3. уппалада̄йика̄тхерӣапада̄нам̣

57. ‘‘нагаре арун̣аватийа̄, арун̣о на̄ма кхаттийо;

тасса ран̃н̃о ахум̣ бхарийа̄, екаджджхам̣ ча̄райа̄махам̣.

58. ‘‘рахогата̄ нисӣдитва̄, евам̣ чинтесахам̣ тада̄;

‘кусалам̣ ме катам̣ наттхи, а̄да̄йа гамийам̣ мама.

59. ‘‘‘маха̄бхита̄пам̣ кат̣укам̣, гхорарӯпам̣ суда̄рун̣ам̣;

нирайам̣ нӯна гаччха̄ми, еттха ме наттхи сам̣сайо’.

60. ‘‘ева̄хам̣ чинтайитва̄на, пахам̣сетва̄на ма̄насам̣;

ра̄джа̄нам̣ упагантва̄на, идам̣ вачанамабравим̣.

61. ‘‘‘иттхӣ на̄ма майам̣ дева, пуриса̄ниттара̄ аху [пуриса̄нугата̄ сада̄ (сӣ.), пуриса̄ на бхава̄ма но (сйа̄.), пуриса̄нам̣ бхара̄ майам̣ (пӣ.)];

екам̣ ме саман̣ам̣ дехи, бходжайисса̄ми кхаттийа’.

62. ‘‘ада̄си ме тада̄ ра̄джа̄, саман̣ам̣ бха̄витиндрийам̣;

тасса паттам̣ гахетва̄на, параманнена пӯрайим̣.

63. ‘‘пӯретва̄ парамам̣ аннам̣, саха сугандхалепанам̣;

маха̄челена чха̄дитва̄, ада̄сим̣ тут̣т̣хама̄наса̄.

64. ‘‘тена каммена сукатена, четана̄пан̣идхӣхи ча;

джахитва̄ ма̄нусам̣ дехам̣, та̄ватим̣самагаччхахам̣.

65. ‘‘сахассадевара̄джӯнам̣, махеситтамака̄райим̣;

сахассачаккаваттӣнам̣, махеситтамака̄райим̣.

66. ‘‘падесараджджам̣ випулам̣, ган̣ана̄то асан̇кхийам̣;

на̄на̄видхам̣ бахум̣ ан̃н̃ам̣, тасса каммапхалам̣ тато.

67. ‘‘уппалассева ме ван̣н̣о, абхирӯпа̄ судассана̄;

иттхисаббан̇гасампанна̄, абхиджа̄та̄ джутиндхара̄.

68. ‘‘паччхиме бхаве сампатте, аджа̄йим̣ са̄кийе куле;

на̄рӣсахассапа̄моккха̄, суддходанасутассахам̣.

69. ‘‘ниббиндитва̄ ага̄рехам̣, паббаджим̣ анага̄рийам̣;

саттамӣраттисампатта̄ [саттамим̣раттимапатта̄ (сӣ. сйа̄. пӣ.)], чатусаччамапа̄пун̣им̣.

70. ‘‘чӣварам̣ пин̣д̣апа̄тан̃ча, паччайам̣ сайана̄санам̣;

париметум̣ на саккоми, пин̣д̣апа̄тассидам̣ пхалам̣.

71. ‘‘йам̣ майхам̣ пӯритам̣ каммам̣, кусалам̣ сарасе муни;

туйхаттха̄йа маха̄вӣра, паричаттам̣ бахум̣ майа̄.

72. ‘‘екаттим̣се ито каппе, йам̣ да̄намададим̣ тада̄;

дуггатим̣ на̄бхиджа̄на̄ми, пин̣д̣апа̄тассидам̣ пхалам̣.

73. ‘‘две гатийо паджа̄на̄ми, деваттам̣ атха ма̄нусам̣;

ан̃н̃ам̣ гатим̣ на джа̄на̄ми, пин̣д̣апа̄тассидам̣ пхалам̣.

74. ‘‘учче куле паджа̄йа̄ми, маха̄са̄ле [тайо са̄ла (ка.)] махаддхане;

ан̃н̃е куле на джа̄йа̄ми, пин̣д̣апа̄тассидам̣ пхалам̣.

75. ‘‘бхава̄бхаве сам̣саритва̄, суккамӯлена чодита̄;

амана̄пам̣ на пасса̄ми, соманассакатам̣ пхалам̣.

76. ‘‘иддхӣсу ча васӣ хоми, дибба̄йа сотадха̄туйа̄;

четопарийан̃а̄н̣асса, васӣ хоми маха̄муне.

77. ‘‘пуббенива̄сам̣ джа̄на̄ми, диббачаккху висодхитам̣;

сабба̄савапариккхӣн̣а̄, наттхи да̄ни пунаббхаво.

78. ‘‘аттхадхамманируттӣсу, пат̣ибха̄не татхева ча;

н̃а̄н̣ам̣ мама маха̄вӣра, уппаннам̣ тава сантике.

79. ‘‘килеса̄ джха̄пита̄ майхам̣…пе… вихара̄ми ана̄сава̄.

80. ‘‘сва̄гатам̣ вата ме а̄си…пе… катам̣ буддхасса са̄санам̣.

81. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ уппалада̄йика̄ бхиккхунӣ бхагавато саммукха̄ има̄ га̄тха̄йо абха̄ситтха̄ти.

уппалада̄йика̄тхерийа̄пада̄нам̣ татийам̣.