10. пат̣а̄ча̄ра̄тхерӣга̄тха̄

112. ‘‘нан̇галехи касам̣ кхеттам̣, бӣджа̄ни павапам̣ чхама̄;

путтада̄ра̄ни посента̄, дханам̣ винданти ма̄н̣ава̄.

113. ‘‘кимахам̣ сӣласампанна̄, саттхуса̄санака̄рика̄;

нибба̄нам̣ на̄дхигаччха̄ми, акусӣта̄ ануддхата̄.

114. ‘‘па̄де паккха̄лайитва̄на, удакесу каромахам̣;

па̄додакан̃ча дисва̄на, тхалато ниннама̄гатам̣.

115. ‘‘тато читтам̣ сама̄дхесим̣, ассам̣ бхадрам̣ваджа̄нийам̣;

тато дӣпам̣ гахетва̄на, виха̄рам̣ па̄висим̣ ахам̣;

сеййам̣ олокайитва̄на, ман̃чакамхи упа̄висим̣.

116. ‘‘тато сӯчим̣ гахетва̄на, ват̣т̣им̣ окассайа̄махам̣;

падӣпассева нибба̄нам̣, вимоккхо аху четасо’’ти.

… пат̣а̄ча̄ра̄ тхерӣ….