8. ан̇гулима̄латтхерага̄тха̄

866. ‘‘гаччхам̣ вадеси саман̣а ‘т̣т̣хитомхи’, маман̃ча брӯси т̣хитамат̣т̣хитоти;

пуччха̄ми там̣ саман̣а етаматтхам̣, ‘катхам̣ т̣хито твам̣ ахамат̣т̣хитомхи’’’.

867. ‘‘т̣хито ахам̣ ан̇гулима̄ла саббада̄, саббесу бхӯтесу нидха̄йа дан̣д̣ам̣;

туван̃ча па̄н̣есу асан̃н̃атоси, тасма̄ т̣хитохам̣ тувамат̣т̣хитоси’’.

868. ‘‘чирассам̣ вата ме махито махесӣ, маха̄ванам̣ саман̣о паччапа̄ди [паччупа̄ди (саббаттха)];

сохам̣ чаджисса̄ми сахассапа̄пам̣, сутва̄на га̄тхам̣ тава дхаммайуттам̣’’.

869. иччева чоро асима̄вудхан̃ча, соббхе папа̄те нараке анвака̄си [акири (ма. ни. 2.349)];

аванди чоро сугатасса па̄де, таттхева паббаджджамайа̄чи буддхам̣.

870. буддхо ча кхо ка̄рун̣ико махеси, йо саттха̄ локасса садевакасса;

‘тамехи бхиккхӯ’ти тада̄ авоча, есева тасса аху бхиккхубха̄во.

871. ‘‘йо ча пуббе памаджджитва̄, паччха̄ со наппамаджджати;

сомам̣ локам̣ пабха̄сети, аббха̄ муттова чандима̄.

872. ‘‘йасса па̄пам̣ катам̣ каммам̣, кусалена пидхӣйати [питхӣйати (сӣ. сйа̄.)];

сомам̣ локам̣ пабха̄сети, аббха̄ муттова чандима̄.

873. ‘‘йо хаве дахаро бхиккху, йун̃джати буддхаса̄сане;

сомам̣ локам̣ пабха̄сети, аббха̄ муттова чандима̄.

874. [диса̄ хи (сйа̄. ка., ма. ни. 2.352)] ‘‘диса̄пи ме дхаммакатхам̣ сун̣анту, диса̄пи ме йун̃джанту буддхаса̄сане;

диса̄пи ме те манудже бхаджанту, йе дхаммамева̄дапайанти санто.

875. ‘‘диса̄ хи ме кхантива̄да̄нам̣, авиродхаппасам̣синам̣;

сун̣анту дхаммам̣ ка̄лена, тан̃ча анувидхӣйанту.

876. ‘‘на хи джа̄ту со мамам̣ хим̣се, ан̃н̃ам̣ ва̄ пана кин̃чанам̣ [кан̃чинам̣ (сӣ. сйа̄.), кан̃чанам̣ (?)];

паппуййа парамам̣ сантим̣, раккхеййа тасатха̄варе.

877. [тхерага̄. 19] ‘‘удакан̃хи найанти неттика̄, усука̄ра̄ намайанти [дамайанти (ка.)] теджанам̣;

да̄рум̣ намайанти [дамайанти (ка.)] таччхака̄, атта̄нам̣ дамайанти пан̣д̣ита̄.

878. ‘‘дан̣д̣енеке дамайанти, ан̇кусебхи каса̄хи ча;

адан̣д̣ена асаттхена, ахам̣ дантомхи та̄дина̄.

879. ‘‘‘ахим̣сако’ти ме на̄мам̣, хим̣сакасса пуре сато;

аджджа̄хам̣ саччана̄момхи, на нам̣ хим̣са̄ми кин̃чанам̣ [кан̃чинам̣ (сӣ. сйа̄.), кан̃чанам̣ (?)].

880. ‘‘чоро ахам̣ пуре а̄сим̣, ан̇гулима̄лоти виссуто;

вуйхама̄но махогхена, буддхам̣ саран̣ама̄гамам̣.

881. ‘‘лохитапа̄н̣и пуре а̄сим̣, ан̇гулима̄лоти виссуто;

саран̣агаманам̣ пасса, бхаванетти самӯхата̄.

882. ‘‘та̄дисам̣ каммам̣ катва̄на, бахум̣ дуггатига̄минам̣;

пхут̣т̣хо каммавипа̄кена, анан̣о бхун̃джа̄ми бходжанам̣.

883. ‘‘пама̄дамануйун̃джанти, ба̄ла̄ думмедхино джана̄;

аппама̄дан̃ча медха̄вӣ, дханам̣ сет̣т̣хам̣ва раккхати.

884. ‘‘ма̄ пама̄дамануйун̃джетха, ма̄ ка̄маратисантхавам̣ [сандхавам̣ (ка.)];

аппаматто хи джха̄йанто, паппоти парамам̣ сукхам̣.

885. ‘‘сва̄гатам̣ на̄пагатам̣, нетам̣ думмантитам̣ мама;

савибхаттесу дхаммесу, йам̣ сет̣т̣хам̣ тадупа̄гамам̣.

886. ‘‘сва̄гатам̣ на̄пагатам̣, нетам̣ думмантитам̣ мама;

тиссо виджджа̄ ануппатта̄, катам̣ буддхасса са̄санам̣.

887. ‘‘аран̃н̃е руккхамӯле ва̄, паббатесу гуха̄су ва̄;

таттха таттхева ат̣т̣ха̄сим̣, уббиггаманасо тада̄.

888. ‘‘сукхам̣ сайа̄ми т̣ха̄йа̄ми, сукхам̣ каппеми джӣвитам̣;

ахаттхапа̄со ма̄расса, ахо саттха̄нукампито.

889. ‘‘брахмаджаччо пуре а̄сим̣, удиччо убхато аху;

соджджа путто сугатасса, дхаммара̄джасса саттхуно.

890. ‘‘вӣтатан̣хо ана̄да̄но, гуттадва̄ро сусам̣вуто;

агхамӯлам̣ вадхитва̄на, патто ме а̄саваккхайо.

891. ‘‘паричин̣н̣о майа̄ саттха̄, катам̣ буддхасса са̄санам̣;

охито гаруко бха̄ро, бхаванетти самӯхата̄’’ти.

… ан̇гулима̄ло тхеро….