3. татийапӣт̣хавима̄наваттху

15. ‘‘пӣт̣хам̣ те сован̣н̣амайам̣ ул̣а̄рам̣, маноджавам̣ гаччхати йенака̄мам̣;

алан̇кате малйадхаре суваттхе, обха̄саси виджджуриваббхакӯт̣ам̣.

16. ‘‘кена тета̄дисо ван̣н̣о, кена те идха миджджхати;

уппаджджанти ча те бхога̄, йе кечи манасо пийа̄.

17. ‘‘пуччха̄ми там̣ деви маха̄нубха̄ве, мануссабхӯта̄ кимака̄си пун̃н̃ам̣;

кена̄си евам̣ джалита̄нубха̄ва̄, ван̣н̣о ча те саббадиса̄ пабха̄сатӣ’’ти.

18. са̄ девата̄ аттамана̄, моггалла̄нена пуччхита̄;

пан̃хам̣ пут̣т̣ха̄ вийа̄ка̄си, йасса каммассидам̣ пхалам̣.

19. ‘‘аппасса каммасса пхалам̣ мамедам̣ [маметам̣ (ка.)], йенамхи [тенамхи (ка.)] евам̣ джалита̄нубха̄ва̄;

ахам̣ мануссесу мануссабхӯта̄, пурима̄йа джа̄тийа̄ мануссалоке.

20. ‘‘аддасам̣ вираджам̣ бхиккхум̣, виппасаннамана̄вилам̣;

тасса ада̄сахам̣ пӣт̣хам̣, пасанна̄ сехи па̄н̣ибхи.

21. ‘‘тена мета̄дисо ван̣н̣о, тена ме идха миджджхати;

уппаджджанти ча ме бхога̄, йе кечи манасо пийа̄.

22. ‘‘аккха̄ми те бхиккху маха̄нубха̄ва, мануссабхӯта̄ йамака̄си пун̃н̃ам̣;

тенамхи евам̣ джалита̄нубха̄ва̄, ван̣н̣о ча ме саббадиса̄ пабха̄сатӣ’’ти.

татийапӣт̣хавима̄нам̣ татийам̣.