6. даддаллавима̄наваттху

619. ‘‘даддаллама̄на̄ [даддал̣хама̄на̄ (ка.)] ван̣н̣ена, йасаса̄ ча йасассинӣ;

саббе деве та̄ватим̣се, ван̣н̣ена атирочаси.

620. ‘‘дассанам̣ на̄бхиджа̄на̄ми, идам̣ пат̣хамадассанам̣;

касма̄ ка̄йа̄ ну а̄гамма, на̄мена бха̄сасе мама’’нти.

621. ‘‘ахам̣ бхадде субхадда̄сим̣, пуббе ма̄нусаке бхаве;

сахабхарийа̄ ча те а̄сим̣, бхагинӣ ча канит̣т̣хика̄.

622. ‘‘са̄ ахам̣ ка̄йасса бхеда̄, виппамутта̄ тато чута̄;

нимма̄наратӣнам̣ дева̄нам̣, упапанна̄ сахабйата’’нти.

623. ‘‘пахӯтакатакалйа̄н̣а̄, те деве йанти па̄н̣ино;

йесам̣ твам̣ киттайиссаси, субхадде джа̄тиматтано.

624. ‘‘атха [катхам̣ (сӣ. сйа̄.)] твам̣ кена ван̣н̣ена, кена ва̄ ануса̄сита̄;

кӣдисенева да̄нена, суббатена йасассинӣ.

625. ‘‘йасам̣ ета̄дисам̣ патта̄, висесам̣ випуламаджджхага̄;

девате пуччхита̄чиккха, кисса каммассидам̣ пхала’’нти.

626. ‘‘ат̣т̣хева пин̣д̣апа̄та̄ни, йам̣ да̄нам̣ ададам̣ пуре;

даккхин̣еййасса сан̇гхасса, пасанна̄ сехи па̄н̣ибхи.

627. ‘‘тена мета̄дисо ван̣н̣о…пе…ван̣н̣о ча ме саббадиса̄ пабха̄сатӣ’’ти.

629. ‘‘ахам̣ тайа̄ бахутаре бхиккхӯ, сан̃н̃ате брахмача̄райо [брахмачарино (сйа̄.), брахмача̄рийе (пӣ. ка.)];

таппесим̣ аннапа̄нена, пасанна̄ сехи па̄н̣ибхи.

630. ‘‘тайа̄ бахутарам̣ датва̄, хӣнака̄йӯпага̄ ахам̣ [ахум̣ (ка. сӣ.)];

катхам̣ твам̣ аппатарам̣ датва̄, висесам̣ випуламаджджхага̄;

девате пуччхита̄чиккха, кисса каммассидам̣ пхала’’нти.

631. ‘‘манобха̄ванӣйо бхиккху, сандит̣т̣хо ме пуре аху;

та̄хам̣ бхаттена [бхадде (ка.)] нимантесим̣, реватам̣ аттанат̣т̣хамам̣.

632. ‘‘со ме аттхапуреккха̄ро, анукампа̄йа ревато;

сан̇гхе дехӣти мам̣воча, тасса̄хам̣ вачанам̣ карим̣.

633. ‘‘са̄ даккхин̣а̄ сан̇гхагата̄, аппамеййе патит̣т̣хита̄;

пуггалесу тайа̄ диннам̣, на там̣ тава махаппхала’’нти.

634. ‘‘ида̄нева̄хам̣ джа̄на̄ми, сан̇гхе диннам̣ махаппхалам̣;

са̄хам̣ гантва̄ мануссаттам̣, вадан̃н̃ӯ вӣтамаччхара̄;

сан̇гхе да̄на̄ни дасса̄ми [сан̇гхе да̄нам̣ дасса̄михам̣ (сйа̄.)], аппаматта̄ пунаппуна’’нти.

635. ‘‘ка̄ еса̄ девата̄ бхадде, тайа̄ мантайате саха;

саббе деве та̄ватим̣се, ван̣н̣ена атирочатӣ’’ти.

636. ‘‘мануссабхӯта̄ девинда, пуббе ма̄нусаке бхаве;

сахабхарийа̄ ча ме а̄си, бхагинӣ ча канит̣т̣хика̄;

сан̇гхе да̄на̄ни датва̄на, катапун̃н̃а̄ вирочатӣ’’ти.

637. ‘‘дхаммена пуббе бхагинӣ, тайа̄ бхадде вирочати;

йам̣ сан̇гхамхи аппамеййе, патит̣т̣ха̄песи даккхин̣ам̣.

638. ‘‘пуччхито хи майа̄ буддхо, гиджджхакӯт̣амхи паббате;

випа̄кам̣ сам̣вибха̄гасса, йаттха диннам̣ махаппхалам̣.

639. ‘‘йаджама̄на̄нам̣ манусса̄нам̣, пун̃н̃апеккха̄на па̄н̣инам̣;

каротам̣ опадхикам̣ пун̃н̃ам̣, йаттха диннам̣ махаппхалам̣.

640. ‘‘там̣ ме буддхо вийа̄ка̄си, джа̄нам̣ каммапхалам̣ сакам̣;

випа̄кам̣ сам̣вибха̄гасса, йаттха диннам̣ махаппхалам̣.

641. [ви. ва. 750; катха̄. 798] ‘‘чатта̄ро ча пат̣ипанна̄, чатта̄ро ча пхале т̣хита̄;

еса сан̇гхо уджубхӯто, пан̃н̃а̄сӣласама̄хито.

642. [ви. ва. 751; катха̄. 798] ‘‘йаджама̄на̄нам̣ манусса̄нам̣, пун̃н̃апеккха̄на па̄н̣инам̣;

каротам̣ опадхикам̣ пун̃н̃ам̣, сан̇гхе диннам̣ махаппхалам̣.

643. [ви. ва. 752; катха̄. 798] ‘‘есо хи сан̇гхо випуло махаггато, есаппамеййо удадхӣва са̄гаро;

ете хи сет̣т̣ха̄ наравӣраса̄вака̄, пабхан̇кара̄ дхаммамудӣрайанти [дхаммакатхам̣ удӣрайанти (сйа̄.)].

644. [ви. ва. 753; катха̄. 798] ‘‘тесам̣ судиннам̣ сухутам̣ суйит̣т̣хам̣, йе сан̇гхамуддисса даданти да̄нам̣;

са̄ даккхин̣а̄ сан̇гхагата̄ патит̣т̣хита̄, махаппхала̄ локавидӯна [локавидӯхи (сйа̄. ка.)] ван̣н̣ита̄.

645. [ви. ва. 754; катха̄. 798] ‘‘ета̄дисам̣ йан̃н̃амануссаранта̄ [пун̃н̃амануссаранта̄ (сйа̄. ка.)], йе ведаджа̄та̄ вичаранти локе;

винеййа маччхерамалам̣ самӯлам̣, аниндита̄ саггамупенти т̣ха̄на’’нти.

даддаллавима̄нам̣ [даддал̣хавима̄нам̣ (ка.)] чхат̣т̣хам̣.