4. суван̣н̣авима̄наваттху

1134. ‘‘сован̣н̣амайе паббатасмим̣, вима̄нам̣ саббатопабхам̣;

хемаджа̄лапат̣иччханнам̣ [хемаджа̄лакапаччханнам̣ (сӣ.)], кин̇кин̣и [кин̇кан̣ика (сйа̄. ка.), кин̇кин̣ика (пӣ.)] джа̄лакаппитам̣.

1135. ‘‘ат̣т̣хам̣са̄ суката̄ тхамбха̄, саббе вел̣урийа̄майа̄;

екамека̄йа ам̣сийа̄, ратана̄ сатта ниммита̄.

1136. ‘‘вел̣урийасуван̣н̣асса, пхалика̄ рӯпийасса ча;

маса̄рагалламутта̄хи, лохитан̇гаман̣ӣхи ча.

1137. ‘‘читра̄ манорама̄ бхӯми, на таттхуддхам̣сатӣ раджо;

гопа̄н̣асӣган̣а̄ пӣта̄, кӯт̣ам̣ дха̄ренти ниммита̄.

1138. ‘‘сопа̄н̣а̄ни ча чатта̄ри, ниммита̄ чатуро диса̄;

на̄на̄ратанагаббхехи, а̄диччова вирочати.

1139. ‘‘ведийа̄ чатассо таттха, вибхатта̄ бха̄гасо мита̄;

даддаллама̄на̄ а̄бханти, саманта̄ чатуро диса̄.

1140. ‘‘тасмим̣ вима̄не паваре, девапутто махаппабхо;

атирочаси ван̣н̣ена, удайантова бха̄н̣ума̄.

1141. ‘‘да̄насса те идам̣ пхалам̣, атхо сӣласса ва̄ пана;

атхо ан̃джаликаммасса, там̣ ме аккха̄хи пуччхито’’.

1142. со девапутто аттамано…пе… йасса каммассидам̣ пхалам̣.

1143. ‘‘ахам̣ андхакавиндасмим̣, буддхасса̄диччабандхуно;

виха̄рам̣ саттху ка̄ресим̣, пасанно сехи па̄н̣ибхи.

1144. ‘‘таттха гандхан̃ча ма̄лан̃ча, паччайан̃ча [паччагган̃ча (сӣ.), паччаггхан̃ча (?)] вилепанам̣;

виха̄рам̣ саттху ада̄сим̣, виппасаннена четаса̄;

тена майхам̣ идам̣ ладдхам̣, васам̣ ваттеми нандане.

1145. ‘‘нандане ча ване [нандане паване (сӣ. сйа̄.)] рамме, на̄на̄диджаган̣а̄йуте;

рама̄ми наччагӣтехи, аччхара̄хи пураккхато’’ти.

суван̣н̣авима̄нам̣ чатуттхам̣.