9. мат̣т̣хакун̣д̣алӣвима̄наваттху

1207. [пе. ва. 186] ‘‘алан̇като мат̣т̣хакун̣д̣алӣ [мат̣т̣акун̣д̣алӣ (сӣ.)], ма̄ладха̄рӣ харичандануссадо;

ба̄ха̄ паггайха кандаси, ванамаджджхе ким̣ дуккхито тува’’нти.

1208. ‘‘сован̣н̣амайо пабхассаро, уппанно ратхапан̃джаро мама;

тасса чаккайугам̣ на винда̄ми, тена дуккхена джаха̄ми [джахиссам̣ (сӣ.), джахисса̄ми (сйа̄. пӣ.)] джӣвита’’нти.

1209. ‘‘сован̣н̣амайам̣ ман̣имайам̣, лохитакамайам̣ [лохитан̇гамайам̣ (сйа̄.), лохитан̇камайам̣ (сӣ.), лохамайам̣ (каттхачи)] атха рӯпийамайам̣;

а̄чиккха [а̄чиккхатха (ка.)] ме бхаддама̄н̣ава, чаккайугам̣ пат̣ипа̄дайа̄ми те’’ти.

1210. со ма̄н̣аво тасса па̄вади, ‘‘чандимасӯрийа̄ убхайеттха диссаре;

сован̣н̣амайо ратхо мама, тена чаккайугена собхатӣ’’ти.

1211. ‘‘ба̄ло кхо твам̣ аси ма̄н̣ава, йо твам̣ паттхайасе апаттхийам̣;

ман̃н̃а̄ми тувам̣ мариссаси, на хи твам̣ лаччхаси чандимасӯрийе’’ти.

1212. ‘‘гамана̄гаманампи диссати, ван̣н̣адха̄ту убхайаттха вӣтхийа̄;

пето [пето пана (сӣ. сйа̄.)] ка̄лакато на диссати, ко нидха кандатам̣ ба̄лйатаро’’ти.

1213. ‘‘саччам̣ кхо вадеси ма̄н̣ава, ахамева кандатам̣ ба̄лйатаро;

чандам̣ вийа да̄рако рудам̣, петам̣ ка̄лаката̄бхипаттхайи’’нти.

1214. ‘‘а̄диттам̣ вата мам̣ сантам̣, гхатаситтам̣ва па̄вакам̣;

ва̄рина̄ вийа осин̃чам̣, саббам̣ нибба̄пайе дарам̣.

1215. ‘‘аббахӣ [аббӯл̣ха (пӣ.), аббӯл̣хам̣ (сйа̄. ка.)] вата ме саллам̣, сокам̣ хадайанисситам̣;

йо ме сокапаретасса, путтасокам̣ апа̄нуди.

1216. ‘‘сва̄хам̣ аббӯл̣хасаллосми, сӣтибхӯтосми ниббуто;

на соча̄ми на рода̄ми, вата сутва̄на ма̄н̣ава̄ти.

1217. ‘‘девата̄ нуси гандхаббо, аду [а̄ду (сӣ. сйа̄.)] сакко пуриндадо;

ко ва̄ твам̣ касса ва̄ путто, катхам̣ джа̄нему там̣ майа’’нти.

1218. ‘‘йан̃ча [йам̣ (ка.)] кандаси йан̃ча родаси, путтам̣ а̄л̣а̄хане сайам̣ дахитва̄;

сва̄хам̣ кусалам̣ каритва̄ каммам̣, тидаса̄нам̣ сахабйатам̣ гато’’ти [паттоти (сӣ. сйа̄. пӣ.)].

1219. ‘‘аппам̣ ва̄ бахум̣ ва̄ на̄ддаса̄ма, да̄нам̣ дадантасса саке ага̄ре;

упосатхакаммам̣ ва̄ [упосатхакамман̃ча (ка.)] та̄дисам̣, кена каммена гатоси девалока’’нти.

1220. ‘‘а̄ба̄дхикохам̣ дуккхито гила̄но, а̄турарӯпомхи саке нивесане;

буддхам̣ вигатараджам̣ витин̣н̣акан̇кхам̣, аддаккхим̣ сугатам̣ аномапан̃н̃ам̣.

1221. ‘‘сва̄хам̣ мудитамано пасанначитто, ан̃джалим̣ акарим̣ татха̄гатасса;

та̄хам̣ кусалам̣ каритва̄на каммам̣, тидаса̄нам̣ сахабйатам̣ гато’’ти.

1222. ‘‘аччхарийам̣ вата аббхутам̣ вата, ан̃джаликаммасса айамӣдисо випа̄ко;

ахампи мудитамано пасанначитто, аджджева буддхам̣ саран̣ам̣ ваджа̄мӣ’’ти.

1223. ‘‘аджджева буддхам̣ саран̣ам̣ ваджа̄хи, дхамман̃ча сан̇гхан̃ча пасанначитто;

татхева сиккха̄йа пада̄ни пан̃ча, акхан̣д̣апхулла̄ни сама̄дийассу.

1224. ‘‘па̄н̣а̄типа̄та̄ вирамассу кхиппам̣, локе адиннам̣ париваджджайассу;

амаджджапо ма̄ ча муса̄ бхан̣а̄хи, сакена да̄рена ча хохи тут̣т̣хо’’ти.

1225. ‘‘аттхака̄моси ме йаккха, хитака̄моси девате;

кароми туйхам̣ вачанам̣, твам̣си а̄чарийо мама̄ти.

1226. ‘‘упеми саран̣ам̣ буддхам̣, дхамман̃ча̄пи ануттарам̣;

сан̇гхан̃ча нарадевасса, гаччха̄ми саран̣ам̣ ахам̣.

1227. ‘‘па̄н̣а̄типа̄та̄ вирама̄ми кхиппам̣, локе адиннам̣ париваджджайа̄ми;

амаджджапо но ча муса̄ бхан̣а̄ми, сакена да̄рена ча хоми тут̣т̣хо’’ти.

мат̣т̣хакун̣д̣алӣвима̄нам̣ навамам̣.