1. пат̣хамапӣт̣хавима̄наваттху

1. ‘‘пӣт̣хам̣ те сован̣н̣амайам̣ ул̣а̄рам̣, маноджавам̣ гаччхати йенака̄мам̣;

алан̇кате малйадхаре [ма̄лйадхаре (сйа̄.)] суваттхе, обха̄саси виджджуриваббхакӯт̣ам̣.

2. ‘‘кена тета̄дисо ван̣н̣о, кена те идха миджджхати;

уппаджджанти ча те бхога̄, йе кечи манасо пийа̄.

3. ‘‘пуччха̄ми там̣ деви маха̄нубха̄ве, мануссабхӯта̄ кимака̄си пун̃н̃ам̣;

кена̄си евам̣ джалита̄нубха̄ва̄, ван̣н̣о ча те саббадиса̄ пабха̄сатӣ’’ти.

4. са̄ девата̄ аттамана̄, моггалла̄нена [моггала̄нена (ка.) евамупарипи] пуччхита̄;

пан̃хам̣ пут̣т̣ха̄ вийа̄ка̄си, йасса каммассидам̣ пхалам̣.

5. ‘‘ахам̣ мануссесу мануссабхӯта̄, аббха̄гата̄на̄санакам̣ ада̄сим̣;

абхива̄дайим̣ ан̃джаликам̣ ака̄сим̣, йатха̄нубха̄ван̃ча ада̄си да̄нам̣.

6. ‘‘тена мета̄дисо ван̣н̣о, тена ме идха миджджхати;

уппаджджанти ча ме бхога̄, йе кечи манасо пийа̄.

7. ‘‘аккха̄ми те бхиккху маха̄нубха̄ва, мануссабхӯта̄ йамака̄си пун̃н̃ам̣;

тенамхи евам̣ джалита̄нубха̄ва̄, ван̣н̣о ча ме саббадиса̄ пабха̄сатӣ’’ти.

пат̣хамапӣт̣хавима̄нам̣ пат̣хамам̣.