13. вӣсатинипа̄то

1. амбапа̄лӣтхерӣга̄тха̄

252. ‘‘ка̄л̣ака̄ бхамараван̣н̣аса̄диса̄, веллитагга̄ мама муддхаджа̄ ахум̣;

те джара̄йа са̄н̣ава̄каса̄диса̄, саччава̄дивачанам̣ анан̃н̃атха̄.

253.

‘‘ва̄ситова сурабхӣ каран̣д̣ако, пуппхапӯра мама уттаман̇гаджо [уттаман̇габхӯто (ка.)].

там̣ джара̄йатха саломагандхикам̣, саччава̄дивачанам̣ анан̃н̃атха̄.

254. ‘‘ка̄нанам̣ва сахитам̣ суропитам̣, коччхасӯчивичитаггасобхитам̣;

там̣ джара̄йа виралам̣ тахим̣ тахим̣, саччава̄дивачанам̣ анан̃н̃атха̄.

255. ‘‘кан̣хакхандхакасуван̣н̣аман̣д̣итам̣, собхате сувен̣ӣхилан̇катам̣;

там̣ джара̄йа кхалитам̣ сирам̣ катам̣, саччава̄дивачанам̣ анан̃н̃атха̄.

256. ‘‘читтака̄расуката̄ва лекхика̄, собхаре су бхамука̄ пуре мама;

та̄ джара̄йа валибхиппаламбита̄, саччава̄дивачанам̣ анан̃н̃атха̄.

257. ‘‘бхассара̄ суручира̄ йатха̄ ман̣ӣ, неттахесумабхинӣлама̄йата̄;

те джара̄йабхихата̄ на собхаре, саччава̄дивачанам̣ анан̃н̃атха̄.

258. ‘‘сан̣хатун̇гасадисӣ ча на̄сика̄, собхате су абхийоббанам̣ пати;

са̄ джара̄йа упакӯлита̄ вийа, саччава̄дивачанам̣ анан̃н̃атха̄.

259. ‘‘кан̇кан̣ам̣ ва сукатам̣ сунит̣т̣хитам̣, собхаре су мама кан̣н̣апа̄л̣ийо;

та̄ джара̄йа валибхиппаламбита̄, саччава̄дивачанам̣ анан̃н̃атха̄.

260. ‘‘патталӣмакулаван̣н̣аса̄диса̄, собхаре су данта̄ пуре мама;

те джара̄йа кхан̣д̣ита̄ ча̄сита̄ [пӣтака̄ (сӣ.)], саччава̄дивачанам̣ анан̃н̃атха̄.

261. ‘‘ка̄нанамхи ванасан̣д̣ача̄ринӣ, кокила̄ва мадхурам̣ никӯджихам̣;

там̣ джара̄йа кхалитам̣ тахим̣ тахим̣, саччава̄дивачанам̣ анан̃н̃атха̄.

262. ‘‘сан̣хакамбурива суппамаджджита̄, собхате су гӣва̄ пуре мама;

са̄ джара̄йа бхагга̄ [бхан̃джита̄ (?)] вина̄мита̄, саччава̄дивачанам̣ анан̃н̃атха̄.

263. ‘‘ват̣т̣апалигхасадисопама̄ убхо, собхаре су ба̄ха̄ пуре мама;

та̄ джара̄йа йатха па̄т̣алиббалита̄ [йатха̄ па̄т̣алиппалита̄ (сӣ. сйа̄. ка.)], саччава̄дивачанам̣ анан̃н̃атха̄.

264. ‘‘сан̣хамуддикасуван̣н̣аман̣д̣ита̄, собхаре су хаттха̄ пуре мама;

те джара̄йа йатха̄ мӯламӯлика̄, саччава̄дивачанам̣ анан̃н̃атха̄.

265. ‘‘пӣнават̣т̣асахитуггата̄ убхо, собхаре [собхате (ат̣т̣ха.)] су тханака̄ пуре мама;

тхевикӣва ламбанти нодака̄, саччава̄дивачанам̣ анан̃н̃атха̄.

266. ‘‘кан̃чанассапхалакам̣ва саммат̣т̣хам̣, собхате су ка̄йо пуре мама;

со валӣхи сукхума̄хи отато, саччава̄дивачанам̣ анан̃н̃атха̄.

267. ‘‘на̄габхогасадисопама̄ убхо, собхаре су ӯрӯ пуре мама;

те джара̄йа йатха̄ вел̣уна̄л̣ийо, саччава̄дивачанам̣ анан̃н̃атха̄.

268. ‘‘сан̣ханӯпурасуван̣н̣аман̣д̣ита̄, собхаре су джан̇гха̄ пуре мама;

та̄ джара̄йа тиладан̣д̣ака̄рива, саччава̄дивачанам̣ анан̃н̃атха̄.

269. ‘‘тӯлапун̣н̣асадисопама̄ убхо, собхаре су па̄да̄ пуре мама;

те джара̄йа пхут̣ита̄ валӣмата̄, саччава̄дивачанам̣ анан̃н̃атха̄.

270. ‘‘едисо аху айам̣ самуссайо, джаджджаро бахудуккха̄нама̄лайо;

сопалепапатито джара̄гхаро, саччава̄дивачанам̣ анан̃н̃атха̄’’.

… амбапа̄лӣ тхерӣ….

2. рохинӣтхерӣга̄тха̄

271. ‘‘‘саман̣а̄’ти бхоти супи [бхоти твам̣ сайаси (сӣ.), бхоти мам̣ випасси (сйа̄.)], ‘саман̣а̄’ти пабуджджхаси [пат̣ибуджджхаси (сӣ. сйа̄.)];

саман̣а̄нева [саман̣а̄намева (сӣ. сйа̄.)] киттеси, саман̣ӣ нӯна [саман̣ӣ ну (ка.)] бхависсаси.

272. ‘‘випулам̣ аннан̃ча па̄нан̃ча, саман̣а̄нам̣ павеччаси [пайаччхаси (сӣ.)];

рохинӣ да̄ни пуччха̄ми, кена те саман̣а̄ пийа̄.

273. ‘‘акаммака̄ма̄ аласа̄, парадаттӯпаджӣвино;

а̄сам̣сука̄ са̄дука̄ма̄, кена те саман̣а̄ пийа̄’’.

274. ‘‘чирассам̣ вата мам̣ та̄та, саман̣а̄нам̣ парипуччхаси;

тесам̣ те киттайисса̄ми, пан̃н̃а̄сӣлапараккамам̣.

275. ‘‘каммака̄ма̄ аналаса̄, каммасет̣т̣хасса ка̄рака̄;

ра̄гам̣ досам̣ паджаханти, тена ме саман̣а̄ пийа̄.

276. ‘‘тӣн̣и па̄пасса мӯла̄ни, дхунанти сучика̄рино;

саббам̣ па̄пам̣ пахӣнесам̣, тена ме саман̣а̄ пийа̄.

277. ‘‘ка̄йакаммам̣ сучи несам̣, вачӣкамман̃ча та̄дисам̣;

манокаммам̣ сучи несам̣, тена ме саман̣а̄ пийа̄.

278. ‘‘вимала̄ сан̇кхамутта̄ва, суддха̄ сантараба̄хира̄;

пун̣н̣а̄ сукка̄на дхамма̄нам̣ [суккехи дхаммехи (сӣ. сйа̄. ат̣т̣ха.)], тена ме саман̣а̄ пийа̄.

279. ‘‘бахуссута̄ дхаммадхара̄, арийа̄ дхаммаджӣвино;

аттхам̣ дхамман̃ча десенти, тена ме саман̣а̄ пийа̄.

280. ‘‘бахуссута̄ дхаммадхара̄, арийа̄ дхаммаджӣвино;

екаггачитта̄ сатиманто, тена ме саман̣а̄ пийа̄.

281. ‘‘дӯран̇гама̄ сатиманто, мантабха̄н̣ӣ ануддхата̄;

дуккхассантам̣ паджа̄нанти, тена ме саман̣а̄ пийа̄.

282. ‘‘йасма̄ га̄ма̄ паккаманти, на вилокенти кин̃чанам̣;

анапеккха̄ва гаччханти, тена ме саман̣а̄ пийа̄.

283. ‘‘на тесам̣ кот̣т̣хе опенти, на кумбхим̣ на кхал̣опийам̣;

паринит̣т̣хитамеса̄на̄, тена ме саман̣а̄ пийа̄.

284. ‘‘на те хиран̃н̃ам̣ ган̣ханти, на суван̣н̣ам̣ на рӯпийам̣;

паччуппаннена йа̄пенти, тена ме саман̣а̄ пийа̄.

285. ‘‘на̄на̄кула̄ паббаджита̄, на̄на̄джанападехи ча;

ан̃н̃аман̃н̃ам̣ пийа̄йанти [пихайанти (ка.)], тена ме саман̣а̄ пийа̄’’.

286. ‘‘аттха̄йа вата но бхоти, куле джа̄та̄си рохинӣ;

саддха̄ буддхе ча дхамме ча, сан̇гхе ча тиббага̄рава̄.

287. ‘‘тувам̣ хетам̣ паджа̄на̄си, пун̃н̃аккхеттам̣ ануттарам̣;

амхампи ете саман̣а̄, пат̣иган̣ханти даккхин̣ам̣’’.

288. ‘‘патит̣т̣хито хеттха йан̃н̃о, випуло но бхависсати;

саче бха̄йаси дуккхасса, саче те дуккхамаппийам̣.

289. ‘‘упехи саран̣ам̣ буддхам̣, дхаммам̣ сан̇гхан̃ча та̄динам̣;

сама̄дийа̄хи сӣла̄ни, там̣ те аттха̄йа хехити’’.

290. ‘‘упеми саран̣ам̣ буддхам̣, дхаммам̣ сан̇гхан̃ча та̄динам̣;

сама̄дийа̄ми сӣла̄ни, там̣ ме аттха̄йа хехити.

291. ‘‘брахмабандху пуре а̄сим̣, со ида̄нимхи бра̄хман̣о;

тевиджджо соттийо чамхи, ведагӯ чамхи нха̄тако’’.

… рохинӣ тхерӣ….

3. ча̄па̄тхерӣга̄тха̄

292. ‘‘лат̣т̣хихаттхо пуре а̄си, со да̄ни мигалуддако;

а̄са̄йа палипа̄ гхора̄, на̄саккхи па̄раметаве.

293. ‘‘суматтам̣ мам̣ ман̃н̃ама̄на̄, ча̄па̄ путтаматосайи;

ча̄па̄йа бандханам̣ чхетва̄, паббаджиссам̣ пунопахам̣.

294. ‘‘ма̄ ме куджджхи маха̄вӣра, ма̄ ме куджджхи маха̄муни;

на хи кодхапаретасса, суддхи аттхи куто тапо.

295. ‘‘паккамиссан̃ча на̄л̣а̄то, кодха на̄л̣а̄йа ваччхати;

бандхантӣ иттхирӯпена, саман̣е дхаммаджӣвино’’ [дхаммаджӣвине (ка.)].

296. ‘‘ехи ка̄л̣а ниваттассу, бхун̃джа ка̄ме йатха̄ пуре;

ахан̃ча те васӣката̄, йе ча ме санти н̃а̄така̄’’.

297. ‘‘етто ча̄пе чатуббха̄гам̣, йатха̄ бха̄саси тван̃ча ме;

тайи раттасса посасса, ул̣а̄рам̣ вата там̣ сийа̄’’.

298. ‘‘ка̄л̣ан̇гиним̣ва такка̄рим̣, пуппхитам̣ гиримуддхани;

пхуллам̣ да̄лималат̣т̣хим̣ва, антодӣпева па̄т̣алим̣.

299. ‘‘харичанданалиттан̇гим̣, ка̄сикуттамадха̄риним̣;

там̣ мам̣ рӯпаватим̣ сантим̣, касса оха̄йа гаччхаси’’.

300. ‘‘са̄кунтикова сакун̣им̣ [сакун̣ам̣ (сйа̄.)], йатха̄ бандхитумиччхати;

а̄харимена рӯпена, на мам̣ твам̣ ба̄дхайиссаси’’.

301. ‘‘иман̃ча ме путтапхалам̣, ка̄л̣а уппа̄дитам̣ тайа̄;

там̣ мам̣ путтаватим̣ сантим̣, касса оха̄йа гаччхаси’’.

302. ‘‘джаханти путте саппан̃н̃а̄, тато н̃а̄тӣ тато дханам̣;

паббаджанти маха̄вӣра̄, на̄го чхетва̄ва бандханам̣’’.

303. ‘‘ида̄ни те имам̣ путтам̣, дан̣д̣ена чхурика̄йа ва̄;

бхӯмийам̣ ва̄ нисумбхиссам̣ [нисумбхеййам̣ (сӣ.)], путтасока̄ на гаччхаси’’.

304. ‘‘саче путтам̣ син̇га̄ла̄нам̣, куккура̄нам̣ пада̄хиси;

на мам̣ путтакатте джамми, пунара̄ваттайиссаси’’.

305. ‘‘ханда кхо да̄ни бхадданте, кухим̣ ка̄л̣а гамиссаси;

катамам̣ га̄манигамам̣, нагарам̣ ра̄джадха̄нийо’’.

306. ‘‘ахумха пуббе ган̣ино, ассаман̣а̄ саман̣ама̄нино;

га̄мена га̄мам̣ вичаримха, нагаре ра̄джадха̄нийо.

307. ‘‘есо хи бхагава̄ буддхо, надим̣ неран̃джарам̣ пати;

саббадуккхаппаха̄на̄йа, дхаммам̣ десети па̄н̣инам̣;

тасса̄хам̣ сантикам̣ гаччхам̣, со ме саттха̄ бхависсати’’.

308. ‘‘ванданам̣ да̄ни ваджджа̄си, локана̄тхам̣ ануттарам̣;

падаккхин̣ан̃ча катва̄на, а̄дисеййа̄си даккхин̣ам̣’’.

309. ‘‘етам̣ кхо лаббхамамхехи, йатха̄ бха̄саси тван̃ча ме;

ванданам̣ да̄ни те ваджджам̣, локана̄тхам̣ ануттарам̣;

падаккхин̣ан̃ча катва̄на, а̄дисисса̄ми даккхин̣ам̣’’.

310. тато ча ка̄л̣о пакка̄ми, надим̣ неран̃джарам̣ пати;

со аддаса̄си самбуддхам̣, десентам̣ аматам̣ падам̣.

311. дуккхам̣ дуккхасамуппа̄дам̣, дуккхасса ча атиккамам̣;

арийам̣ чат̣т̣хан̇гикам̣ маггам̣, дуккхӯпасамага̄минам̣.

312. тасса па̄да̄ни вандитва̄, катва̄на нам̣ [катва̄нахам̣ (сӣ.)] падаккхин̣ам̣;

ча̄па̄йа а̄диситва̄на, паббаджим̣ анага̄рийам̣;

тиссо виджджа̄ ануппатта̄, катам̣ буддхасса са̄санам̣.

… ча̄па̄ тхерӣ….

4. сундарӣтхерӣга̄тха̄

313. ‘‘пета̄ни бхоти путта̄ни, кха̄дама̄на̄ тувам̣ пуре;

тувам̣ дива̄ ча ратто ча, атӣва паритаппаси.

314. ‘‘са̄джджа сабба̄ни кха̄дитва̄, сатапутта̄ни [сатта путта̄ни (сйа̄.)] бра̄хман̣ӣ;

ва̄сет̣т̣хи кена ван̣н̣ена, на ба̄л̣хам̣ паритаппаси’’.

315. ‘‘бахӯни путтасата̄ни, н̃а̄тисан̇гхасата̄ни ча;

кха̄дита̄ни атӣтам̣се, мама туйхан̃ча бра̄хман̣а.

316. ‘‘са̄хам̣ ниссаран̣ам̣ н̃атва̄, джа̄тийа̄ маран̣асса ча;

на соча̄ми на рода̄ми, на ча̄пи паритаппайим̣’’.

317. ‘‘аббхутам̣ вата ва̄сет̣т̣хи, ва̄чам̣ бха̄саси едисим̣;

касса твам̣ дхаммаман̃н̃а̄йа, гирам̣ [тхирам̣ (сӣ.)] бха̄саси едисим̣’’.

318. ‘‘еса бра̄хман̣а самбуддхо, нагарам̣ митхилам̣ пати;

саббадуккхаппаха̄на̄йа, дхаммам̣ десеси па̄н̣инам̣.

319. ‘‘тасса брахме [бра̄хман̣а (сӣ. сйа̄.)] арахато, дхаммам̣ сутва̄ нирӯпадхим̣;

таттха вин̃н̃а̄тасаддхамма̄, путтасокам̣ бйапа̄нудим̣’’.

320. ‘‘со ахампи гамисса̄ми, нагарам̣ митхилам̣ пати;

аппева мам̣ со бхагава̄, саббадуккха̄ памочайе’’.