̄мика̄ парибхун̃джеййун̃чева парийодапеййун̃ча, на ча нам̣ раджа̄патхе никкхипеййум̣. еван̃хи са̄, а̄вусо, кам̣сапа̄ти апарена самайена парисуддхатара̄ асса парийода̄та̄’’ти? ‘‘евама̄вусо’’ти. ‘‘евамева кхо, а̄вусо, йва̄йам̣ пуггало са̄н̇ган̣ова сама̄но ‘аттхи ме аджджхаттам̣ ан̇ган̣а’нти йатха̄бхӯтам̣ паджа̄на̄ти, тассетам̣ па̄т̣икан̇кхам̣ – чхандам̣ джанессати ва̄йамиссати вӣрийам̣ а̄рабхиссати тассан̇ган̣асса паха̄на̄йа; со ара̄го адосо амохо анан̇ган̣о асам̣килит̣т̣хачитто ка̄лам̣ кариссати.

‘‘татра̄вусо, йва̄йам̣ пуггало анан̇ган̣ова сама̄но ‘наттхи ме аджджхаттам̣ ан̇ган̣а’нти йатха̄бхӯтам̣ наппаджа̄на̄ти, тассетам̣ па̄т̣икан̇кхам̣ – субханимиттам̣ манаси кариссати, тасса субханимиттасса манасика̄ра̄ ра̄го читтам̣ ануддхам̣сессати; со сара̄го садосо самохо са̄н̇ган̣о сам̣килит̣т̣хачитто ка̄лам̣ кариссати. сеййатха̄пи, а̄вусо, кам̣сапа̄ти а̄бхата̄ а̄пан̣а̄ ва̄ камма̄ракула̄ ва̄ парисуддха̄ парийода̄та̄. таменам̣ са̄мика̄ на чева парибхун̃джеййум̣ на ча парийодапеййум̣, раджа̄патхе ча нам̣ никкхипеййум̣. еван̃хи са̄, а̄вусо, кам̣сапа̄ти апарена самайена сам̣килит̣т̣хатара̄ асса малаггахита̄’’ти? ‘‘евама̄вусо’’ти. ‘‘евамева кхо, а̄вусо, йва̄йам̣ пуггало анан̇ган̣ова сама̄но ‘наттхи ме аджджхаттам̣ ан̇ган̣а’нти йатха̄бхӯтам̣ наппаджа̄на̄ти, тассетам̣ па̄т̣икан̇кхам̣ – субханимиттам̣ манаси кариссати, тасса субханимиттасса манасика̄ра̄ ра̄го читтам̣ ануддхам̣сессати;со сара̄го садосо самохо са̄н̇ган̣о сам̣килит̣т̣хачиттока̄лам̣кариссати.

‘‘татра̄вусо, йва̄йам̣ пуггало анан̇ган̣ова сама̄но ‘наттхи ме аджджхаттам̣ ан̇ган̣а’нти йатха̄бхӯтам̣ паджа̄на̄ти, тассетам̣ па̄т̣икан̇кхам̣ – субханимиттам̣ на манаси кариссати, тасса субханимиттасса аманасика̄ра̄ ра̄го читтам̣ на̄нуддхам̣сессати; со ара̄го адосо амохо анан̇ган̣о асам̣килит̣т̣хачитто ка̄лам̣ кариссати. сеййатха̄пи, а̄вусо, кам̣сапа̄ти а̄бхата̄ а̄пан̣а̄ ва̄ камма̄ракула̄ ва̄ парисуддха̄ парийода̄та̄. таменам̣ са̄мика̄ парибхун̃джеййун̃чева парийодапеййун̃ча, на ча нам̣ раджа̄патхе никкхипеййум̣. еван̃хи са̄, а̄вусо, кам̣сапа̄ти апарена самайена парисуддхатара̄ асса парийода̄та̄’’ти? ‘‘евама̄вусо’’ти. ‘‘евамева кхо, а̄вусо, йва̄йам̣ пуггало анан̇ган̣ова сама̄но ‘наттхи ме аджджхаттам̣ ан̇ган̣а’нти йатха̄бхӯтам̣ паджа̄на̄ти, тассетам̣ па̄т̣икан̇кхам̣ – субханимиттам̣ на манаси кариссати, тасса субханимиттасса аманасика̄ра̄ ра̄го читтам̣ на̄нуддхам̣сессати; со ара̄го адосо амохо анан̇ган̣о асам̣килит̣т̣хачитто ка̄лам̣ кариссати.

‘‘айам̣ кхо, а̄вусо моггалла̄на, хету айам̣ паччайо йенимесам̣ двиннам̣ пуггала̄нам̣ са̄н̇ган̣а̄нам̣йева сатам̣ еко хӣнапурисо аккха̄йати, еко сет̣т̣хапурисо аккха̄йати. айам̣ пана̄вусо моггалла̄на, хету айам̣ паччайо йенимесам̣ двиннам̣ пуггала̄нам̣ анан̇ган̣а̄нам̣йева сатам̣ еко хӣнапурисо аккха̄йати, еко сет̣т̣хапурисо аккха̄йатӣ’’ти.

60. ‘‘ан̇ган̣ам̣ ан̇ган̣анти, а̄вусо, вуччати. кисса ну кхо етам̣, а̄вусо, адхивачанам̣ йадидам̣ ан̇ган̣а’’нти? ‘‘па̄пака̄нам̣ кхо етам̣, а̄вусо, акусала̄нам̣ иччха̄вачара̄нам̣ адхивачанам̣, йадидам̣ ан̇ган̣а’’нти.

‘‘т̣ха̄нам̣ кхо панетам̣, а̄вусо, виджджати йам̣ идхекаччасса бхиккхуно евам̣ иччха̄ уппаджджеййа – ‘а̄паттин̃ча вата а̄панно ассам̣, на ча мам̣ бхиккхӯ джа̄неййум̣ а̄паттим̣ а̄панно’ти. т̣ха̄нам̣ кхо панетам̣, а̄вусо, виджджати йам̣ там̣ бхиккхум̣ бхиккхӯ джа̄неййум̣ – ‘а̄паттим̣ а̄панно’ти. ‘джа̄нанти мам̣ бхиккхӯ а̄паттим̣ а̄панно’ти – ити со купито хоти аппатӣто. йо чева кхо, а̄вусо, копо йо ча аппаччайо – убхайаметам̣ ан̇ган̣ам̣.

‘‘т̣ха̄нам̣ кхо панетам̣, а̄вусо, виджджати йам̣ идхекаччасса бхиккхуно евам̣ иччха̄ уппаджджеййа – ‘а̄паттин̃ча вата а̄панно ассам̣, анурахо мам̣ бхиккхӯ чодеййум̣, но сан̇гхамаджджхе’ти. т̣ха̄нам̣ кхо панетам̣, а̄вусо, виджджати йам̣ там̣ бхиккхум̣ бхиккхӯ сан̇гхамаджджхе чодеййум̣, но анурахо. ‘сан̇гхамаджджхе мам̣ бхиккхӯ чоденти, но анурахо’ти – ити со купито хоти аппатӣто. йо чева кхо, а̄вусо, копо йо ча аппаччайо – убхайаметам̣ ан̇ган̣ам̣.

‘‘т̣ха̄нам̣ кхо панетам̣, а̄вусо, виджджати йам̣ идхекаччасса бхиккхуно евам̣ иччха̄ уппаджджеййа – ‘а̄паттин̃ча вата а̄панно ассам̣, саппат̣ипуггало мам̣ чодеййа, но аппат̣ипуггало’ти. т̣ха̄нам̣ кхо панетам̣, а̄вусо, виджджати йам̣ там̣ бхиккхум̣ аппат̣ипуггало чодеййа, но саппат̣ипуггало. ‘аппат̣ипуггало мам̣ чодети, но саппат̣ипуггало’ти – ити со купито хоти аппатӣто. йо чева кхо, а̄вусо, копо йо ча аппаччайо – убхайаметам̣ ан̇ган̣ам̣.

‘‘т̣ха̄нам̣ кхо панетам̣, а̄вусо, виджджати йам̣ идхекаччасса бхиккхуно евам̣ иччха̄ уппаджджеййа – ‘ахо вата мамева саттха̄ пат̣ипуччхитва̄ пат̣ипуччхитва̄ бхиккхӯнам̣ дхаммам̣ десеййа, на ан̃н̃ам̣ бхиккхум̣ саттха̄ пат̣ипуччхитва̄ пат̣ипуччхитва̄ бхиккхӯнам̣ дхаммам̣ десеййа̄’ти. т̣ха̄нам̣ кхо панетам̣, а̄вусо, виджджати йам̣ ан̃н̃ам̣ бхиккхум̣ саттха̄ пат̣ипуччхитва̄ пат̣ипуччхитва̄ бхиккхӯнам̣ дхаммам̣ десеййа, на там̣ бхиккхум̣ саттха̄ пат̣ипуччхитва̄ пат̣ипуччхитва̄ бхиккхӯнам̣ дхаммам̣ десеййа. ‘ан̃н̃ам̣ бхиккхум̣ саттха̄ пат̣ипуччхитва̄ пат̣ипуччхитва̄ бхиккхӯнам̣ дхаммам̣ десети, на мам̣ саттха̄ пат̣ипуччхитва̄ пат̣ипуччхитва̄ бхиккхӯнам̣ дхаммам̣ десетӣ’ти – ити со купито хоти аппатӣто. йо чева кхо, а̄вусо, копо йо ча аппаччайо – убхайаметам̣ ан̇ган̣ам̣.

‘‘т̣ха̄нам̣ кхо панетам̣, а̄вусо, виджджати йам̣ идхекаччасса бхиккхуно евам̣ иччха̄ уппаджджеййа – ‘ахо вата мамева бхиккхӯ пураккхатва̄ пураккхатва̄ га̄мам̣ бхатта̄йа пависеййум̣, на ан̃н̃ам̣ бхиккхум̣ бхиккхӯ пураккхатва̄ пураккхатва̄ га̄мам̣ бхатта̄йа пависеййу’нти. т̣ха̄нам̣ кхо панетам̣, а̄вусо, виджджати йам̣ ан̃н̃ам̣ бхиккхум̣ бхиккхӯ пураккхатва̄ пураккхатва̄ га̄мам̣ бхатта̄йа пависеййум̣, на там̣ бхиккхум̣ бхиккхӯ пураккхатва̄ пураккхатва̄ га̄мам̣ бхатта̄йа пависеййум̣. ‘ан̃н̃ам̣ бхиккхум̣ бхиккхӯ пураккхатва̄ пураккхатва̄ га̄мам̣ бхатта̄йа пависанти, на мам̣ бхиккхӯ пураккхатва̄ пураккхатва̄ га̄мам̣ бхатта̄йа пависантӣ’ти – ити со купито хоти аппатӣто. йо чева кхо, а̄вусо, копо йо ча аппаччайо – убхайаметам̣ ан̇ган̣ам̣.

‘‘т̣ха̄нам̣ кхо панетам̣, а̄вусо, виджджати йам̣ идхекаччасса бхиккхуно евам̣ иччха̄ уппаджджеййа – ‘ахо вата ахамева лабхеййам̣ бхаттагге агга̄санам̣ аггодакам̣ аггапин̣д̣ам̣, на ан̃н̃о бхиккху лабхеййа бхаттагге агга̄санам̣ аггодакам̣ аггапин̣д̣а’нти. т̣ха̄нам̣ кхо панетам̣, а̄вусо, виджджати йам̣ ан̃н̃о бхиккху лабхеййа бхаттагге агга̄санам̣ аггодакам̣ аггапин̣д̣ам̣, на со бхиккху лабхеййа бхаттагге агга̄санам̣ аггодакам̣ аггапин̣д̣ам̣. ‘ан̃н̃о бхиккху лабхати бхаттагге агга̄санам̣ аггодакам̣ аггапин̣д̣ам̣, на̄хам̣ лабха̄ми бхаттагге агга̄санам̣ аггодакам̣ аггапин̣д̣а’нти – ити со купито хоти аппатӣто. йо чева кхо, а̄вусо, копо йо ча аппаччайо – убхайаметам̣ ан̇ган̣ам̣.

‘‘т̣ха̄нам̣ кхо панетам̣, а̄вусо, виджджати йам̣ идхекаччасса бхиккхуно евам̣ иччха̄ уппаджджеййа – ‘ахо вата ахамева бхаттагге бхутта̄вӣ анумодеййам̣, на ан̃н̃о бхиккху бхаттагге бхутта̄вӣ анумодеййа̄’ти. т̣ха̄нам̣ кхо панетам̣, а̄вусо, виджджати йам̣ ан̃н̃о бхиккху бхаттагге бхутта̄вӣ анумодеййа, на со бхиккху бхаттагге бхутта̄вӣ анумодеййа. ‘ан̃н̃о бхиккху бхаттагге бхутта̄вӣ анумодати, на̄хам̣ бхаттагге бхутта̄вӣ анумода̄мӣ’ти – ити со купито хоти аппатӣто. йо чева кхо, а̄вусо, копо йо ча аппаччайо – убхайаметам̣ ан̇ган̣ам̣.

‘‘т̣ха̄нам̣ кхо панетам̣, а̄вусо, виджджати йам̣ идхекаччасса бхиккхуно евам̣ иччха̄ уппаджджеййа – ‘ахо вата ахамева а̄ра̄магата̄нам̣ бхиккхӯнам̣ дхаммам̣ десеййам̣, на ан̃н̃о бхиккху а̄ра̄магата̄нам̣ бхиккхӯнам̣ дхаммам̣ десеййа̄’ти. т̣ха̄нам̣ кхо панетам̣, а̄вусо, виджджати йам̣ ан̃н̃о бхиккху а̄ра̄магата̄нам̣ бхиккхӯнам̣ дхаммам̣ десеййа, на со бхиккху а̄ра̄магата̄нам̣ бхиккхӯнам̣ дхаммам̣ десеййа. ‘ан̃н̃о бхиккху а̄ра̄магата̄нам̣ бхиккхӯнам̣ дхаммам̣ десети, на̄хам̣ а̄ра̄магата̄нам̣ бхиккхӯнам̣ дхаммам̣ десемӣ’ти – ити со купито хоти аппатӣто. йо чева кхо, а̄вусо, копо йо ча аппаччайо – убхайаметам̣ ан̇ган̣ам̣.

‘‘т̣ха̄нам̣ кхо панетам̣, а̄вусо, виджджати йам̣ идхекаччасса бхиккхуно евам̣ иччха̄ уппаджджеййа – ‘ахо вата ахамева а̄ра̄магата̄нам̣ бхиккхунӣнам̣ дхаммам̣ десеййам̣…пе… упа̄сака̄нам̣ дхаммам̣ десеййам̣…пе… упа̄сика̄нам̣ дхаммам̣ десеййам̣, на ан̃н̃о бхиккху а̄ра̄магата̄нам̣ упа̄сика̄нам̣ дхаммам̣ десеййа̄’ти. т̣ха̄нам̣ кхо панетам̣, а̄вусо, виджджати йам̣ ан̃н̃о бхиккху а̄ра̄магата̄нам̣ упа̄сика̄нам̣ дхаммам̣ десеййа, на со бхиккху а̄ра̄магата̄нам̣ упа̄сика̄нам̣ дхаммам̣ десеййа. ‘ан̃н̃о бхиккху а̄ра̄магата̄нам̣ упа̄сика̄нам̣ дхаммам̣ десети, на̄хам̣ а̄ра̄магата̄нам̣ упа̄сика̄нам̣ дхаммам̣ десемӣ’ти – ити со купито хоти аппатӣто. йо чева кхо, а̄вусо, копо йо ча аппаччайо – убхайаметам̣ ан̇ган̣ам̣.

‘‘т̣ха̄нам̣ кхо панетам̣, а̄вусо, виджджати йам̣ идхекаччасса бхиккхуно евам̣ иччха̄ уппаджджеййа – ‘ахо вата мамева бхиккхӯ саккареййум̣ гарум̣ кареййум̣ [гарукареййум̣ (сӣ. сйа̄. пӣ.)] ма̄неййум̣ пӯджеййум̣, на ан̃н̃ам̣ бхиккхум̣ бхиккхӯ саккареййум̣ гарум̣ кареййум̣ ма̄неййум̣ пӯджеййу’нти. т̣ха̄нам̣ кхо панетам̣, а̄вусо, виджджати йам̣ ан̃н̃ам̣ бхиккхум̣ бхиккхӯ саккареййум̣ гарум̣ кареййум̣ ма̄неййум̣ пӯджеййум̣, на там̣ бхиккхум̣ бхиккхӯ саккареййум̣ гарум̣ кареййум̣ ма̄неййум̣ пӯджеййум̣. ‘ан̃н̃ам̣ бхиккхум̣ бхиккхӯ саккаронти гарум̣ каронти ма̄ненти пӯдженти, на мам̣ бхиккхӯ саккаронти гарум̣ каронти ма̄ненти пӯджентӣ’ти – ити со купито хоти аппатӣто. йо чева кхо, а̄вусо, копо йо ча аппаччайо – убхайаметам̣ ан̇ган̣ам̣.

‘‘т̣ха̄нам̣ кхо панетам̣, а̄вусо, виджджати йам̣ идхекаччасса бхиккхуно евам̣ иччха̄ уппаджджеййа – ‘ахо вата мамева бхиккхунийо…пе… упа̄сака̄…пе… упа̄сика̄ саккареййум̣ гарум̣ кареййум̣ ма̄неййум̣ пӯджеййум̣, на ан̃н̃ам̣ бхиккхум̣ упа̄сика̄ саккареййум̣ гарум̣ кареййум̣ ма̄неййум̣ пӯджеййу’нти. т̣ха̄нам̣ кхо панетам̣, а̄вусо, виджджати йам̣ ан̃н̃ам̣ бхиккхум̣ упа̄сика̄ саккареййум̣ гарум̣ кареййум̣ ма̄неййум̣ пӯджеййум̣, на там̣ бхиккхум̣ упа̄сика̄ саккареййум̣ гарум̣ кареййум̣ ма̄неййум̣ пӯджеййум̣. ‘ан̃н̃ам̣ бхиккхум̣ упа̄сика̄ саккаронти гарум̣ каронти ма̄ненти пӯдженти, на мам̣ упа̄сика̄ саккаронти гарум̣ каронти ма̄ненти пӯджентӣ’ти – ити со купито хоти аппатӣто. йо чева кхо, а̄вусо, копо йо ча аппаччайо – убхайаметам̣ ан̇ган̣ам̣.

‘‘т̣ха̄нам̣ кхо панетам̣, а̄вусо, виджджати йам̣ идхекаччасса бхиккхуно евам̣ иччха̄ уппаджджеййа – ‘ахо вата ахамева ла̄бхӣ ассам̣ пан̣ӣта̄нам̣ чӣвара̄нам̣, на ан̃н̃о бхиккху ла̄бхӣ асса пан̣ӣта̄нам̣ чӣвара̄на’нти. т̣ха̄нам̣ кхо панетам̣, а̄вусо, виджджати йам̣ ан̃н̃о бхиккху ла̄бхӣ асса пан̣ӣта̄нам̣ чӣвара̄нам̣, на со бхиккху ла̄бхӣ асса пан̣ӣта̄нам̣ чӣвара̄нам̣. ‘ан̃н̃о бхиккху ла̄бхӣ [ла̄бхӣ асса (ка.)] пан̣ӣта̄нам̣ чӣвара̄нам̣, на̄хам̣ ла̄бхӣ [ла̄бхӣ ассам̣ (ка.)] пан̣ӣта̄нам̣ чӣвара̄на’нти – ити со купито хоти аппатӣто. йо чева кхо, а̄вусо, копо йо ча аппаччайо – убхайаметам̣ ан̇ган̣ам̣.

‘‘т̣ха̄нам̣ кхо панетам̣, а̄вусо, виджджати йам̣ идхекаччасса бхиккхуно евам̣ иччха̄ уппаджджеййа – ‘ахо вата ахамева ла̄бхӣ ассам̣ пан̣ӣта̄нам̣ пин̣д̣апа̄та̄нам̣…пе… пан̣ӣта̄нам̣ сена̄сана̄нам̣…пе… пан̣ӣта̄нам̣ гила̄наппаччайабхесаджджапариккха̄ра̄нам̣, на ан̃н̃о бхиккху ла̄бхӣ асса пан̣ӣта̄нам̣ гила̄наппаччайабхесаджджапариккха̄ра̄на’нти. т̣ха̄нам̣ кхо панетам̣, а̄вусо, виджджати йам̣ ан̃н̃о бхиккху ла̄бхӣ асса пан̣ӣта̄нам̣ гила̄наппаччайабхесаджджапариккха̄ра̄нам̣, на со бхиккху ла̄бхӣ асса пан̣ӣта̄нам̣ гила̄наппаччайабхесаджджапариккха̄ра̄нам̣. ‘ан̃н̃о бхиккху ла̄бхӣ [ла̄бхӣ асса (ка.)] пан̣ӣта̄нам̣ гила̄наппаччайабхесаджджапариккха̄ра̄нам̣, на̄хам̣ ла̄бхӣ [ла̄бхӣ ассам̣ (ка.)] пан̣ӣта̄нам̣ гила̄наппаччайабхесаджджапариккха̄ра̄на’нти – ити со купито хоти аппатӣто. йо чева кхо, а̄вусо, копо йо ча аппаччайо – убхайаметам̣ ан̇ган̣ам̣.

‘‘имесам̣ кхо етам̣, а̄вусо, па̄пака̄нам̣ акусала̄нам̣ иччха̄вачара̄нам̣ адхивачанам̣, йадидам̣ ан̇ган̣а’’нти.

61. ‘‘йасса кассачи, а̄вусо, бхиккхуно име па̄пака̄ акусала̄ иччха̄вачара̄ аппахӣна̄ диссанти чева сӯйанти ча, кин̃ча̄пи со хоти а̄ран̃н̃ико пантасена̄сано пин̣д̣апа̄тико сапада̄нача̄рӣ пам̣сукӯлико лӯкхачӣварадхаро, атха кхо нам̣ сабрахмача̄рӣ на чева саккаронти на гарум̣ каронти на ма̄ненти на пӯдженти. там̣ кисса хету? те хи тасса а̄йасмато па̄пака̄ акусала̄ иччха̄вачара̄ аппахӣна̄ диссанти чева сӯйанти ча. сеййатха̄пи, а̄вусо, кам̣сапа̄ти а̄бхата̄ а̄пан̣а̄ ва̄ камма̄ракула̄ ва̄ парисуддха̄ парийода̄та̄. таменам̣ са̄мика̄ ахикун̣апам̣ ва̄ куккуракун̣апам̣ ва̄ мануссакун̣апам̣ ва̄ рачайитва̄ ан̃н̃исса̄ кам̣сапа̄тийа̄ пат̣икуджджитва̄ антара̄пан̣ам̣ пат̣ипаджджеййум̣. таменам̣ джано дисва̄ евам̣ вадеййа – ‘амбхо, кимевидам̣ харӣйати джан̃н̃аджан̃н̃ам̣ вийа̄’ти? таменам̣ ут̣т̣хахитва̄ апа̄пуритва̄ [ава̄пуритва̄ (сӣ.)] олокеййа. тасса сахадассанена амана̄пата̄ ча сан̣т̣хахеййа, па̄т̣икулйата̄ [пат̣икӯлата̄ (ка.), па̄т̣икӯлйата̄ (сйа̄.)] ча сан̣т̣хахеййа, джегуччхата̄ ча [джегуччхита̄ ча (пӣ. ка.)] сан̣т̣хахеййа; джигхаччхита̄нампи на бхоттукамйата̄ асса, пагева сухита̄нам̣. евамева кхо, а̄вусо, йасса кассачи бхиккхуно име па̄пака̄ акусала̄ иччха̄вачара̄ аппахӣна̄ диссанти чева сӯйанти ча, кин̃ча̄пи со хоти а̄ран̃н̃ико пантасена̄сано пин̣д̣апа̄тико сапада̄нача̄рӣ пам̣сукӯлико лӯкхачӣварадхаро, атха кхо нам̣ сабрахмача̄рӣ на чева саккаронти на гарум̣ каронти на ма̄ненти на пӯдженти. там̣ кисса хету? те хи тасса а̄йасмато па̄пака̄ акусала̄ иччха̄вачара̄ аппахӣна̄ диссанти чева сӯйанти ча.

62. ‘‘йасса кассачи, а̄вусо, бхиккхуно име па̄пака̄ акусала̄ иччха̄вачара̄ пахӣна̄ диссанти чева сӯйанти ча, кин̃ча̄пи со хоти га̄мантавиха̄рӣ немантанико гахапатичӣварадхаро, атха кхо нам̣ сабрахмача̄рӣ саккаронти гарум̣ каронти ма̄ненти пӯдженти. там̣ кисса хету? те хи тасса а̄йасмато па̄пака̄ акусала̄ иччха̄вачара̄ пахӣна̄ диссанти чева сӯйанти ча. сеййатха̄пи, а̄вусо, кам̣сапа̄ти а̄бхата̄ а̄пан̣а̄ ва̄ камма̄ракула̄ ва̄ парисуддха̄ парийода̄та̄. таменам̣ са̄мика̄ са̄лӣнам̣ оданам̣ вичитака̄л̣акам̣ [вичинитака̄л̣акам̣ (ка.)] анекасӯпам̣ анекабйан̃джанам̣ рачайитва̄ ан̃н̃исса̄ кам̣сапа̄тийа̄ пат̣икуджджитва̄ антара̄пан̣ам̣ пат̣ипаджджеййум̣. таменам̣ джано дисва̄ евам̣ вадеййа – ‘амбхо, кимевидам̣ харӣйати джан̃н̃аджан̃н̃ам̣ вийа̄’ти? таменам̣ ут̣т̣хахитва̄ апа̄пуритва̄ олокеййа. тасса саха дассанена мана̄пата̄ ча сан̣т̣хахеййа, аппа̄т̣икулйата̄ ча сан̣т̣хахеййа, аджегуччхата̄ ча сан̣т̣хахеййа; сухита̄нампи бхоттукамйата̄ асса, пагева джигхаччхита̄нам̣. евамева кхо, а̄вусо, йасса кассачи бхиккхуно име па̄пака̄ акусала̄ иччха̄вачара̄ пахӣна̄ диссанти чева сӯйанти ча, кин̃ча̄пи со хоти га̄мантавиха̄рӣ немантанико гахапатичӣварадхаро, атха кхо нам̣ сабрахмача̄рӣ саккаронти гарум̣ каронти ма̄ненти пӯдженти. там̣ кисса хету? те хи тасса а̄йасмато па̄пака̄ акусала̄ иччха̄вачара̄ пахӣна̄ диссанти чева сӯйанти ча̄’’ти.

63. евам̣ вутте, а̄йасма̄ маха̄моггалла̄но а̄йасмантам̣ са̄рипуттам̣ етадавоча – ‘‘упама̄ мам̣, а̄вусо са̄рипутта, пат̣ибха̄тӣ’’ти. ‘‘пат̣ибха̄ту там̣, а̄вусо моггалла̄на̄’’ти. ‘‘екамида̄хам̣, а̄вусо, самайам̣ ра̄джагахе вихара̄ми гириббадже. атха кхва̄хам̣, а̄вусо, пуббан̣хасамайам̣ нива̄сетва̄ паттачӣварама̄да̄йа ра̄джагахам̣ пин̣д̣а̄йа па̄висим̣. тена кхо пана самайена самӣти йа̄нака̄рапутто ратхасса немим̣ таччхати. таменам̣ пан̣д̣упутто а̄джӣвако пура̄н̣айа̄нака̄рапутто паччупат̣т̣хито хоти. атха кхо, а̄вусо, пан̣д̣упуттасса а̄джӣвакасса пура̄н̣айа̄нака̄рапуттасса евам̣ четасо паривитакко удапа̄ди – ‘ахо вата̄йам̣ самӣти йа̄нака̄рапутто имисса̄ немийа̄ иман̃ча ван̇кам̣ иман̃ча джимхам̣ иман̃ча досам̣ таччхеййа, ева̄йам̣ неми апагатаван̇ка̄ апагатаджимха̄ апагатадоса̄ суддха̄ асса [суддха̄сса (сӣ. пӣ.), суддха̄ (ка.)] са̄ре патит̣т̣хита̄’ти. йатха̄ йатха̄ кхо, а̄вусо, пан̣д̣упуттасса а̄джӣвакасса пура̄н̣айа̄нака̄рапуттасса четасо паривитакко хоти, татха̄ татха̄ самӣти йа̄нака̄рапутто тасса̄ немийа̄ тан̃ча ван̇кам̣ тан̃ча джимхам̣ тан̃ча досам̣ таччхати. атха кхо, а̄вусо, пан̣д̣упутто а̄джӣвако пура̄н̣айа̄нака̄рапутто аттамано аттаманава̄чам̣ ниччха̄реси – ‘хадайа̄ хадайам̣ ман̃н̃е ан̃н̃а̄йа таччхатӣ’ти.

‘‘евамева кхо, а̄вусо, йе те пуггала̄ ассаддха̄, джӣвикаттха̄ на саддха̄ ага̄расма̄ анага̄рийам̣ паббаджита̄, сат̣ха̄ ма̄йа̄вино кетабино [кет̣убхино (бахӯсу)] уддхата̄ уннал̣а̄ чапала̄ мукхара̄ викин̣н̣ава̄ча̄, индрийесу агуттадва̄ра̄, бходжане аматтан̃н̃уно, джа̄гарийам̣ анануйутта̄, са̄ман̃н̃е анапеккхаванто, сиккха̄йа на тиббага̄рава̄, ба̄хулика̄ са̄тхалика̄, оккамане пуббан̇гама̄, павивеке никкхиттадхура̄, кусӣта̄ хӣнавӣрийа̄ мут̣т̣хассатӣ асампаджа̄на̄ асама̄хита̄ виббхантачитта̄ дуппан̃н̃а̄ ел̣амӯга̄, тесам̣ а̄йасма̄ са̄рипутто имина̄ дхаммапарийа̄йена хадайа̄ хадайам̣ ман̃н̃е ан̃н̃а̄йа таччхати.

‘‘йе пана те кулапутта̄ саддха̄ ага̄расма̄ анага̄рийам̣ паббаджита̄, асат̣ха̄ ама̄йа̄вино акетабино ануддхата̄ ануннал̣а̄ ачапала̄ амукхара̄ авикин̣н̣ава̄ча̄, индрийесу гуттадва̄ра̄, бходжане маттан̃н̃уно, джа̄гарийам̣ ануйутта̄, са̄ман̃н̃е апеккхаванто, сиккха̄йа тиббага̄рава̄, на ба̄хулика̄ на са̄тхалика̄, оккамане никкхиттадхура̄, павивеке пуббан̇гама̄, а̄раддхавӣрийа̄ пахитатта̄ упат̣т̣хитассатӣ сампаджа̄на̄ сама̄хита̄ екаггачитта̄ пан̃н̃аванто анел̣амӯга̄, те а̄йасмато са̄рипуттасса имам̣ дхаммапарийа̄йам̣ сутва̄ пиванти ман̃н̃е, гхасанти ман̃н̃е вачаса̄ чева манаса̄ ча – ‘са̄дху вата, бхо, сабрахмача̄рӣ акусала̄ вут̣т̣ха̄петва̄ кусале патит̣т̣ха̄петӣ’ти. сеййатха̄пи, а̄вусо, иттхӣ ва̄ пурисо ва̄ дахаро йува̄ ман̣д̣анакаджа̄тико сӣсам̣нха̄то уппалама̄лам̣ ва̄ вассикама̄лам̣ ва̄ атимуттакама̄лам̣ [адхимуттакама̄лам̣ (сйа̄.)] ва̄ лабхитва̄ убхохи хаттхехи пат̣иггахетва̄ уттаман̇ге сирасмим̣ патит̣т̣хапеййа, евамева кхо, а̄вусо, йе те кулапутта̄ саддха̄ ага̄расма̄ анага̄рийам̣ паббаджита̄, асат̣ха̄ ама̄йа̄вино акетабино ануддхата̄ ануннал̣а̄ ачапала̄ амукхара̄ авикин̣н̣ава̄ча̄, индрийесу гуттадва̄ра̄, бходжане маттан̃н̃уно, джа̄гарийам̣ ануйутта̄, са̄ман̃н̃е апеккхаванто, сиккха̄йа тиббага̄рава̄, на ба̄хулика̄ на са̄тхалика̄, оккамане никкхиттадхура̄, павивеке пуббан̇гама̄, а̄раддхавӣрийа̄ пахитатта̄ упат̣т̣хитассатӣ сампаджа̄на̄ сама̄хита̄ екаггачитта̄ пан̃н̃аванто анел̣амӯга̄, те а̄йасмато са̄рипуттасса имам̣ дхаммапарийа̄йам̣ сутва̄ пиванти ман̃н̃е, гхасанти ман̃н̃е вачаса̄ чева манаса̄ ча – ‘са̄дху вата, бхо, сабрахмача̄рӣ акусала̄ вут̣т̣ха̄петва̄ кусале патит̣т̣ха̄петӣ’ти. итиха те убхо маха̄на̄га̄ ан̃н̃аман̃н̃асса субха̄ситам̣ саманумодим̣сӯ’’ти.

анан̇ган̣асуттам̣ нит̣т̣хитам̣ пан̃чамам̣.