6. екапин̣д̣апа̄тада̄йика̄тхерӣапада̄нам̣

46. ‘‘нагаре бандхуматийа̄, бандхума̄ на̄ма кхаттийо;

тасса ран̃н̃о ахум̣ бхарийа̄, екаджджхам̣ ча̄райа̄махам̣ [екаччам̣ ва̄дайа̄махам̣ (сйа̄.)].

47. ‘‘рахогата̄ нисӣдитва̄, евам̣ чинтесахам̣ тада̄;

‘а̄да̄йа гаманӣйан̃хи, кусалам̣ наттхи ме катам̣.

48. ‘‘‘маха̄бхита̄пам̣ кат̣укам̣, гхорарӯпам̣ суда̄рун̣ам̣;

нирайам̣ нӯна гаччха̄ми, еттха ме наттхи сам̣сайо’.

49. ‘‘ра̄джа̄нам̣ упасан̇камма, идам̣ вачанамабравим̣;

‘екам̣ ме саман̣ам̣ дехи, бходжайисса̄ми кхаттийа’.

50. ‘‘ада̄си ме маха̄ра̄джа̄, саман̣ам̣ бха̄витиндрийам̣;

тасса паттам̣ гахетва̄на, параманнена пӯрайим̣ [таппайим̣ (сӣ.)].

51. ‘‘пӯрайитва̄ параманнам̣, гандха̄лепам̣ ака̄сахам̣;

джа̄лена пидахитва̄на, ваттхайугена [пӣтачол̣ена (сйа̄.), маха̄нелена (пӣ.)] чха̄дайим̣.

52. ‘‘а̄рамман̣ам̣ мамам̣ етам̣, сара̄ми йа̄ваджӣвихам̣;

таттха читтам̣ паса̄детва̄, та̄ватим̣самагаччхахам̣.

53. ‘‘тим̣са̄нам̣ девара̄джӯнам̣, махеситтамака̄райим̣;

манаса̄ паттхитам̣ майхам̣, ниббаттати йатхиччхитам̣ [йатиччхакам̣ (сйа̄.), йадиччхакам̣ (пӣ. ка.)].

54. ‘‘вӣса̄нам̣ чаккаваттӣнам̣, махеситтамака̄райим̣;

очитатта̄ва [упачитатта̄ (сйа̄.)] хутва̄на, сам̣сара̄ми бхавесвахам̣.

55. ‘‘саббабандханамутта̄хам̣, апета̄ ме упа̄дика̄;

сабба̄савапариккхӣн̣а̄, наттхи да̄ни пунаббхаво.

56. ‘‘еканавутито каппе, йам̣ да̄намададим̣ тада̄;

дуггатим̣ на̄бхиджа̄на̄ми, пин̣д̣апа̄тассидам̣ пхалам̣.

57. ‘‘килеса̄ джха̄пита̄ майхам̣…пе… вихара̄ми ана̄сава̄.

58. ‘‘сва̄гатам̣ вата ме а̄си…пе… катам̣ буддхасса са̄санам̣.

59. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ екапин̣д̣апа̄тада̄йика̄ бхиккхунӣ има̄ га̄тха̄йо абха̄ситтха̄ти.

екапин̣д̣апа̄тада̄йика̄тхерийа̄пада̄нам̣ чхат̣т̣хам̣.