5. нал̣ама̄лика̄тхерӣапада̄нам̣

37. ‘‘чандабха̄га̄надӣтӣре, ахосим̣ киннарӣ тада̄;

аддасам̣ вираджам̣ буддхам̣, сайамбхум̣ апара̄джитам̣.

38. ‘‘пасанначитта̄ сумана̄, ведаджа̄та̄ катан̃джалӣ;

нал̣ама̄лам̣ гахетва̄на, сайамбхум̣ абхипӯджайим̣.

39. ‘‘тена каммена сукатена, четана̄пан̣идхӣхи ча;

джахитва̄ киннарӣдехам̣, агаччхим̣ тидасам̣ гатим̣.

40. ‘‘чхаттим̣садевара̄джӯнам̣, махеситтамака̄райим̣;

дасаннам̣ чаккаваттӣнам̣, махеситтамака̄райим̣;

сам̣веджетва̄на ме читтам̣ [ведайитва̄на кусалам̣ (сйа̄.), сам̣ведайитва̄ кусалам̣ (пӣ.)], паббаджим̣ анага̄рийам̣.

41. ‘‘килеса̄ джха̄пита̄ майхам̣, бхава̄ саббе самӯхата̄ [бхава̄ сам̣гха̄тита̄ мама (ка.)];

сабба̄савапариккхӣн̣а̄, наттхи да̄ни пунаббхаво.

42. ‘‘чатуннавутито каппе, йам̣ пуппхамабхипӯджайим̣;

дуггатим̣ на̄бхиджа̄на̄ми, пуппхапӯджа̄йидам̣ пхалам̣.

43. ‘‘килеса̄ джха̄пита̄ майхам̣…пе… вихара̄ми ана̄сава̄.

44. ‘‘сва̄гатам̣ вата ме а̄си…пе… катам̣ буддхасса са̄санам̣.

45. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ нал̣ама̄лика̄ тхерӣ има̄ га̄тха̄йо абха̄ситтха̄ти.

нал̣ама̄лика̄тхерийа̄пада̄нам̣ пан̃чамам̣.