5. анопама̄тхерӣга̄тха̄

151. ‘‘учче куле ахам̣ джа̄та̄, бахувитте махаддхане;

ван̣н̣арӯпена сампанна̄, дхӣта̄ маджджхасса [мегхасса (сӣ.), мегхисса (сйа̄.)] атраджа̄.

152. ‘‘паттхита̄ ра̄джапуттехи, сет̣т̣хипуттехи гиджджхита̄ [сет̣т̣хипуттехи бхиджджхита̄ (сӣ.)];

питу ме песайӣ дӯтам̣, детха майхам̣ анопамам̣.

153. ‘‘йаттакам̣ тулита̄ еса̄, туйхам̣ дхӣта̄ анопама̄;

тато ат̣т̣хагун̣ам̣ дассам̣, хиран̃н̃ам̣ ратана̄ни ча.

154. ‘‘са̄хам̣ дисва̄на самбуддхам̣, локаджет̣т̣хам̣ ануттарам̣;

тасса па̄да̄ни вандитва̄, екамантам̣ упа̄висим̣.

155. ‘‘со ме дхаммамадесеси, анукампа̄йа готамо;

нисинна̄ а̄сане тасмим̣, пхусайим̣ татийам̣ пхалам̣.

156. ‘‘тато кеса̄ни чхетва̄на, паббаджим̣ анага̄рийам̣;

аджджа ме саттамӣ ратти, йато тан̣ха̄ висосита̄’’ти.

… анопама̄ тхерӣ….