4. хум̣хун̇касуттам̣

4. евам̣ ме сутам̣ – екам̣ самайам̣ бхагава̄ урувела̄йам̣ вихарати наджджа̄ неран̃джара̄йа тӣре аджапа̄ланигродхе пат̣хама̄бхисамбуддхо. тена кхо пана самайена бхагава̄ сатта̄хам̣ екапаллан̇кена нисинно хоти вимуттисукхапат̣исам̣ведӣ. атха кхо бхагава̄ тасса сатта̄хасса аччайена тамха̄ сама̄дхимха̄ вут̣т̣ха̄си.

атха кхо ан̃н̃атаро хум̣хун̇каджа̄тико [хухун̇каджа̄тико (сӣ. сйа̄. кам̣. пӣ.)] бра̄хман̣о йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ ат̣т̣ха̄си. екамантам̣ т̣хито кхо со бра̄хман̣о бхагавантам̣ етадавоча – ‘‘китта̄вата̄ ну кхо, бхо готама, бра̄хман̣о хоти, катаме ча пана бра̄хман̣акаран̣а̄ [бра̄хман̣ака̄рака̄ (ка.)] дхамма̄’’ти?

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘йо бра̄хман̣о ба̄хитапа̄падхаммо,

нихум̣хун̇ко [нихухун̇ко (сӣ. сйа̄. кам̣ пӣ.)] никкаса̄во йататто;

ведантагӯ вӯситабрахмачарийо,

дхаммена со брахмава̄дам̣ вадеййа;

йассуссада̄ наттхи кухин̃чи локе’’ти. чатуттхам̣;