5. амбавима̄наваттху

1146. ‘‘уччамидам̣ ман̣итхӯн̣ам̣ вима̄нам̣, самантато два̄даса йоджана̄ни;

кӯт̣а̄га̄ра̄ саттасата̄ ул̣а̄ра̄, вел̣урийатхамбха̄ ручакаттхата̄ субха̄.

1147. ‘‘таттхаччхаси пиваси кха̄даси ча, дибба̄ ча вӣн̣а̄ паваданти ваггум̣;

дибба̄ раса̄ ка̄магун̣еттха пан̃ча, на̄рийо ча наччанти суван̣н̣ачханна̄.

1148. ‘‘кена тета̄дисо ван̣н̣о…пе… ван̣н̣о ча те саббадиса̄ пабха̄сатӣ’’ти.

1150. со девапутто аттамано…пе… йасса каммассидам̣ пхалам̣.

1151. ‘‘гимха̄нам̣ паччхиме ма̄се, патапанте [пата̄панте (сйа̄.), пата̄пенте (ка.)] диван̇каре;

паресам̣ бхатако посо, амба̄ра̄мамасин̃чати.

1152. ‘‘атха тена̄гама̄ бхиккху, са̄рипуттоти виссуто;

килантарӯпо ка̄йена, акилантова четаса̄.

1153. ‘‘тан̃ча дисва̄на а̄йантам̣, авочам̣ амбасин̃чако;

са̄дху там̣ [са̄дхукам̣ (ка.)] бханте нха̄пеййам̣, йам̣ мамасса сукха̄вахам̣.

1154. ‘‘тасса ме анукампа̄йа, никкхипи паттачӣварам̣;

нисӣди руккхамӯласмим̣, чха̄йа̄йа екачӣваро.

1155. ‘‘тан̃ча аччхена ва̄рина̄, пасаннама̄насо наро;

нха̄пайӣ руккхамӯласмим̣, чха̄йа̄йа екачӣварам̣.

1156. ‘‘амбо ча ситто саман̣о ча нха̄пито, майа̄ ча пун̃н̃ам̣ пасутам̣ анаппакам̣;

ити со пӣтийа̄ ка̄йам̣, саббам̣ пхарати аттано.

1157. ‘‘тадева еттакам̣ каммам̣, ака̄сим̣ та̄йа джа̄тийа̄;

паха̄йа ма̄нусам̣ дехам̣, упапанномхи нанданам̣.

1158. ‘‘нандане ча ване рамме, на̄на̄диджаган̣а̄йуте;

рама̄ми наччагӣтехи, аччхара̄хи пураккхато’’ти.

амбавима̄нам̣ пан̃чамам̣.