12. дутийапатиббата̄вима̄наваттху

101. ‘‘вел̣урийатхамбхам̣ ручирам̣ пабхассарам̣, вима̄нама̄руйха анекачиттам̣;

таттхаччхаси деви маха̄нубха̄ве, учча̄вача̄ иддхи викуббама̄на̄;

има̄ ча те аччхара̄йо самантато, наччанти га̄йанти памодайанти ча.

102. ‘‘девиддхипатта̄си маха̄нубха̄ве, мануссабхӯта̄ кимака̄си пун̃н̃ам̣;

кена̄си евам̣ джалита̄нубха̄ва̄, ван̣н̣о ча те саббадиса̄ пабха̄сатӣ’’ти.

103. са̄ девата̄ аттамана̄, моггалла̄нена пуччхита̄;

пан̃хам̣ пут̣т̣ха̄ вийа̄ка̄си, йасса каммассидам̣ пхалам̣.

104. ‘‘ахам̣ мануссесу мануссабхӯта̄, упа̄сика̄ чаккхумато ахосим̣;

па̄н̣а̄типа̄та̄ вирата̄ ахосим̣, локе адиннам̣ париваджджайиссам̣.

105. ‘‘амаджджапа̄ но ча [на̄пи (сйа̄.)] муса̄ абха̄н̣им̣ [абха̄сим̣ (ка.)], сакена са̄мина̄ [са̄мина̄ва (сӣ.)] ахосим̣ тут̣т̣ха̄;

аннан̃ча па̄нан̃ча пасанначитта̄, саккачча да̄нам̣ випулам̣ ада̄сим̣.

106. ‘‘тена мета̄дисо ван̣н̣о, тена ме идха миджджхати;

уппаджджанти ча ме бхога̄, йе кечи манасо пийа̄.

107. ‘‘аккха̄ми те бхиккху маха̄нубха̄ва, мануссабхӯта̄ йамака̄си пун̃н̃ам̣;

тенамхи евам̣ джалита̄нубха̄ва̄, ван̣н̣о ча ме саббадиса̄ пабха̄сатӣ’’ти.

дутийапатиббата̄вима̄нам̣ два̄дасамам̣.