2. уччхуда̄йика̄вима̄наваттху

296. ‘‘обха̄сайитва̄ патхавим̣ [пат̣хавим̣ (сӣ. сйа̄.)] садевакам̣, атирочаси чандимасӯрийа̄ вийа;

сирийа̄ ча ван̣н̣ена йасена теджаса̄, брахма̄ва деве тидасе сахиндаке [саиндаке (сӣ.)].

297. ‘‘пуччха̄ми там̣ уппалама̄ладха̄ринӣ, а̄вел̣инӣ кан̃чанасаннибхаттаче;

алан̇кате уттамаваттхадха̄ринӣ, ка̄ твам̣ субхе девате вандасе мамам̣.

298. ‘‘ким̣ твам̣ пуре каммамака̄си аттана̄, мануссабхӯта̄ пурима̄йа джа̄тийа̄;

да̄нам̣ сучин̣н̣ам̣ атха сӣласам̣йамам̣ [сан̃н̃амам̣ (сӣ.)], кенӯпапанна̄ сугатим̣ йасассинӣ;

девате пуччхита̄чиккха, кисса каммассидам̣ пхала’’нти.

299. ‘‘ида̄ни бханте имамева га̄мам̣ [га̄ме (сйа̄. ка.)], пин̣д̣а̄йа амха̄кам̣ гхарам̣ упа̄гами;

тато те уччхусса ада̄си кхан̣д̣икам̣, пасанначитта̄ атула̄йа пӣтийа̄.

300. ‘‘сассу ча паччха̄ ануйун̃джате мамам̣, кахам̣ [кахам̣ ме (пӣ.)] ну уччхум̣ вадхуке ава̄кири [ава̄кари (сйа̄. ка.)];

на чхад̣д̣итам̣ но пана кха̄дитам̣ майа̄, сантасса бхиккхусса сайам̣ ада̄сахам̣.

301. ‘‘туйхам̣нвидам̣ [туйхам̣ ну идам̣ (сйа̄.)] иссарийам̣ атхо мама, итисса̄ сассу парибха̄сате мамам̣;

пӣт̣хам̣ гахетва̄ паха̄рам̣ ада̄си ме, тато чута̄ ка̄лаката̄мхи девата̄.

302. ‘‘тадева каммам̣ кусалам̣ катам̣ майа̄, сукхан̃ча каммам̣ анубхоми аттана̄;

девехи саддхим̣ парича̄райа̄махам̣, мода̄махам̣ ка̄магун̣ехи пан̃чахи.

303. ‘‘тадева каммам̣ кусалам̣ катам̣ майа̄, сукхан̃ча каммам̣ анубхоми аттана̄;

девиндагутта̄ тидасехи раккхита̄, самаппита̄ ка̄магун̣ехи пан̃чахи.

304. ‘‘ета̄дисам̣ пун̃н̃апхалам̣ анаппакам̣, маха̄випа̄ка̄ мама уччхудаккхин̣а̄;

девехи саддхим̣ парича̄райа̄махам̣, мода̄махам̣ ка̄магун̣ехи пан̃чахи.

305. ‘‘ета̄дисам̣ пун̃н̃апхалам̣ анаппакам̣, маха̄джутика̄ мама уччхудаккхин̣а̄;

девиндагутта̄ тидасехи раккхита̄, сахассанетторива нандане ване.

306. ‘‘туван̃ча бханте анукампакам̣ видум̣, упечча вандим̣ кусалан̃ча пуччхисам̣;

тато те уччхусса ада̄си кхан̣д̣икам̣, пасанначита̄ атула̄йа пӣтийа̄’’ти.

уччхуда̄йика̄вима̄нам̣ дутийам̣.